Ariha waméi óunabagülei le tíchugubei Bíbülia.

Ariñagati Adügaü 24:15 luagu Bungiu, ‘lásaaragüdübaña lan hilaaña, dandu ha buídubaña o richaguatiña kei ha wuribabaña o marichatiña’. Ha richaguabaña hagía gaganbadibaña lun Bungiu lubaragiñe hóunwegun, ligía bürüwañu liña lubéi hiri tidan líburu lánina ibagari (Mal. 3:16). Ha wuribabaña o marichatiña hagía ha machansinbaña lun hasubudiruni Heowá lubaragiñe hóunwegun, ligía ua lubéi hiri bürüwañu tidan líburu lánina ibagari.

Ayanuhati Huan 5:28, 29 hawagu bián hawuyeri gürigia hagiaméme ha uágubaña layanuhóua lidan Adügaü 24:15. Ariñagati Hesusu hawagu, “ha adügübalin le buídubei” háguyuguba lun habagaridun, ánhañati ha adügübalin le wuribabei, háguyuguba lun haguserawagüdün”. Ha richaguabaña adügatiña katei buiti lubaragiñe hóunwegun. Hásaaruba lun habagaridun ladüga anihagua hiri bürüwañu tidan líburu to lánina ibagari. Ánhañati ha wuribabaña o marichatiña adügatiña katei wuribati lubaragiñe hóunwegun. Hásaaruba lun haguserawagüdün. Úati hiri bürüwañu tidan líburu to lánina ibagari, ligía haguseragüdüwaba lubéi o mini lan le houchawaguba. Lídanme dan ligía, lichugúba chansi houn lun hasubudiruni Heowá luma lun labürüdǘniwa hiri tidan líburu lánina ibagari.

Afuranguagüdati Arufudúni 20:12, 13 sun lan ha lúnbaña háguyugu mosu lan gaganbadi hamá lun “le bürüwañubei tidan burí líburu”, mini lan le, iseri lúrudu le lunbei wibihini lidan iseri ubóu. Ha maganbadibaña lun lúrudu le hagünrinchawaguba (Isa. 65:20).

Ariñagati Danieli 12:2, (TNM) añahein lan hádangiñe ha arumugubaña lidan óunweni “hásaaruba lan lun habagaridun lun súnwandan, ha híbiri lun hǘnabudagüdüniwa luma lun mabahüdüniwa hamá lun sun dan”. Layanuhaña bérusu le, luagu le lunbei lasuseredun lárigiñe lagumuhóun óuchawaguni houn ha águyugubaña: “hibihuba ibagari magumuchaditi” o “mabahüdüni lun sun dan”. Ligíati lidan lagumuchagüle 1,000 irumu, añaheinbaña eresibirutiña ibagari magumuchaditi ha híbiri hagünrinchawaguba lun sun dan (Aruf. 20:15; 21:3, 4).

Ariha wamá aban hénpulu. Gayaraati lagoubaguagüdüniwa le gádanbaliña bián hawuyeri gürigia ha águyugubaña hamoun gürigia ha busenbaña hawinwandun lidan amu ageiraü. Ha richaguabaña ítara haña kei terenchana ha eresibirubaña aban bisa lánina wadagimanu o aban bisa lun hawinwandun lidan ageiraü ani adügati le lun garicha hamá lun hawinwandun lau darangilaü ñein. Ánhañati ha marichabaña ítara haña kei terenchana ha eresibirubaña aban bisa lánina asariahani o aban bisa lun herederun lidan ageiraü luagu fiuraü dan. Lun higirún gürigia ha lun hawinwandun lidan ítaga ageiraü, mosu hagunfulirun lau le lamuriahabei ageiraü ligía hámagiñe. Ítarameme, lun gayara lan herederun ha marichabaña lidan Paraísu mosu gaganbadi hamá lun lilurudun Heowá ani arufuda hameime richagua hamá. Meberesenga ka lan tuwuyeri bisa heresibiruboun terencha ha achülürübaña lidoun ageiraü, lau lásügürün dan fiu hádangiñe gayaraati habihin gárada lun ñeinna hamá, ánhañati ha híbiri gayaraati habugún lídangiñe ageiraü. Hagaburiba arufudei anhein herederuba lubéi o meredebaña lan lidan ageiraü. Ítarameme luba lasuseredun houn sun ha lúnbaña háguyugun hafiñeba arufudei anhein herederuba lubéi lidan iseri ubóu o meredebaña lan.

Mama gudemeharügüti Heowá, aban giñe Bungiu richati ani úaraguati (2 Lur. 32:4; Sal. 33:5). Larufudubei línsiñehabu lau láguyuguagüdüniña dandu ha richaguabaña kei ha marichabaña, lau sun lira agurabati inebe lan liñun lilurudun houn súngubei luagu le buídubei luma le wuribabei. Hárügübaña hínsiñehabubaña lun ani gaganbadi hagíame lun hagíarügübaña eredera lidan iseri ubóu.