Bibliaw uka jisktʼanakar qhanañchistani.

Hechos 24:15 textorjamajja, “cheqapar sarnaqer jaqenakasa jan cheqapar sarnaqer jaqenakas jaktanipjjapuniniwa”. Cheqapar sarnaqer jaqenakajj janïr jiwkasin Diosar istʼapkäna ukanakawa, ukatwa sutinakapajj jakañ libron qellqantataraki (Mal. 3:16). Jan cheqapar sarnaqer jaqenakajja, janïr jiwkasin Jehová Diosar jan uñtʼapkäna ukanakamppachawa, ukhamajj janiw sutinakapajj jakañ libron qellqantatäkiti.

Juan 5:28, 29 textojja, Hechos 24:15 texton parlki uka pä gruponakatwa parlaraki. Jesusajj akham sänwa: “Khitinakatï suma luräwinak lurapki ukanakajja, jakañatakiw jaktanipjjani, khitinakatï jan walinak lurapki ukanakajja, juzgatäñatakiw jaktanipjjani” sasa. Cheqapar sarnaqer jaqenakajja, janïr jiwkasajj suma luräwinakwa lurapjjäna. Niyakejjay jupanakan sutinakapajj jakañ libron qellqantatächejja, jakañatakiw jaktanipjjani. Ukampis jan cheqapar sarnaqer jaqenakajja, janïr jiwkasajj jan walinakwa lurapjjäna. Ukatwa jupanakajj juzgatäñatak jaktanipjjani. Sutinakapas janïraw jakañ libron qellqantatäkiti, mä qhawqha tiempojj juzgatäpjjaniwa jan ukajj yantʼatäpjjaniwa. Uka tiemponjja, jupanakarojj Jehová Diosar uñtʼapjjañapatakiw mä oportunidadajj churasini, ukhamat sutinakapajj jakañ libron qellqantatäñapataki.

Apocalipsis 20:12, 13 textorjamajja, jiwatat jaktanirinakajj taqeniw “kunanakatï uka rollonakan qellqatäkäna” ukanak istʼapjjañapäni, mä arunjja machaq oraqen utjkani uka machaq leyinakaruw istʼapjjañapäni. Ukanakar jan istʼirinakajj tukjatäpjjaniwa (Is. 65:20).

Daniel 12:2 textonkir profeciarjamajja, jiwatat jaktanirinakat “yaqhepajj wiñay jakañataki, yaqhepasti jiskʼachatäñataki ukhamarak wiñay uñisitäñataki[w]” jaktanipjjani. Uka versiculojja, kunas jiwatat jaktanirinakarojj tukuyar pasani ukatwa parlaski, “yaqhepajj wiñay jakañataki”, “yaqhepasti [...] wiñay uñisitäñataki[w]” jaktanipjjani. Ukhamajj Waranqa Maranak tukuyatarojja, yaqhepanakajj wiñay jakañ katoqapjjani, yaqhepanakasti wiñayatak tukjatäpjjaniwa (Apoc. 20:15; 21:3, 4).

Jiwatat jaktaniri uka pä gruponakajja, yaqha markan jakañ munir jaqenakampi sasispawa. Cheqap sarnaqer jaqenakajja, yaqha markan trabajo katoqañataki jan ukajj uka markan jakañataki visa katoqer extranjeronakamp sasispawa, ukhamatwa uka markan kun lurañatakis librëpjjaspa, derechonïpjjarakispa. Ukampis jan cheqapar sarnaqer jaqenakajja, uka markan mä qhawqha tiempo jakañataki jan ukajj turistanakjam jakañatak visa katoqer extranjeronakamp sasispawa. Uka markan jakasipkakiñapatakejja, uka markan requisitonakap phoqapjjañapaw wakisini. Jan cheqapar sarnaqer jaqenakampejj niya ukhamarakïniwa, paraison jakaskakiñatakejj Jehová Diosan leyinakapar istʼapjjañapaw wakisini, cheqapar sarnaqer jaqëpjjatap uñachtʼayapjjañapaw wakisirakini. Uka extranjeronakajj kawkïr visa katoqkasasa, tiempompejj markan jakapjjañapatakiw yaqhepanakarojj aprobasini, yaqhepanakarusti jaqsusirakiniwa. Kunjamjjay uka markan sarnaqapjjchini ukarjamaw ukajj amtasini. Jiwatat jaktanirinakampejj uka pachparakïniwa, Diosat jan jitheqtapjjatapata ukhamarak kunjamsa machaq oraqen sarnaqapjjani ukarjamaw qheparojj juzgasini.

Jehová Diosajj janiw khuyaptʼayasir Diosakïkiti, jan ukasti cheqapar juzguir Diosarakiwa (Deut. 32:4; Sal. 33:5). Wali munasirïtapjja, cheqapar sarnaqer jaqenakaru jan cheqapar sarnaqer jaqenakar jaktayasaw uñachtʼayani, ukampis kunatï walïki kunatï jan walïki uka toqet leyinakapar respetapjjañapwa munani. Khitinakatï jupar munasipkani leyinakaps istʼapjjarakini ukanakakiw machaq oraqen jakasipkakini.