Bi tame zu yen éyalane Kalate Zambe a ve minsili mite.

Kalate Mame minlôman 24:15 a jô na “ba be ne zôsô a ba be ne bikotekot” mbe ba ye wômô mesoñ. Ba be nga bo mvaé nge ke bezôsô be bôt, be ne ba be nga bo Yéhôva mewôk ôsusua na ba wu, a biyôlé biap bi ne ntilan kalate ya ényiñ. (Mal. 3:16) Ba be nga abé nge ki bikotekot bi bôt, be ne ba be nga bo teke bi fane ya yem Yéhôva, ajô te biyôlé biap bi nji bo ntilan kalate ya ényiñ.

Jean 5:28, 29 fe a kobô ajô minsamba mi bôte mibaé kalate Mam minlôman 24:15 a jôô mie. Yésus a jô na “ba be nga bo mvaé” ba ye “wômô a nyiñ, a ba be nga bo abé ba ye wômô a nyoñe mekua.” Bezôsô be bôte be nga bo mvaé ôsusua na ba wu. Ba ye wômô a nyiñ amu biyôlé biap bi ntontilan kalate ya ényiñ. Ve bikotekot bi bôte ki bi nga bo mam me ne abé ôsusua na ba wu. Ba ye wômô a nyoñe mekua, nge ki ntyi’ane mejô. Biyôlé biap bi ngenane teke tabe ntilan kalate ya ényiñ, a Yésus a miñwo’on ba ye nyoñ éyoñe ya fombô ntabane wop éyoñ bé bo be maneya ye’ele be mejô me Zambe. Éyoñ éte, ba ye bi fane ya yeme Yéhôva ndembene biyôlé biap bia ye tiliban kalate ya ényiñ.

Kalate Nlitan 20:12, 13 a jô na, bôte bese bé wômô mesoñ ba yiane tôñe “mam me ne ntilane bekalate bete été,” a ne mimfefé metiñe Yéhôva a ye ve bôt mfefé émo. Ba ba ye ke tôñe metiñe mete ba ye jañ.​—És. 65:20.

Daniel 12:2 a nga jô na bôt béziñe ya ba be maneya wu ba ye wômô “mfa’a ya ényiñe ya nnôm éto, a bevo’o mfa’a ya ôson a mbiasane ya nnôm éto.” Éfus éte ja kobô ajô ntyi’ane mejô wo su’ulan asu bôt ba ye wômô mesoñ​—bevok ba ye bi “ényiñe ya nnôm éto” nge ke “ôson a mbiasane ya nnôm éto” nge ke njañane ya nnôm éto. Ajô ete, memane ya 1000 mimbu, bôte béziñe ya ba be nga wômô ba ye bi ényiñe ya nnôm éto, bevo’o ki njañane ya nnôm éto.​—Nli. 20:15; 21:3, 4.

Bi tame nyoñ mone éve’an. Bi tame jô na minsamba mi bôte mibaé mii wômô mi ne ane bôte ba kômbô ke nyiñ si fe. Bezôsô be bôte be ne ane avale beyeñ da te bi avale visa da ve be fane ya tabe si éte ayap, a bu’uban abui mam mefe ya si éte. Bi ne ke ve’e bikotekot bi bôt a beyeñe ba te bi visa a ve be fane ya tabe si éte ve abi éyoñ éziñ. Beyeñe bete ba yiane bo mam méziñ asu na bijôé ya si éte bi kañese na be ke ôsu a nyiñe été. Avale te da da, bikotekot bi bôte bii wômô bia yiane tôñe metiñe me Yéhôva asu na bi ke ôsu a nyiñe paradis. To’o nneñ a te nyiine si éziñ a bili avale visa avé, bijôé ya si éte bi ne ngule ya ve nye fane ya ke ôsu a nyiñe si éte nge titane nye. Ntabane wop ñwô ô ne bo na be ba’ale be, nge titane be si éte. Avale te fe, mbunan a ntabane bôt ba ye wômô mesoñ ñwô wo ye ve be fane ya ke ôsu a tabe mfefé si nge momo.

Yéhôva a nji bo fo’o ve Zambe ya nye’an, a ne fe Zambe a ne zôsô. (Dt. 32:4; Bs. 33:5) Nye’ane wé ñwô wé tindi nye na a wômôlô bezôsô be bôt a bikotekot bi bôt. Ve a yi na bôte bese be tôñe memvinda mé me tii a mam me ne zôsô a ma me ne ékotekot. Fo’o ve bôte bé nye’e Yéhôva a tôñe memvinda mé mbe bé ke ôsu a nyiñe mfefé émo.