Hi wone a ti Bhiblia yi ti wombako ngu txiwotiso txonetxo.

Mithumo 24:15 yi hi gela ti to ‘‘vo lulama ni va kwambi lulama va na wuka ka vakufa.” A va vo lulama ngu va vanga fa va di thembekile ka Txizimu, se matina awe ma bhatwe ka dibhuku da wutomi. (Mal. 3:16) Kambe a va va kwa mbi lulama kupateka ava va nga fa va sa mana mkhanjo wo ve gonda ngu Jehovha, se matina awe kha ma bhalwa ka dibhuku da wutomi.

Johani 5:28, 29 yi womba-womba ngu mitxawa ya yimbidi ayi yi nga wombwa ka Mithumo 24:15. Jesu a womba ti to “ava va nga maha tatinene, va na wukela kuya kuhanyani ko mbi guma; ani ava va nga maha to biha, va na wukela kuya kusungwani,” ti wombako kuya kulamulwani. A va vo lulama ngu va va nga maha tatinene na va si se fa. Vona va na wukela kuhanyani, nguko matina awe se ma bhatwe ka dibhuku da wutomi. Kambe ava vo mbi lulama ngu va va nga maha to biha va si se fa. Vona va na wukela kulamulwani, nguko matina awe ma na va ma si se bhalwa ka dibhuku da wutomi. Se va na va ni mbimo yo lamulwa i ku kuwonelelwa kasi kuwona to ina va na maha tatinene mwendo ahim-him. Ngu mbimo yoneyo vona va na va na ta gonda ngu Jehovha kasi kumana mkhanjo wo matina awe me bhalwa ka dibhuku da wutomi.

Mtuletelo 20:12, 13 yi txhamusela ti to votshe ava va no wuswa ti na lava va ta engisa ati “ti nga bhalwa mabhukuni” ti wombako ti to ve ta engisa milayo ya yiphya ayi yi no ta vekwa ka mafu a maphya. Ava va no mbi engisa milayo yoneyo va na loviswa.—Isaya 65:20.

Dhaniyeli 12:2 yi profetile ti to ava va nga otela kufani “va na wuka ve yiswa ka wutomi wo mbi guma; kasi vamwani va na yiswa kueyiswani ni tinganani to mbi guma.” Ndimana yiya yi womba-womba ngu ti ti no maheka ngu va va no wuswa. Vamwani va na yiswa ‘‘ka wutomi wo mbi guma” ni ku vamwani va na yiswa ‘‘kueyiswani ni tinganani to mbi guma.” Se ngu magwito ka 1.000 wa malembe, vamwani va na amukela wutomi wo mbi guma ani ku vamwani va na loviswa da magwito.—Mtu. 20:15; 21:3, 4.

Alakanyisisa ngu txikombiso txiya. Txiemo txa mitxawa yi ya yimbidi a yi yi no wuswa yi nga fananiswa ni mmwuyi awu a lavako kuya hanya ka ditiko dimwani. A va vo lulama va fananiswa ni va vawuyi vale va ningwako visa ya ti to ve zumba ngu mbimo yo lapha ve aka ka ditiko donedo ni kutshumela ve va ni mkhululeko. Kambe a va vo mbi lulama va fananiswa ni va vawuyi ava va ningwako visa ya mbimo yo koma. Se vawuyi vonevo va mbimo yo koma va fanete ku ve hanya ngu nzila yo kombisa ti to va xonipha milayo ya ditiko donedo va hanyako ka dona. Ngu ha fanako, ava vo mbi lulama va no wuswa, ti na lava ve ta tumela milayo ya Jehovha ni ku ve hanya ngu nzila yo lulama kasi ku ve simama ve hanya Paradhiseni. Ti si nga ni mhaka ni ti to va vawuyi vonevo va ni visa muni mbimo yi va belako ka ditiko do kari, vamwani ti nga maha ve tumelelwa kuhanya ka ditiko donedo ni ku vamwani va nga hingwa. Kasi ku ve simama mwendo nem ti na ya ngu ti va no ya hanyisa tona ka ditiko donedo da diphya. Ti ngu ha kufanako, ava va no wuswa ni vona ti na ya ngu ti to vona va kombisa likholo ni ku mahanyelo awe ma na va o txani ka mafu a maphya, i di kona va no tumelelwa kuhanya ngu ha ku si gumiko.

Jehovha txi Txizimu txa wuxinji ni wululami ni ku ene kha kalaveli m’thu. (Dhewut. 32:4; Mas. 33:5) Ene a na kombisa lirando lakwe ngu kuwusa vo lulama kumweko ni va va kwa mbi lulama. Hambi keto ene a lava ti to votshe vathu ve hanya ngu milayo yakwe yo guleka. Kambe ngu va va mrandako dwe ni va va no hanya ngu milayo yakwe va no tumelelwa ku kusimama ve hanya Paradhiseni ha mafuni.