Wakenen kite ma Biblia udwoko ko wang’ penji eno.

Tic mi Jukwenda 24:15 uyero nia cer “bibedo nuti ni weg bedopwe ku ni weg bedopwe ngo de.” Weg bedopwe gitie ju m’ubed uworo Mungu i wang’ tho migi, uketho nying’gi ukiewere i buku mi kwo. (Mal. 3:16) Weg bedopwe ngo ke, utie ju m’utho ma ginwang’u ngo kaka ma cuu mi ng’eyo Yehova, uketho nying’gi ukiewere ngo i buku mi kwo.

Yohana 5:28, 29 uweco iwi ungu ario ma rom ma juweco pigi i Tic mi Jukwenda 24:15. Yesu uwacu nia “ju m’utimo lembe ma beco” gibicer i “cer mi kwo, ju m’utimo lembe ma reco ke ni cer mi pokolembe.” Weg bedopwe gibed gitimo lembe ma beco i wang’ tho migi. Gin gibicer cer mi kwo pilembe nying’gi fodi utie asu akiewa i buku mi kwo. Ento ju ma gitie ngo weg bedopwe gibed gitimo lembe ma reco i wang’ tho migi. Gin lundo gibicer cer mi pokolembe. Nying’gi fodi ukiewere ngo i buku mi kwo, man gibikadhu i nindo mi pokolembe, niwacu jubikenenogi cuu pi kura timo migi. Saa maeno gibinwang’u kaka mi ponjo lembe iwi Yehova kara nying’gi ukiewere i buku mi kwo.

Lembanyutha 20:12, 13 ukoro nia dhanu ceke ma bicer, bibedo ku yeny mi woro “gin m’ugorere i kithabu m’adola,” m’utie cik ma nyen ma Mungu bimiyo i ng’om ma nyen. Ju m’uworo ngo cikne jubinyothogi cen.​—Isa. 65:20.

Daniel 12:2 ular uwacu nia jumoko ma ginindo i tho gibicew, “jumoko mi kwo ma rondo ku rondo, man jumoko mi lewic ku cac ma rondo ku rondo.” Giragora eni ubeweco iwi adwogi ma tokcen ma ju m’ucer gibinwang’u, niwacu “kwo ma rondo ku rondo” kunoke “cac ma rondo ku rondo.” Pieno, i thum mi oro 1 000, jumoko binwang’u kwo ma rondo ku rondo, jumange ke jubinyothogi mi magwei.​—Nyu. 20:15; 21:3, 4.

Wakewec iwi lapor moko. Jucopo poro ungu ario eno m’ucer ku juwirok ma gibemito gicidh gikwo i ng’om mange. Weg bedopwe utie ve ju m’unwang’u karatasi (visa) mi citimo tic i ng’om mange, kunoke m’unyutho nia jung’eyogi man m’umiyo igi bed’agonya moko. Tung’ kugi, weg bedopwe ngo ubedo ve ju m’unwang’u karatasine mi liewo ng’ombe aliewa kunoke mi bedo i iye pi nindo moko kende. Kara juwirok maeni gibed i ng’om mange ma gin’i iye, mito gikeginyuth nia gitie kit dhanu ma nenedi. Kumeno bende, weg bedopwe ngo ma gicer, bikwayere nia giwor cik pa Yehova man ginyuthiri nia gitie dhanu ma pwe kara gimediri nikwo i paradizo. Kadok nwang’u karatasi ma juwirok ginwang’u ubed ma kani de, jumoko copo nwang’u twero mi bedo lwak mi ng’ombe jumoko ke ngo. Nwang’u twero mi bedo lwak mi ng’ombe kunoke ngo, bijengere iwi timo kunoke kura ma ginyutho i ng’omne. Pieno, adwogi ma tokcen pi ju ma gicer, de bijengere iwi gwoko bedoleng’ migi man kura ma gibinyutho i ng’om ma nyen.

Yehova utie ngo kende kende Mungu ma jamer, ento bende Mungu mi bedopwe. (Poi. 32:4; Zab. 33:5) Ebinyutho mer parene nikum weg bedopwe ku weg bedopwe ngo m’ebicero. Re ebikwayugi nia giwor cik pare mir ukungu mi kurajo m’eketho pi gin ma ber ku gin ma rac. Dhanu ma gibimare man ma gibikwo nimakere ku cik pare mir ukungu, re m’ebiyiyo igi nia gimediri nikwo i ng’om ma nyen.