Di béñge i yom Bibel i nkal.

Kaat Minson mi baôma 24:15 i nkal le “bitugne bi ga ba inyu bôt ba téé sép ni inyu bôt ba téé bé sép.” Bôt ba téé sép ba yé bôt ba ba bi gwélél Djob ilole ba nwo, môl map ma yé i kaat niñ. (Malaki 3:16) Bôt ba téé bé sép ba yé bôt ba ba bi bana bé pôla i gwélél Djob ilole ba nwo. Môl map ma ta bé i kaat niñ.

Kaat Yôhanes 5:28, 29 i mpôdôl i mintôñ mi bôt mi nwo ima kaat Minson mi baôma 24:15 i mpôdôl. Yésu a nkal le “i bôt ba bi boñ mam malam” ba ga lo “inyu bitugne bi niñ, ndi i bôt ba bi bana lem i boñ mam mabe inyu bitugne bi bikééhene.” Bôt ba téé sép ba bi boñ mam malam ilole ba nwo. Ba ga lo bitugne inyu niñ inyule môl map ma ngi yii ntilga i kaat niñ. Ndi, bôt ba téé bé sép ba bi boñ mam mabe ilole ba nwo. Ba ga lo i bitugne bi bikééhene. Môl map ma ta bé i kaat niñ, bakéés ba ga ti bo pôla i unda too ba nôgôl mambén ma Yéhôva. Ba ga bana pôla i yi njee a yé Yéhôva ni i bana môl map ntilga i kaat i niñ.

Kaat Masoola 20:12, 13 i ñunda le i bôt bobasôna ba nlo i bitugne ba nlama nôgôl “mam ma [bi tilba] ikété minhôôk mi bikaat.” I mam ma, ma yé mambén ma mondo Djob a ga ti inyu mbok yondo. I bet ba ga noñ bé mambén ma, ba ga tjiba.​—Yésaya 65:20.

Kaat Daniel 12:2 i nkal le ngim bôt i i bi wo i ga tuge, inyu “ kôs niñ boga, ndi, bape le ba kôs mbolo, ba nyiip ki bo mba ni mba.” Nlôñ unu, u mpôdôl lisuk li i bet ba ga lo bitugne inoñnaga ni i yom ba ga boñ i mbus bitugne gwap. Ba ga kôs “Niñ boga” tole “tjiba i boga.” Jon i mamélél ma hikôô hi nwii, ngim bôt i ga kôs niñ boga; ipe i ga kôs tjiba i boga.​—Masoola 20:15; 21:3, 4.

Di yoñ le i hihéga hini. I yom i mpémél i mintôñ mi bôt mini nwo ima i yé kiki bôt ba ba gwé ngôñ i ke niñ i loñ ipe. Bôt ba téé sép ba yé kiki bôt ba ba nkôs mapep ma ma nti bo kunde i sal, tole i niñ i ngim loñ ibabé i kon woñi. Ndi, bôt ba téé bé sép ba yé kiki bôt ba ba nkôs kunde i niñ i ngim loñ inyu ndék ngéda tole inyu ke minhiômôk nyoo i loñ i. I nya bôt i, i nlama ndugi unda ni maboñok map le ba nla niñ mu i loñ i ilole ba nti bo kunde i ke ni bisu i niñ mu. Nlélém, i bôt ba téé bé sép ba ba nlo bitugne, ba nlama noñ mambén ma Yéhôva, ba unda ni maboñok map le ba yé bôt ba téé sép ba ba kôli niñ i Paradis. To ibale mut a bi bôk a kôs to umbe ntén lipep inyu jôp i loñ, maliga ma yé le, sôk i nsôk, bôt bape ba ga bana kunde i yén nyoo ntandaa ngéda, ki le bape ba ga yén nyoo ndik inyu ndék ngéda. Makidik ma nsôk ma ga yôña inoñnaga ni maboñok map ni libak jap mu loñ i. Nlélém, i bet ba ga lo i bitugne, makidik ma ga yôña inoñnaga ni kiki ba nôgôl mambén ma Yéhôva tole ba nôgôl bé mo i mbok yondo.

Yéhôva a yé Djob li konangoo, li telepsép ni li maliga. (Ndiimba Mbén 32:4; Tjémbi 33:5) Inyu unda gwéha yé, a ga tugul bôt ba téé sép ni bôt ba téé bé sép. Ndi mambén mé inyu loñge ni béba ma ga héñha bé. Di nlama nôgôl mo. Ndik i bet ba ga unda le ba ngwés nye, ba niñik inoñnaga ni mambén mé, bon ba ga niñ i boga ni boga.