Ooḅeghiọn idị aBaibul phọ aphagharanhaạn ḍipuru phọ aḍiẹn phọ.

Iiḍighi 24:15 iḅenhị iyira mọ ‘koḅerion ni buọ elhiom eḍighinhom iyaạr r’abuọ ekeeny eḍighinhiom iyaạr.’ Abuọ elhiom eḍighinhom iyaạr phọ pọ awe dị okumu Enhaạn kụ ogbi bọ omhugh, mogẹ siḍien abidị siphẹ aḍinyạ aghuḍum mọ. (Mal. 3:16) Abuọ ekeeny eḍighinhom iyaạr phọ eḅarạm buẹn u/moọgh aani bọ eepoogh dị emhanhạm otuughạ ilọ aZihova kụ aḍuugh esighẹ bọ, esi iduọn phọ u/gẹ aani siḍien abidị pạ aḍinyạ aghuḍum mọ.

Jọn 5:28, 29 ekol aani kẹn iyạl phọ arugu phọ edi bọ siphẹ Iiḍighi 24:15. AZizọs aḅẹm mọ “bulọ oḍighi ghan igey” koḍuạ ni siphẹ iiḍi phọ omite, “koḅerion ni omoọgh aghuḍum, kụ buphẹ oḍighi ghan bọ ikarạph phọ koḅerion ni kụ osoph iiruẹn opume.” Abuọ elhiom eḍighinhom iyaạr phọ uḍighi ni igey araraạr kụ ogbi bọ omhugh. Kụ koḅerion bidị ongọ ghuḍum idị eḍighi bọ ogẹ ni siḍien abidị siphẹ aḍinyạ aghuḍum mọ. Kuolọ abuọ ekeeny eḍighinhom iyaạr phọ u/ḍighi ghan imạ araraạr kụ ogbi bọ omhugh. Koḅerion ni bidị kụ osophonhaan iiruẹn. Siḍien phọ abidị k”ogẹ ni siphẹ aḍinyạ aghuḍum mọ, bidị kotọl mem iiruẹn, obobọ mem ooḅeghiọn aroozọ abidị ophogh. Mem mọ amuphẹ phọ, bidị komoọgh aani eepoogh otuughạ ilọ aZihova ḅilhẹ dị asiḍien abidị keḍigh aani siphẹ aḍinyạ aghuḍum mọ.

Ogananami 20:12, 13 ekaạph mọ oomo abuẹn oḅerion bọ kotọl idị edaphạn “raraạr phọ ogẹ bọ siphẹ aḍinyạ phọ,” iduọn phọ pọ, imhoom iilhogh dị kesighẹ esi pạ omhoom aḅirinhi phọ. AZihova kapiemhi ni bulọ u/meera udaphạn.—Isa. 65:20.

Daniel 12:2 ekaạph ilọ abuẹn ronaanhị bọ ralhạ aḍuugh mọ koḅilhẹ ni omoọgh ghuḍum, “buniin kokelhọm ghuḍum k’agee-pọ kụ buniin otoyon oḅilhẹ okel k’agee-pọ.” Ekpịgh phọ ephẹn phọ ekaạph ilọ ooruẹn dị kasughanham omhạn mem dị r’oḅerion bidị—“ghuḍum k’agee-pọ” obobọ amuphe dị ‘kotoyon oḅilhẹ okel k’agee-pọ’ Esi iḍuọn phọ, siphẹ eekunha 1,000 asiạ phọ, buniin komoọgh ghuḍum k’agee-pọ kụ abuniin komoọgh muphe k’agee-pọ.—Ogan. 20:15; 21:3, 4.

Esi omaạm. Osighẹ dọl iyạl phọ agạ awe phọ koḅeton bọ otomaạm ruuruen dị oghị enhọn eelhe orugh. Abuọ elhiom eḍighinhom iyaạr phọ okịgh bulọ ongọ ḍinyạ oghị enhọn eelhe phọ oḍighi oḍighi, obobọ ḍinyạ amarugh dị meḍighi idị molhọgh bidị elhegh omhooghọm eereẹgh. Kuolọ ilọ abuọ ekeeny eḍighinhom iyaạr phọ ongọ ḍinyạ orolhọm ekulha amem. Kuolọ tutụ bidị kokiọm ghisigh otọl, pọ bidị koḍighi ni oḍeenhaan mọ bidị osianhaan ni orọl isiphẹ emhoom eelhe phọ. Iginha phọ kẹn, kewạ ni mọ abuọ ekeeny eḍighinhom iyaạr phọ kodaphạn iilhogh phọ aZihova kụ ozọ roozọ arilhiom orue orọl aani aParadais. Etigheri torobọ aḍinyạ oḍighom enhọn eelhe dị oye amhoọgh eḅẹl amem mọ, buniin komeera ni moḍighi buọ eelhe phọ kuolọ bunhọn koḅulhemhi ni eelhe phọ bidị oḍuạ bọ oru. Torobọ ooruẹn dị ateẹny oye, pọ udạph roozọ r’iḍighinhom araraạr odị siphẹ emhoom eelhe phọ kụ osoph. Igina phọ kẹn, ooruẹn phọ kosophonhaan bọ oomo abuẹn oḅeton bọ, kodaphạn dọl omheeraam mọ r’iḍighinhom araraạr phọ abidị siphẹ omhoom aḅirinhi phọ.

AZihova Enhaạn igbiririph r’Enhaạn elhiom ooruẹn. (Deut. 32:4; Ps. 33:5) Odị kaḍeenhaan ni ephomhoghiạn phọ odị esi oḅerion abuọ elhiom eḍighinhom iyaạr phọ r’abuọ ekeeny eḍighinhom iyaạr phọ. Kụ eniin phọ amem mọ odị kawạ ni mọ awe phọ odạph siigbu elhiom eḍighinhom iyaạr phọ odị eghị bọ anyụ. Ogina abuẹn kopomhoghiạn bọ nyodị oḅilhẹ odạph siigbu phọ odị kụ kokiọm ghisigh otọl siphẹ omhoom aḅirinhi phọ.