Koona mukalelo onakula Bibilia mavuzo aba.

Merelo 24:15 ononaddela wi onele okalawo ‘ovenyihiwa mukwani wa aligani na ahiligani.’ Aligani anaddiwana abale amwiwelele Mulugu ahinatti okwa, dhahene mazina awa ahilebiwa munivuruni na egumi. (Mal. 3:16) Ahiligani anotaganyiheya na abale akwile ahinatti okana gari ya osunza mwaha wa Yehova, dhahene mazina awa kalebiwe munivuruni na egumi.

Joau 5:28, 29 onologa makuru omeli anlogiwa va Merelo 24:15. Yezu ohiloga wi “abale erile dhapama” anele “ovenya mukwani wi akalewovi; abale erile dhabure, anere ovenyela okoniwa.” Aligani erile dhapama ahinatti okwa, anele ovenyihiwa mukwani wi akele egumi sabwani mazina awa ahilebiwa munivuruni na egumi. Oku, ahiligani erile dhabure ahinatti okwa, awene anele ovenyihiwa mukwani wila attongiwe. Mazina awa kalebiwe munivuruni na egumi, vina agavenyihiwa mukwani anele ovahiwa mudhidhi wila attongiwe obe ehiwe. Mwari mwa mudhidhi obuwene, awene anele okana gari ya osunza mwaha wa Yehova vina mazina awa anele olebiwa munivuruni na egumi.

Ovuhulela 20:12, 13 onotapulela wi otene anavenyihiwe enele ofuneya wiwelela ‘dhilebiwe muroluni,’ kuloga, malamulo maswa aneddiwena mwilaboni eswa. Abale ahinewelele malamulo abo anele otolotxiwa.—Iza. 65:20.

Daniyel 12:2 wahibaza ologa wi ena mwa abale ongona mukwani anele ‘ovenyihedhiwa egumi yohimala oku ena anele ovenyihedhiwa okoneya na manyazo ohimala.’ Versu eji enloga mwaha wa ejile enapadduwe omagomo wa ovenyihiwa mukwani—‘egumi yohimala’ obe “manyazo ohimala.” Dhahene omagomo wa vyaka 1.000, ena anele wakela egumi yohimala; oku ena anele otolotxiwa namukalakala.—Ovuh. 20:15; 21:3, 4.

Ndoweni none yoladdaniha eji. Enapadduwele makuru omele anavenyihiwe mukwani enoladdanihiwa na anawedda anfuna okala elabo yina. Aligani anoladdanihiwa na anawedda abale anvahiwa visto ya mabasa obe visto yokala mwilabonimwa vina ankaana mwana ofuru mung’onovi. Mwa mpaddi mwina, ahiligani anoladdanihiwa na anawedda anvahiwa visto ya mudhidhi mung’onovi obe visto ya okala aleddo. Makuru aba omeli onofwanyela wiwelela malamulo aneddiwana mwilabonimwa mpo wi onihe wi anofuna okalagavi mwenemo. Nekalelo yakakene, ahiligani anavenyihiwe anofwanyela wiwelela magano a Yehova vina woniha wi anofuna okalavi Mparaizu. Kintanala visto gani onamwakelani vamaromo anawedda abo ali elabo yina, ena anele orumelihiwa okalaga mwilabonimwa ena kanarumelihiwe. Omagomelo wawa onewanane na mweddelo weddilanina elabo ejo eswa. Ottongiwa womariha onewanane na ororomeleya wa muttuya vina mweddelo onakaaniye mwilaboni eswa.

Yehova kahiyo bahi Mulugu wa ttagaraga vina Mulugu woligana. (Obud. 32:4; Masal. 33:5) Iyene onela woniha okwela mwa wavenyiha aligani na ahiligani. Mwa mudhidhi wakakene iyene onele ofuna wi attu ewelelege magano aye anttiyaniha yapama na yabure. Abale anakalewo mowiwanana na magano abo banakale mwilaboni eswa.