Ndomo ci sangiwa 1 Va Korindo 15:8, Paulu hati: “Oku sulako, wa molẽhavo kokuange ndu okuti komõla wa citiwa osimbu otembo yaco ka ya pitĩlile.” Kosimbu tua enda oku lombolola okuti Paulu citava okuti wa kala oku tiamisila olondaka evi eci a kuata ocinjonde ca Yesu wa molẽha vulamba kilu. Eci ca kala ndu okuti wa kuatele esumũlũho lioku citiwa, ale oku pinduiwila vetimba liespiritu osimbu otembo yepinduko liaco ka ya pitĩlilepo. Pole, elilongiso limue liondongosi liocinimbu caco, lia lekisa esukila lioku linga epongoloko liatiamẽla kelomboloko liocinimbu eci.

Ocilli okuti palo, Paulu wa kala oku tukula eci ca pita vepuluvi a tava oku kala Ukristão. Pole, nye eye a yonguile oku popia lolondaka viokuti, “wa citiwa osimbu otembo yaco ka ya pitĩlile”? Kuli alomboluilo alua.

Epongoloko liaye lia kala lionjanga halio liocipikipiki. Oku citiwa osimbu otembo yaco ka ya pitĩlile, ci komõhisa. Saulu (okuti noke weya oku kũlĩhĩwa Paulu) wa lingaile ungende, oku enda ko Damasko oku lambalala Akristão va kalako kuenda eye ka lavokaile oku mola ocinjonde ca Yesu wa pinduiwa. Epongoloko Paulu a linga hayeko lika lia komõhisa, pole lia komõhisavo Akristão vana eye a sokiyile oku lambalala volupale luaco. Kuenje eci ca pita laye co saluisa calua okuti vokatembo kamue wa linga omeke.—Ovil. 9:1-9, 17-19.

Wa tava oku kala Ukristão “vepuluvi limue ka lia lavokawaile.” Kelimi lio Helasi ondaka oku citiwa osimbu otembo yaco ka ya pitĩlile, ya pongoluiwavo okuti, oku “citiwa vepuluvi limue ka lia lavokawaile.” Embimbiliya lio Yerusalãi lia pongolola ondaka yaco lonjila ndeyi: “Ca kala ndu okuti nda citiwa vepuluvi limue okuti lomue wa ci lavokaile.” Vepuluvi Paulu a linga Ukristão, Yesu wa enda ale kilu. Ca litepa la vana Paulu a tukula kovinimbu via livangako ceci okuti, eye ka muile Yesu wa pinduiwa osimbu ka endele kilu. (1 Va Kor. 15:4-8) Yesu vocipikipiki wa molẽha ku Paulu poku eca kokuaye epuluvi lioku u mola noke liepinduko liaye, ndaño lia kala “vepuluvi limue ka lia lavokawaile.”

Eye wa kala oku vangula catiamẽla kokuaye muẽle lonjila yimue yumbombe. Ndomo ca lekisiwa lolonoño vimue, olondaka Paulu a tukula vi pondola oku molẽha ndolondaka vioku pisa. Nda eci oco ca kala ocisimĩlo ca Paulu, eye wa kũlĩhĩle okuti ka sesamẽlele oku kala upostolo. Eye wa yonguile oku popia okuti: “Ame ndi sule koku velapo pokati kovapostolo kuenda si sesamẽla oku tukuiwa upostolo, momo nda lambalalele ekongelo lia Suku. Pole, ñuete ocikele caco omo liohenda ya piãla ya Suku.”—1 Va Kor. 15:9, 10.

Eci ci lekisa okuti Paulu wa kala oku tukula onjila ndomo Yesu a molẽha kokuaye vocipikipiki votembo yimue ka la vokaile eci a linga Ukristão, ale omo okuti eye ka sesamẽlele oku mola ocinjonde caco ci komõhisa. Ulandu owu wa pita la Paulu, wa kuata esilivilo lialua komuenyo waye. Eci ca eca uvangi kokuaye wokuti, Yesu wa pinduiwa kuava va fa. Eli olio esunga lieci olonjanja vialua Paulu a tukuila ulandu waco okuti, upange umue ka lavokaile poku kundila vakuavo catiamẽla kepinduko lia Yesu.—Ovil. 22:6-11; 26:13-18.