Cuba perdiateken uga jawapen Pustaka nandangi penungkunen e.

Bas Perbahanen Rasul-Rasul 24:15 ikataken maka lit pagi “kekeken arah si mate nari man kalak si benar ras kalak si la benar.” Kalak si benar eme kalak si patuh man Dibata sope ia mate, emaka gelar kalak e enggo itulis bas buku kegeluhen. (Mal. 3:16) Kalak si la benar eme kalak si mate sope lit kesempatenna erlajar kerna Jahwe, emaka gelar kalak e la lit bas buku kegeluhen.

Bas Johanes 5:28, 29 lit ituriken kerna dua kelompok. Dua kelompok e seri ras dua kelompok si ituriken bas Perbahanen Rasul-Rasul 24:15. Ikataken Jesus maka “kalak si mehuli perbahanenna ipekeke guna nggeluh si rasa lalap, tapi kalak si jahat perbahanenna ipekeke guna ihakimi.” Kalak si benar “mehuli perbahanenna” sope ia mate. Ipekeke pagi kalak e guna nggeluh si rasa lalap perban gelar kalak e tetap lit bas buku kegeluhen. Tapi kalak si la benar “jahat perbahanenna” sope ia mate. Ipekeke pagi kalak e guna ihakimi. Gelar kalak e lenga lit bas buku kegeluhen, janah ihakimi ntah pe ipereksa pagi perbahanen kalak e bas piga-piga waktu. Paksa si e, lit pagi kesempaten kalak e erlajar kerna Jahwe gelah gelar kalak e banci itulis bas buku kegeluhen.

Bas Ketangkasen 20:12, 13 ijelasken maka kerina kalak si ipekeke perlu pagi patuh man “kai si tertulis bas gulungen-gulungen [si nandangi ibuka].” Gulungen e eme undang-undang si mbaru si bereken Dibata pagi bas doni si mbaru. Kalak si la patuh man undang-undang e, ikernepken me pagi.​—Jes. 65:20.

Bas Daniel 12:2 inubuatken maka kalak si ipekeke pagi lit si “nggeluh rasa lalap,” lit ka si “ipermelaken ras ihina seh rasa lalap.” Ayat e ncakapken kerna uga pagi dungna kalak si ipekeke. Kenca dung Pemerentahen Seribu Tahun, lit pagi si nggeluh seh rasa lalap, lit ka si ikernepken seh rasa lalap.​—Ket. 20:15; 21:3, 4.

Kalak si ipekeke banci iumpamaken bagi kalak asing si tading atena bas sada negri. Gelah banci ia tading bas negri e, perlu lit visana, ntah pe ijinna. “Kalak si benar” bali bagi kalak asing si ndatken ijin guna erdahin ntah pe ijin tading bas sada negri. Dat kalak e ka piga-piga hak ras keuntungen si idat warga negara. Tapi, “kalak si la benar” bali bagi kalak asing si ndatken ijin pengunjung ntah pe ijin sementara. Kalak asing si ndatken ijin si bage perlu ngikutken undang-undang bas negri e gelah banci tetap tading i je. Bage ka pe kalak si la benar perlu ngikutken undang-undang Jahwe ras terus patuh gelah banci tetap tading bas Pardis. La soal ijin kai si tangtangna idat kerina kalak asing e, dungna lit si banci jadi warga negara ras lit si arus ndarat arah negri e. Si nentukenca eme perbahanen kalak e sedekah ia tading bas negri e. Bage ka pe, si nentuken kalak si ipekeke banci nggeluh rasa lalap ntah lang eme kesetian ras perbahanenna bas doni si mbaru.

Jahwe labo saja Dibata si perkuah, Ia pe Dibata si adil. (Ul. 32:4; Ms. 33:5) Perban kekelengenNa, pekekeNa pagi kalak si benar ras si la benar. Tapi, iarapkenNa gelah kerina kalak e patuh man patokenNa si meganjang. Kalak si engkelengi Jahwe ras si terus ngikutken patokenNa ngenca si banci tetap tading bas doni si mbaru.