Бу сурактарга Агару Бичик кандый каруу берип турганын кӧрӱп ийектер.

Апостолдордыҥ ижи 24:15-те «актулар да, акту эместер де тирилер» деп айдылат. Актулар дегени ол божоордоҥ озо Кудайга чындык иштеген улус. Олордыҥ ады-јолы јӱрӱмниҥ бичигине бичилип калган (Мал. 3:16). Акту эместер — Иегова керегинде билгирлер алгалакта божогон улус. Олордыҥ ады-јолы јӱрӱмниҥ бичигинде јок.

Иоанн 5:28, 29-та ол ло Апостолдордыҥ ижи 24:15-те тирилетен эки бӧлӱк улус керегинде айдылат. Иисус бу ӱлгерлерде «јакшы эдип јӱргендери јӱрӱм јӱрерге тирилер; јаман эдип јӱргендери буруладарга [«јаргыныҥ алдына турарга», ЈТ] тирилер» деп айткан. Акту улус божоордоҥ озо јакшы керектер эткен. Олор ӱргӱлји јӱрӱм аларга тиргизилер, нениҥ учун дезе олордыҥ ады-јолы јӱрӱмниҥ бичигинде бар болор. Акту эместер дезе божоордоҥ озо јаман керектер эткен. Олор јаргыныҥ алдына турарга тиргизилер. Эм тургуза олордыҥ ады-јолы јӱрӱмниҥ бичигинде јок. Оныҥ учун олордыҥ керектерин теҥеридеги јаргычылар лаптап кӧрӧр. Акту эмес улуста ады-јолын јӱрӱмниҥ бичигине бичидерге, Иегова керегинде билгирлер алатан арга болор.

Ачылта 20:12, 13-те айдылганыла, тирилген улустыҥ ончозына тӱрбектерде бичилгениле јӱрер керек болор. Ӧскӧртӧ айтса олор јаҥы јӱрӱмде Кудайдыҥ јаҥы јасактарын бӱдӱрер учурлу. Бу јасактарды бӱдӱрбеген улусты Иегова јоголтып салар (Иса. 65:20).

Даниил 12:2-де судурлалганыла болзо, «божогон улустыҥ кӧбизи ойгонып келер — кезиги ӱргӱлји јӱрӱмге, кезиги дезе јажына уйатка тӱжерге». Бу ӱлгер аайынча болзо, тиргизилген улустыҥ кезиги «ӱргӱлји јӱрӱмге» тиргизилер, кезиги «јажына уйатка тӱжетен» эмтир. Ӧскӧртӧ айтса, 1 000 јылдыҥ учында кезиги ӱргӱлји јӱрӱм алар, кезиги дезе јажын-чакка јоголтылып калар (Ачыл. 20:15; 21:3, 4).

Мындый тем кӧрӱп ийектер. Јаҥы јӱрӱмде тирилетен эки бӧлӱк улусты ӧскӧ ороонго кӧчӱп барган улуска тӱҥейлеерге јараар. Актулар дезе визаны узак ӧйгӧ алган улуска тӱҥей. Олор келген ороонына јайым иштеп, ӧскӧ дӧ аргаларла тузаланар аргалу. А акту эместер дезе кыска ӧйгӧ берилген визалу улуска тӱҥей. Бу улус јаҥы ороонныҥ гражданствозын аларга турган болзо, јакшы керектер эдип, ороонныҥ башчыларына сӧсуккур болор учурлу. Анайып ла тирилетен акту эмес улус райда артарга турган болзо, Иегованыҥ јасактарына багынып, чындыгын бойыныҥ керектериле кӧргӱзер учурлу. Је кыска да, узун да визалу улустыҥ кезигине гражданство берилер аргалу, а кезигин ороонноҥ чыгарып ийердеҥ айабас. Бу дезе улус бойлорын канайып кӧргӱскенинеҥ камаанду болор. Анайып ла тирилген кажы ла кижи райда артар ба, јок по деп, оныҥ Кудайга чындык болгонынаҥ ла јаҥы јӱрӱмде эткен керектеринеҥ камаанду болор.

Иегова јаҥыс ла килеҥкей Кудай эмес, је ол анайда ок справедливый Кудай (Јаҥ. т. 32:4; Сар. 33:5). Ол сӱӱштеҥ улам актуларды да, акту эместерди де тирилтер. Је бу ок ӧйдӧ ол бойыныҥ нравственный нормаларын бир де јабызатпас. Оныҥ учун јаҥы телекейде јӱк ле Иегованы сӱӱп турган ла оныҥ јасактарын бӱдӱрип турган улус ӱргӱлјиге јӱрер аргалу.