Tiʼ 1 Corintios 15:8, Pabloeʼ tu yaʼalaj: «Tu tsʼookeʼ tu chíikbesuba tiʼ teen, kex teneʼ beyen juntúul máax maʼ kʼuchaʼan u kʼiinil ka síijeʼ». Teʼelaʼ Pabloeʼ táan u tʼaan tiʼ le kʼiin ka tu yilaj Jesús yéetel le páajtalil yaantiʼ teʼ kaʼanoʼ. Úuchjeakileʼ k-tsolmeʼ bey tsʼaʼab u oportunidadil tiʼ Pablo u síijil wa u kaʼa kuxtal teʼ kaʼan antes tiʼ u kʼuchul u kʼiiniloʼ, yaʼab años antes u káajal u bisaʼal le yéeyaʼanoʼob teʼ kaʼanoʼ. Chéen baʼaleʼ le ka tsʼoʼok u maas xakʼaltaʼal le tekstoaʼ tsʼaʼab cuenta kʼaʼabéet u jel tsoʼolol.

U jaajileʼ teʼ versículoaʼ Pabloeʼ táan u tʼaan tiʼ le baʼax úuch le kʼiin ka tu kʼexaj baʼax ku creerkoʼ. Chéen baʼaleʼ, ¿jach baʼax u kʼáat u yaʼal le tʼaan «beyen juntúul máax maʼ kʼuchaʼan u kʼiinil ka síijeʼ»? Yaan jejeláas bix jeʼel u páajtal u tsoʼololeʼ.

Chéen ka tu téek kʼexaj baʼax ku creertik. U suukileʼ juntúul paal ku síijil maʼ tu kʼiinileʼ maʼ táan u páaʼtaʼal teʼ súutuk jeʼeloʼ. Le táan u bin Pablo wa Saulo tu bejil Damasco utiaʼal u chʼaʼpachtik le cristianoʼoboʼ maʼ u tukultmaj kaʼach u tsʼaʼabal u páajtalil tiʼ u yilik Jesús le tsʼoʼok u kaʼa kuxkíintaʼaloʼ. Pabloeʼ chéen ka tu téek kʼexaj baʼax ku creertik. Leloʼ mix máak kaʼach páaʼtik, mix letiʼ mix le cristianoʼob yanoʼob kaʼach Damascooʼ. Yoʼolal leloʼ Pabloeʼ pʼáat maʼ tu páajtal u paakat ichil wa jaypʼéel kʼiinoʼob (Hech. 9:1-9, 17-19).

Tu kʼexaj baʼax ku creertik kex «maʼ tu kʼiiniliʼ». Le tʼaan griego ku traducirtaʼal «juntúul máax maʼ kʼuchaʼan u kʼiinil ka síijeʼ» jeʼel u páajtal xan u traducirtaʼal «síij maʼ tu kʼiiniliʼ». Le Traducción Kadosh Israelita Mesiánica de estudiooʼ ku traducirtik beyaʼ: «Síijen maʼ teʼ súutuk unajoʼ». Le ka tu kʼexaj baʼax ku creertik Pabloeʼ Jesúseʼ tsʼokaʼaniliʼ u kaʼa bin teʼ kaʼanoʼ. Pabloeʼ maʼ tu yilaj Jesús antes u bin teʼ kaʼan jeʼex úuchik u yilaʼal tumen u maasil discípuloʼoboʼ (1 Cor. 15:4-8). Le úuchik u téek chíikbeskuba Jesús tiʼ Pablooʼ tu tsʼáajtiʼ u oportunidadil u yilik kex «maʼ tu kʼiinil» u yilik kaʼachiʼ.

Táan kaʼach u yeʼesik kabal óolal. Jujuntúul máaxoʼob kaʼanchajaʼan u xookoʼobeʼ ku yaʼalikoʼobeʼ le tʼaan meyajnaj tiʼ Pablo teʼ versículoaʼ ku tsʼáaik naʼatbil bey táan u taaskuba mix baʼalileʼ. Wa bey úuchik u meyaj tiʼ Pablooʼ u kʼáat u yaʼaleʼ letiʼeʼ táan kaʼach u reconocertik maʼ tu náajaltik u beetkuba apóstolil. Le ka tsʼoʼokeʼ hasta tu yaʼalaj: «Teen u maas chichnil tiʼ le apóstoloʼoboʼ; tsʼoʼoleʼ maʼ tin náajmatik ka aʼalaʼakten apóstol tumen tin chʼaʼpachtaj u múuchʼulil Dios. Chéen baʼaleʼ tu yoʼolal u nojoch utsil Dioseʼ yaanten le meyajaʼ» (1 Cor. 15:9, 10).

Jeʼex k-ilkoʼ Pabloeʼ táan u tʼaan kaʼach tiʼ úuchik u téek chíikbeskuba Jesús tiʼ, u téek kʼexpajal baʼax ku creertik wa táan kaʼach u yaʼalik maʼ tu náajaltik u yilik le baʼax tsʼaʼab u yiloʼ. Jeʼel bixakeʼ letiʼeʼ maʼ tuʼubtiʼ le baʼax úuchtiʼoʼ yéetel kʼuch u naʼateʼ tsʼoʼok u kaʼa kuxkíintaʼal Jesús. Le oʼolal cada ken u kʼaʼayt kaʼach tsʼoʼok u kaʼa kuxtal Jesúseʼ ku tsikbaltik le baʼax téek úuchtiʼoʼ (Hech. 22:6-11; 26:13-18).