Hang ṙô ngam Paipöl nö kētö sanapṙô ngih intöönö.

Vë-eny nang hī an ngam Inlahen 24:15 tö ngam “invanlö tökapah min [yip] tölöök, tötlöök inrē.” Tölöök tarik ngöṙô in tö yip samöl kinpaha re nö löklōn Yāvē, hēk yip tö kūichi minë-eny inrē nö imat ngam līpöre nômö. (Mal. 3:16) Ngaich tötlöök tarik ngöṙô ayī-ö tö cha, yip töt teūngen tö ṙētak re nö mikahtökūöre tö Yāvē ngaich nöng kapah, öt kūichi inrē minë minë-eny cha nö imat ngam līpöre nômö.

Cha-a yin inrē tö vënyu inlahen nö im Yôhan 5:28, 29. Ngam tö ngöṙô, “Yip tölöökö la-en ngaich im invanlö nômö; yip tötlöökö la-en pöri, im invanlö kinṙôka.” Vai nup la-en yip tölöök tarik urēhěkūö cha nö kapah. Lökten nö kūichiyö minë minë-eny cha nö imat ngam līpöre nômö. Teūngen inrē min cha-a tö nômöre yěn hachohlöng nö ṙā-ang i tökapah. Ötlöngö la-en pöri yip tötlöök tarik lökten nö öt kūichi minë minë-eny cha nö imat ngam līpöre nômö. Ngaich yěn hachohlöng min cha-a, ngaich kahòkkaṙen. Hē e min cha-a nö kētu ṙētak nö haköp inlahen Yāvē. Ngaich yěn halööktit re min cha-a ngaich kūichhötvö min nup minë-eny cha nö imat ngam līpöre nômö.

Ngöṙô an ngam Inmeukhömat 20: 12, 13, nö vë-eny inlahen yip tarik tö hachohlöng min, tö cha nö hòṅ ṙòkhöre nö hang minë chööngö “tökūichi nö imat nup līpöre” tö ngö manah angū-ö tö cha nö hòṅ hang nup chööngö min kahëtö Yāvē nö ikūö öp tövai panam. Yip töt hamāngö u min, ha-etiyö min cha-a.—Isa. 65:20.

Eūkö inlahen yip tökapah an ngam līpöre Tanīěl 12:2 nö ngö ṙô, “Maṙôngö yip mahaṙòh nö el pitung ngam tumlat nö aṅhen min, rīkre inrē lamöö i sinrōngkūö i minṙēngö inrē tötchanuhuvṙen.” Vamënyö inlahen yip tarik ön ngih miröökö, yip tö hachohlöng min unôichrit öp tö 1,000 samyeūheu. Ōt min yip tö teūngen tö ngam nômö “tötchanuhuvṙen” hēk ōt min yip tö teūngen tö ngam minṙēngö “tötchanuhuvṙen” tö ngö manah angū-ö tö cha min nö ha-etiyö.—Inm. 20:15; 21:3, 4.

Töi ngëichkö ngih töhěng inchō elmat. Mihôiṅ in öi asīntö inlahen yip tarik tö hachohlöng nö ikūö öp tufömngöre panam, öi in yip tarik tö hòṅ chuh tahëng panam nö iyöng. Ngaich hòṅ lēn cha-a tö nup visa re yěn hòṅ iyöng kūö öp chahuhure panam. Ōt yip tarik tö teūngen tö visa re nö iyöng, mihôiṅ inrē nö teūngen tö kinmānöre. Löktö in ngam visa re cha-a nö mihôiṅ nö kēken nup kuilōnre la-en nö öt kanihnguṙen, mihôiṅ inrē nö iyöng nö umuh. Ngatī yip tölöök tarik töhachohlöng nö ikūö öp tufömngöre panam min. Ōt pöri yip tarik tö teūngen tö nup visa re nöng ngamëichkö panam nö havöt. Yēḵ cha pöri nö hòṅ marò-òten nö ikūö öp panam, ngaich hòṅ hang nup chööngö cha-a kinë-ekūöre tö yip mahayöngken ngam panam. Ngatī yip tötlöök tarik töhachohlöng nö ikūö öp tufömngöre panam min. Hòṅ hang nup chööngö Yāvē min cha-a yěn hòṅ köp nö iyöngkūö öp tufömngöre panam, hòṅ halööktitre tö nup tövaich kahëkenre. Pòrô pöri öp tarik nö teūngen tö visa re nö iyöngkūö öp panam nö marò-òten hēk töng rahëichtaṙen, yēḵ ò pöri nö öt hang chööngö yip aṅkūö ngam panam, ngaich mihôiṅ min anga-aṅ nö ha-ōnyu. Yēḵ ò pöri nö hang chööngö ngaich mihôiṅ min anga-aṅ nö kaheūkö nö aṅkūö ngam panam. Ngatī inlahen min nö ngëichka minë tinrīken yip tö hachohlöng tarik hēk ngam inlahen cha inrē yěn ṙātö-ellōnre nö in Yāvē. In e min ngam inlahen cha yěn halöngtuṙen nö aṅ hēk yěn kē-ěyö inrē nö ṙā-ang ikūö ngih panam.

Töhangenlōn an ngam Tēv Yāvē tö tarik. Lökten ò min nö hachohlö yip tölöök tarik nö holre tö yip tö öl nö akahakūö tö ò. Tö chīpö tī pöri anga-aṅ nö akah fālen, lökten pòrô anga-aṅ nö tö hangenlōn, höng cha-a min tö halöngtuṙen nö aṅ nö ikūö ngih panam, yip töhangenlōn tö ò hamang nup chööngö ò inrē.—Chöö. 32:4; Sal. 33:5