Coba ma jo taida di Bibel.

Ulaon ni Apostel 24:15 mandok, “Na lao dipahehe Debata do halak na burju dohot halak na jahat.” Halak na burju, i ma halak na setia tu Debata sahat tu na mate, jala disurat do goar ni nasida di bukku hangoluan. (Mal. 3:16) Molo halak na jahat, i ma halak na so sanga mandapot kesempatan marsiajar taringot Jahowa tikki mangolu nasida, jala dang disurat goar ni nasida di bukku hangoluan.

Hata ni Jesus na disurat di Johannes 5:28, 29 sarupa do tu isi ni Ulaon ni Apostel 24:15. Di ayat i Jesus mandok, “Akka na mangulahon na denggan hehe ma tu hangoluan jala akka na mangulahon na jahat hehe lao diuhumi.” Akka na mangulahon na denggan, i ma akka naposo ni Jahowa na setia sappe mate. Lao dipahehe do nasida tu hangoluan ala tarsurat do goar ni nasida di bukku hangoluan. Molo akka halak na jahat, i ma akka halak na mangulahon ulaon na dihasogohon Jahowa tikki mangolu dope nasida. Dipahehe ma nasida lao diuhumi ala dang tarsurat dope goar ni nasida di bukku hangoluan i. Dung dipahehe lao diadili manang diuji ma nasida. Laos di tikki i ma nasida mandapot kesempatan marsiajar taringot Jahowa. Molo toktong nasida mangoloi tu Jahowa, disurat ma goar ni nasida di bukku hangoluan i.

Pangungkapon 20:12, 13 paboahon, sude na dipahehe i ikkon mangoloi akka na tarsurat di sada gulungan, i ma patik na baru na dilehon Jahowa di tano na imbaru. Akka halak na so mangoloi, ujungna dipamate.—Jes. 65:20.

Didok di Daniel 12:2, adong deba na dipahehe “lao mangolu saleleng ni lelengna, jala na deba nai dipahehe lao dipaila saleleng ni lelengna”. Sian ayat on taboto ma, di ujung ni 1.000 taon adong deba na mandapot hangoluan saleleng ni lelengna jala na deba nai dipamate saleleng ni lelengna.​—Pgk. 20:15; 21:3, 4.

Taida ma jo ilustrasi on. Akka halak na lao dipahehe i disarupahon ma songon akka halak na naeng tinggal di sada negara. Jadi porlu do dapot ni nasida visa manang izin tinggal. Akka “halak na burju” disarupahon do songon halak na mandapot visa kerja manang izin tinggal. Biasana dilehon do tu nasida piga-piga kebebasan na sarupa songon warga negara disi. Akka “halak na jahat” disarupahon do songon halak na mandapot visa turis. Biasana holan satokkin do nasida boi tinggal di negara i, jala molo naeng tinggal nasida ulleleng disi adong do piga-piga persyaratan na ikkon dipenuhi. Sarupa songon i, akka halak na jahat ikkon mangoloi standar ni Jahowa asa boi mangolu di Paradeiso. Alai visa manang aha pe na dapot ni nasida, ikkon unduk do halak i tu peraturan na adong di negara i. Sebagian sian nasida boi gabe warga negara, alai sebagian nai adong do ra na dideportasi, bergantung tu sikap ni nasida saleleng di negara i. Dos songon i ma, sude halak na dipahehe boi mangolu saleleng ni lelengna manang na dang, bergantung tu pangalaho ni nasida dukkon dipahehe.

Sian on taida Debata parholong jala na adil do Jahowa. (5 Mus. 32:4; Ps. 33:5) Dipatudu Ibana do holongna ala dipahehe do halak na burju dohot halak na jahat. Alai dipangido Ibana do asa dioloi nasida standar ni Jahowa. Holan halak na makkaholongi Jahowa dohot na mangulahon standar ni Jahowa do na boi mangolu di tano na imbaru.