U ya nga 1 Vhakorinta 15:8, Paulo o ri: “Mafheleloni a ḓivhonadza kha nṋe we nda vha ndi tshi nga ṅwana o bebwaho tshifhinga tshi sa athu u swika.” Tshifhingani tsho fhiraho, ro vha ro ṱalutshedza uri zwi tou nga Paulo o vha a tshi khou amba tshifhinga tsha musi a tshi sumbedzwa bono ḽa musi Yesu e vhugalani hawe ha ṱaḓulu. Zwo vha zwi tshi tou nga o vha o huliswa nge a bebiwa kana u vusiwa uri a ye ṱaḓulu tshifhinga tshi sa athu u swika, hu tshi kha ḓi vha ho sala miṅwaha ya maḓana na maḓana uri yeneyo mvuwo i vhe hone. Fhedzi musi ro no sengulusa yeneyi ndimana, zwo vhonala zwi tshi ṱoḓea uri ri khwinise nḓila ine yeneyi ndimana ya ṱaluswa ngayo.

Ndi ngoho uri hafha Paulo o vha a tshi khou amba zwe zwa itea musi a tshi rembuluwa. Fhedzi o vha a tshi amba mini musi a tshi ri u tou nga “ṅwana o bebwaho tshifhinga tshi sa athu u swika”? A nga vha o vha a tshi khou amba zwithu zwo vhalaho.

Paulo o rembuluwa nga u ṱavhanya na nga nḓila i tshuwisaho. Kanzhi vhathu vha vha vha songo zwi lavhelela musi ṅwana a tshi bebwa tshifhinga tshi sa athu u swika. Musi Saulo (we nga murahu a vha Paulo) a tshi ya Damaseko u tovhola Vhakriste henengei, o vha a songo zwi lavhelela uri u ḓo vhona bono ḽa Yesu o vuswaho vhafuni. Musi Paulo a tshi rembuluwa, zwo mangadza ene muṋe khathihi na Vhakriste vhe a vha a tshi khou ya u vha tovhola kha yeneyo ḓorobo. Zwiṅwe hafhu, zwe zwa itea khae zwo mu tshuwisa lwe a fhedza maḓuvha o vhalaho a sa vhoni.—Mish. 9:1-9, 17-19.

Paulo o rembuluwa nga “tshifhinga tshi songo teaho.” Ipfi ḽa Tshigerika tsha kale ḽe ḽa ṱalutshedzelwa nga uri “ṅwana o bebwaho tshifhinga tshi sa athu u swika,” ḽi dovha ḽa ṱalutshedzelwa nga uri “ṅwana o bebiwaho nga tshifhinga tshi songo teaho.” The Jerusalem Bible i ri: “Ndi tou nga ṅwana o bebiwaho vhathu vha songo zwi lavhelela.” Nga tshifhinga tshe Paulo a rembuluwa ngatsho, Yesu o vha o no vhuyelela ṱaḓulu. Paulo o vha a songo vhona Yesu o vuswaho vhafuni musi a sa athu u vhuyelela ṱaḓulu u fana na vhe a vha bula kha ndimana dza murahu. (1 Vhakor. 15:4-8) Musi Yesu a tshi ḓivhonadza kha Paulo zwi songo lavhelelwa, zwo fha Paulo tshibuli tsha u vhona Yesu musi o no vuswa vhafuni, naho zwo vha zwi tshi tou nga ndi “tshifhinga tshi songo teaho.”

Paulo o vha a tshi khou ḓiamba nga nḓila ya u ḓiṱukufhadza. U ya nga vhaṅwe vhagudi, Paulo o shumisa maipfi a u ḓinyadza. Arali Paulo o vha a tshi khou ḓinyadza, o vha a tshi khou amba uri o vha a songo tewa nga u vha muapostola. Ngoho ndi ya uri Paulo o bvela phanḓa a ri: “Ndi muṱuku kha vhaapostola, a thi fanelei u vhidzwa muapostola, ngauri ndo tovhola tshivhidzo tsha Mudzimu. Ndi kona u ita wonoyu mushumo nga nṱhani ha vhuthu vhuhulu ha Mudzimu.”—1 Vhakor. 15:9, 10.

Ngauralo, zwi vhonala u nga Paulo a nga vha o vha a tshi khou ambela kha tshifhinga tsha musi a tshi rembuluwa nga u ṱavhanya na nga nḓila i songo lavhelelwaho nga tshifhinga tsha musi Yesu a tshi ḓivhonadza khae. Kana a nga vha a tshi khou amba uri ho ngo tewa nga u sumbedzwa bono ḽi mangadzaho nga u ralo. Hu sa londwi uri zwone ndi zwifhio, Paulo o dzhia zwe zwa itea khae zwi zwa ndeme. Zwo mu sumbedza uri Yesu o vha o vuswa vhafuni zwa vhukuma. Ndi ngazwo zwi sa mangadzi uri Paulo u anzela u amba nga ha zwenezwi zwe zwa itea khae a songo zwi lavhelela musi a tshi huwelela kha vhaṅwe nga ha u vuswa ha Yesu vhafuni.—Mish. 22:6-11; 26:13-18.