Pa 1 Akolinto 15:8, Paulo jwasasile kuti, “Pambesi pakwe jwawonechele kwa une mpela likandi lyangakwana masiku.” Munyumamu twalilondesyaga lilembali kuti komboleka Paulo jwagambaga ya yindu yayamtendechele pandaŵi jele Yesu ŵamwonechele ali mu uchimbichimbi wakwe kwinani. Yeleyi yaliji mpela kuti jwalakwe agambile kupagwa kwene, kapena ajimwiche kuti apochele umi wausimu ndaŵi jakwe mkanijikwane, kapena kuti kuli kusigele yaka yejinji kuti yeleyi yitendekwe. Nambope, panyuma pakulolasoni lilembali, tuyiweni kuti tukososekwa kuchenga yatwalondesye munyumamu yakwamba lilembali.

Yili yisyene kuti palilembali Paulo jwagambaga ya yindu yayamtendechele pandaŵi jaŵachengaga umi wakwe. Nambo ana jwalakwe jwagopolelaga chichi pajwasasile kuti jwaliji “likandi lyangakwana masiku”? Maloŵega mpaka gagopolele yindu yejinji.

Kuchenga kwa umi wa Paulo kwatendekwe mwangajembecheya soni kwaliji kwakogoya. Kuti mwanache apagwe jwangakwana masiku ndaŵi syejinji yikusatendekwa mwangajembecheya. Saulo (jwele kaneko jwamanyikaga kuti Paulo) pajwajawulaga ku Damasiko kukwalagasya Aklistu, nganajembecheyaga kuti chamwone Yesu mmesomkulola ali ajimwiche ku ŵawe. Paulo nganajembecheyaga kuti umi wakwe chiwuchenje. Nambosoni Aklistu ŵa ku Damasiko kuŵajawulaga kukwalagasya nganajembecheyaga kuti Paulo mpaka achenje umi wakwe. Konjechesya pelepa, yayamtendechele Pauloyi yaliji yakogoya mwamti jwayikene pakulepela kulola kwakandaŵi.—Mase. 9:1-9, 17-19.

Kuchenga kwa umi wa Paulo kwatendekwe “pandaŵi jakulemwecheka.” Maloŵe gasyesyene ga Chigiliki gakuti “likandi lyangakwana masiku” mpaka gagopolelesoni kuti “likandi lyakupagwa pandaŵi jakulemwecheka.” Baibulo jine (The Jerusalem Bible) pakusala ya maloŵega jatite, “Yaliji mpela kuti napagwile pandaŵi jele jwalijose nganajembecheyaga.” Paulo pajwachengaga umi wakwe Yesu jwaliji ali awujile kala kwinani. Mwakulekangana ni ŵandu ŵaŵakolasile Paulo mu ndime syamunyuma, jwalakweju nganamwona Yesu pajwajawulaga kwinani. (1 Akoli. 15:4-8) Myoyo ligongo lyakuti Paulo jwam’weni Yesu mwangajembecheya yampele upile wakumwona Yesujo atamose kuti yawonekaga kuti yitendekwe “pandaŵi jakulemwecheka.”

Paulo jwasalaga yakwamba msyenejo nambo mwakulinandiya. Mwakamulana ni ŵamlijiganye ya Baibulo ŵane, maloŵe gaŵakamulichisye masengo Paulo pelepa mpaka gagopolele kuti jwaliwonaga kuŵa jwangali mate. Naga Paulo jwagopolelaga yeleyi pakuŵecheta maloŵega, nikuti jwamanyililaga kuti ngakuŵajilwa kuŵa jwandumetume. Mwine ni ligongo lyakwe jwalakwe jwaŵechete kuti, “Une ndili jwamnandi mnope mwa ŵandumetume wosope, soni nganimba jwakuŵajilwa kolanjidwa kuti ndumetume ligongo nawulagasisye mpingo wa Mlungu. Nambo ligongo lya umbone mtima wekulungwa wa Mlungu ndili jwandumetume.”—1 Akoli. 15:9, 10.

Myoyo, yikuwoneka kuti Paulo pajwaŵechetaga maloŵega komboleka kuti jwagamba ya yindu yangajembecheya soni yakogoya yayatendekwe Yesu pajwawonechele kwa jwalakwe pandaŵi jele Paulojo jwachengaga umi wakwe. Kombolekasoni jwagambaga yakuti nganaŵa jwakuŵajilwa kugawona mesomkulola gakusimonjesyago. Chinga jwalakwe jwagopolelaga yeleyi kapena iyayi, nambo yindu yayamtendecheleyi yaliji yakusosekwa mnope kwa jwalakwejo. Yeleyi yamtendekasisye jwalakwe kusimichisya yakuti Yesu jwajimwiche ku ŵawe. Ni ligongo lyakwe ndaŵi syejinji Paulo pajwalalichilaga yakwamba kwimuka ku ŵawe kwa Yesu, jwasalaga ya yindu yangajembecheya yayamtendecheleyi.—Mase. 22:6-11; 26:13-18.