Tqatzʼetaʼ ri ruqʼalajsaxik nuyaʼ le Biblia.

Hechos 24:15 nuʼij chë «xkekʼastäj na pä ri kamnaqiʼ ri xkikʼwaj jun jïk kʼaslemal chqä ri ma xkikʼwaj ta jun jïk kʼaslemal». Ri winäq ri xkikʼwaj jun jïk kʼaslemal ya riʼ ri xkinmaj rutzij Dios taq majanä kekäm, rma riʼ tzʼibʼatäl kibʼiʼ chpan ri wuj rchë ri kʼaslemal (Mal. 3:16). Chpan ri moloj winäq ri ma xkikʼwaj ta jun jïk kʼaslemal ye kʼo ri ma xekowin ta xkitamaj ruwäch Jehová taq majanä kekäm, rma riʼ ma tzʼibʼatäl ta kibʼiʼ chpan ri wuj rchë ri kʼaslemal.

Juan 5:28, 29 ntzjon chqä chkij ri kaʼiʼ molaj ri yetzjöx chpan Hechos 24:15. Jesús xuʼij chë «ri xkiʼän utziläj taq bʼanobʼäl, xkekʼasöx pä rchë xtkïl kʼaslemal» y «ri xkiʼän itzel taq bʼanobʼäl, xkekʼasöx pä rchë xtqʼat tzij pa kiwiʼ». Ri winäq ri xkikʼwaj jun jïk kʼaslemal xekiʼän utziläj taq bʼanobʼäl taq majanä kekäm. Ryeʼ xkekʼasöx pä rchë xtkïl kʼaslemal rma kibʼiʼ kʼa tzʼibʼatäl na chpan ri wuj rchë ri kʼaslemal. Ye kʼa ri winäq ri ma xkikʼwaj ta jun jïk kʼaslemal xekiʼän itzel taq bʼanobʼäl taq majanä kekäm. Ryeʼ xkekʼasöx pä rchë xtqʼat tzij pa kiwiʼ, rma kibʼiʼ ma tzʼibʼatäl ta na chpan ri wuj rchë ri kʼaslemal. Rma riʼ xtyaʼöx jun tiempo chkë rchë xttzʼet we taqäl chkij nkïl kʼaslemal o manä. Chpan ri tiempo riʼ, xtkʼut chrij Jehová chkiwäch chqä xttzʼet we taqäl chkij ntzʼibʼäx kibʼiʼ chpan ri wuj rchë ri kʼaslemal.

Apocalipsis 20:12, 13 nuʼij chë jontir ri xkekʼasöx pä kʼo chë nkismajij «ri tzʼibʼatäl chkipan ri rollos», ntel chë tzij, ri kʼakʼakʼ pixaʼ xkeruyaʼ Jehová chwäch ri kʼakʼakʼ Ruwachʼlew. Ri ma xtkinmaj ta tzij xtchup kiwäch (Is. 65:20).

Daniel 12:2 nuʼij chë jojun ri ye kamnäq äl xkekʼasöx pä «rchë nkïl ri kʼaslemal ri majun bʼëy xtkʼis ta y jojun chik rchë ntzaq kikʼïx chqä rchë kan jurayil yetzeläx äl». Re versículo reʼ nukʼüt achkë xtbʼanatäj pa rukʼisbʼäl kikʼë ri xkekʼasöx pä. Taq xtbʼekʼis ri 1,000 junaʼ, jojun xtkïl ri kʼaslemal ri majun bʼëy xtkʼis ta, ye kʼa jojun chik jurayil xtchup kiwäch (Apoc. 20:15; 21:3, 4).

Ri xtbʼanatäj kikʼë ri kaʼiʼ molaj winäq ri xkekʼasöx pä ütz nqajnamaj rkʼë ri nbʼanatäj kikʼë jojun winäq ri nkajoʼ yejeʼ jukʼan chik tinamït. Ri jïk kikʼaslemal yë achiʼel ri winäq ri nyaʼöx kiwuj rchë ütz yejeʼ chqä ütz yesamäj chpan ri tinamït riʼ. Rma riʼ, ri qʼatbʼäl tzij kʼo jojun ri nuyaʼ qʼij chkë rchë nkiʼän. Ye kʼa, ri ma xkikʼwaj ta jun jïk kʼaslemal yë achiʼel ri winäq ri nyaʼöx kiwuj xa xuʼ rchë yebʼekʼastan o rchë xa jun tiempo yejeʼ qa chpan ri tinamït. Rchë nyaʼöx qʼij chkë rchë jurayil yejeʼ qa chpan ri tinamït riʼ, nkʼatzin nkiʼän ri nukʼutuj ri qʼatbʼäl tzij chkë. Ke riʼ chqä xtbʼanatäj chwäch ri kʼakʼakʼ Ruwachʼlew. We ri winäq ri ma xkikʼwaj ta jun jïk kʼaslemal nkajoʼ yejeʼ qa chwäch ri Kotzʼijaläj Ilew, kʼo chë nkismajij ri rupixaʼ Jehová chqä nkikʼwaj jun jïk kʼaslemal. Y, xa bʼa achkë kiwuj nyaʼöx ri winäq ri yeʼapon jukʼan chik tinamït, taq nqʼax ri tiempo, ye kʼo jojun nyaʼöx qʼij chkë rchë yeʼok ruwinaq ri tinamït riʼ, ye kʼa jojun chik yetzolïx äl pa kitinamit. Yë ri kinaʼoj xtkiʼän xtbʼanö chë xkejeʼ qa o xkesäx äl. Ke riʼ chqä xtbʼanatäj kikʼë ri xkekʼasöx pä, yë ri kinaʼoj xtkiʼän chwäch ri kʼakʼakʼ Ruwachʼlew ri xtbʼanö chë xkeyaʼöx qa o xtchup kiwäch.

Tapeʼ Jehová kan nupoqonaj kiwäch ri winäq, ryä chqä kan pa rubʼeyal nuʼän che rä jontir (Deut. 32:4; Sal. 33:5). Ryä xtkʼüt chë yerajoʼ ri winäq taq xkerukʼasoj pä ri xkikʼwaj jun jïk kʼaslemal chqä ri ma xkikʼwaj ta ri kʼaslemal riʼ. Ye kʼa xtyoʼej chqä chë ri winäq ri xkekʼasöx pä nkismajij ri pixaʼ yeruyaʼon pä chqë chrij ri achkë riʼ ri ütz chqä ri ma ütz ta. Xa xuʼ ri xkejowan rchë chqä xtkismajij rupixaʼ, xkekʼaseʼ qa chwäch ri kʼakʼakʼ Ruwachʼlew.