Ikkeei met ewe Paipel a pélúwen ngeni ekkena kapas eis.

Föför 24:15, Testament mi Fö a erá pwe “epwe fis ewe manausefal ren ekkewe mi pung pwal ekkewe rese pung.” Ekkewe mi pwúng, iir kewe ra álleasochisi Kot me mwen ar máló, ina popun a mak iter lón ewe puken iten chón manaw. (Mal. 3:16) Ekkewe rese pwúng iir kewe ra máló nge ese naf ewe fansoun are ese fen suuk ngeniir ar repwe silei usun Jiowa, ina popun ese mak iter lón ewe puken iten chón manaw.

Johannes 5:28, 29 a fós usun pwal ekkena ruu kúmiin aramas Föför 24:15 a fós usur. Jesus a erá: “Chokewe mi föri föför mürina repwe manausefäl o küna manau, nge chokewe mi föri föför mi ngau repwe manausefäl o küna apwüng.” Ekkewe mi pwúng, iir mi fen féri féffér múrinné mwen ar máló, repwe manawsefál o kúna manaw pokiten mi chúen mak iter lón ewe puken iten chón manaw. Iwe nge, ekkewe rese pwúng iir mi fen féri féffér mi ngaw me mwen ar máló, repwe manawsefál o kúna kapwúng. Iter esaamwo mak lón ewe puken iten chón manaw, me repwe etittin ren och fansoun. Lón ena atun, epwe suuk ngeniir ar repwe káé usun Jiowa, me epwe pwal suuk ngeniir pwe iter epwe mak lón ewe puken iten chón manaw.

Pwärätä 20:12, 13 a áweweei pwe a lamot ngeni meinisin chón manawsefál ar repwe álleasochisi minne a “makketiu lon ekewe puk,” weween ekkewe mineféén allúk repwe fférútá lón ewe ótót séfé. Chókkewe rese álleasochis repwe ninniiló.​—Ais. 65:20.

Taniel 12:2 a oesini pwe chómmóng lein chókkewe mi máló repwe manawsefál, “ekoch repwe eäni manau esemüch, nge ekoch repwe eäni itengau me säw esemüch.” Ei wokisin a fós usun met epwe fis ngeni ekkewe chón manawsefál atun ewe sáingoon kapwúng, iir mi tongeni eáni manaw esemuch are eáni itengaw me sáw esemuch. Ina minne, wesilóón ekkewe engeréú ier, ekkóch repwe kúna manaw esemuch, nge ekkóch repwe máffóch.​—Pwär. 20:15; 21:3, 4.

Ekieki mwo ei kapas áwewe. Ekkeei ruu kúmiin chón manawsefál ra usun chék chón ekis iir mi mochen nónnóm lón eú fénú. Ewe kúmiin chón pwúng ra usun chék ekkewe chón ekis mi fen mumu ngeniir ar repwe nónnóm lón ena fénú me kút ar angang ie. Nge, ewe kúmiin aramas mi ngaw ra usun chón ekis mi mumu ngeniir ar repwe nóm lón ena fénú nge temporary chék. A lamot ngeniir ar repwe pwári pwe iir aramas mi múrinné ren ar repwe tongeni nómoffóch lón ena fénú. Pwal ina chék usun, a lamot ekkewe aramas mi ngaw iir mi manawsefál repwe álleasochisi án Jiowa kewe allúk me pwári pwe iir aramas mi pwúng ren ar repwe tongeni nómoffóch lón ewe Paratis. Lón ena kapas áwewe, ese lifilifil ika ekkena chón ekis a mumu ngeniir ar repwe nónnóm lón ena fénú are temporary chék, nge ló, ló, ló, eli ekkóch me leir ra tongeni wiliti chón wiliposun ena fénú, are ekkóch eli repwe deport. Minne epwe fis ngeniir a lóngólóng wóón féfférúr lón ena fénú. Pwal ina chék usun, met epwe fis ngeni meinisin chón manawsefál a lóngólóng wóón ar tuppwél ngeni Kot me ar féffér lón ewe ótót séfé.

Jiowa i emén Kot mi tong, me pwal i emén Kot mi pwúngiéch. (Tut. 32:4; Kölf. 33:5) Epwe pwári an tong ren an amanawasefáli ekkewe chón pwúng me ekkewe aramas mi ngaw. Nge a pwal mochen ar repwe álleasochisi an kewe allúk usun minne mi pwúng me minne mi mwáál. Chókkewe chék mi tongei me álleasochisi an kewe allúk repwe ketiw le manawffóch lón ewe ótót séfé.