El testo de 1 Corinti 15:8 dise che Gesù el se ga fato veder a Paolo “par ùltimo” e che Paolo l’era compagno a un bambin “nassesto vanti del tempo”. Una volta, le nostre publicassion le spieghea che Paolo l’era drio parlar de quando el ga visto Gesù nel cielo. L’era come se Paolo fusse stà ressussità, o nassesto, par viver nel cielo vanti che scominsiesse la ressuression par viver là. Magari, dopo che ghemo studià meio questo testo, ghemo capio che ne ocore cambiar quel che penseino.

Paolo l’era drio parlar de quel che ga sucedesto quando el ga visto Gesù. Ma adesso, ndemo veder quel che fursi Paolo el volea dir quando el ga parlà che l’è nassesto vanti del tempo.

La maniera che Paolo l’è deventà dissìpolo de Gesù l’è stà de colpo e anca fadiga par lu. Se un bambin el nasse vanti del tempo, el capita nte una ora che so pare e so mare no i ze mia drio spetar. La medèsima roba la ga sucedesto con Saulo, o sia Paolo. Quando lu l’era drio viaiar a Damasco par ndar contra i fradei, lu no’l spetea veder a Gesù. E quando Paolo l’è deventà un dissìpolo de Gesù, i fradei in Damasco gnanca no i imaginea che una roba cossita la sucederia e manco ancora lu. Lu l’è restà anca orbo par un tempo. Alora, quel che ga sucedesto con Paolo l’è stà de colpo e tanto fadiga par lu. — Ati 9:1-9, 17-19.

Paolo no’l ga scominsià a ndar drio a Gesù nela “ora giusta”. La parola greca par “l’è nassesto vanti del tempo” anca la pol esser doperada par parlar de “qualchedun che no l’è nassesto nela ora giusta”. Par esémpio, la Bìblia Almeida, revista e atualizada, la dise: ‘Come qualchedun che no l’è nassesto nela ora giusta.’ Ma come cossita? Tanti dissìpoli de Cristo i lo gavea visto dopo che lu l’è stà ressussità e vanti che el ndesse al cielo. Invesse, quando Paolo lo ga visto e el ga scominsià a ndarghe drio, Gesù l’era belche nel cielo. (1 Cor. 15:4-8) Alora, podemo dir che Paolo no’l ga visto Gesù “nela ora giusta” parché Cristo l’era belche nel cielo quando el se ga fato veder a lu.

Paolo l’è stà ùmile quando el ga parlà de si stesso. Arquanti studiosi i dise che l’era come se Paolo el pensesse che lu no’l gavea valor. Se l’è pròpio cossita, Paolo el credea che no’l meritea esser un apòstolo. In 1 Corinti 15:9, 10, lu el ga dito: “Mi son el manco importante dei apòstoli e no mèrito esser un apòstolo parché son ndato contra la congregassion de Dio. Ma mi son quel che mi son parché Dio el me ga mostrà la so bontà.”

Alora, quando Paolo el ga dito che l’è nassesto vanti del tempo, fursi lu l’era drio dir che (1) Gesù l’è capità a lu nte una ora che lu no’l spetea mia, (2) lu no’l ga scominsià a ndar drio a Gesù nela ora giusta e (3) lu no’l meritea esser un apòstolo. L’è vera che no semo sicuri de quel che Paolo el ga volesto dir. Ma savemo che Paolo el ga dato tanto valor a quel che el ga visto, parché cossita, el ga credesto che Gesù l’era stà ressussità, e parché el parlea sora questo quando el insegnea ai altri. — Ati 22:6-11; 26:13-18.