Mah biahalnak he aa tlaiin Baibal nih zeitindah a chim ti kha zohhmanh.

Lamkaltu 24:15 nih “minung hi miṭha he, miṭhalo he thihnak in kan tho ṭhan dih lai” tiah a ti. Miṭha timi cu an thih hlanah Pathian nawl a ngaimi kha an si i nunnak cauk chungah an min khumh a si. (Mal. 3:16) Miṭhalo timi cu an thih hlanah Jehovah kong cawn awkah caanṭha a za in a hmu lomi kha an si i nunnak cauk chungah an min khumh a si lo.

Johan 5:28, 29 nih Lamkaltu 24:15 ah langhtermi phu pahnih kong kha a cherhchan. Jesuh nih “ṭhatnak a tuahmi kha an tho lai i an nung lai,” cun “ṭhatlonak a tuahmi kha an tho ve lai i sualphawt an si lai” tiah a ti. Miṭha mi nih an thih hlanah ṭhatnak an rak tuah. Annih cu nunnak cauk ah an min ṭial a si caah nunnak hmuh awkah an tho ṭhan lai. Asinain miṭhalo mi nih cun an thih hlanah ṭhatlonak an rak tuah. Annih cu biaceih awkah an tho ṭhan lai. Nunnak cauk ah an min ṭial a si rih lo i biaceih awk asiloah hneksak awkah caan pek an si lai. Mah caan chungah Jehovah kong cawnnak caanṭha le nunnak cauk ah an min ṭial a si nakhnga caanṭha an hmu lai.

Biathlam 20:12, 13 ah a tho ṭhanmi vialte nih “cauk chung i aa ṭial ning khan” an zulh a hau tiah a fianter, mah cu Pathian nih vawlei thar ah a kan pek dingmi nawlbia thar kha a si. Nawl a ngai lomi hna cu hrawh an si lai.—Isa. 65:20.

Daniel 12:2 nih thihnak ah aa hngilhmi cheukhat cu “zungzal nunnak chungah an hun i hlau lai i a cheu cu zungzal huatnak le ningzahnak chungah an hun i hlau lai” tiah a chimchung. Mah cacaang nih a tho ṭhanmi hna i hmanung bik biaceihnak—“zungzal nunnak” asiloah “zungzal huatnak” kong kha a chim. Cucaah kum 1,000 a dih tikah a cheu cu zungzal nunnak an hmu lai i a dang cu zungzal ca in hrawh an si lai.—Biat. 20:15; 21:3, 4.

Tahchunhnak pakhat hi ruathmanh. A tho ṭhanmi mah phuhnih i an sining cu ram pakhat ah um a duhmi ramdang mi hna he tahchunh khawh a si. Miṭha mi cu caan caankhat chung cohlanmi le zalonnak pek a simi, rianṭuannak visa asiloah umnak nawl visa pek a simi bantuk an si. Mah he i ralkah in miṭhalo pawl cu chikkhat umnak visa asiloah khualtlawnnak visa pek a simi, ramdang mi bantuk an si. Cu bantuk ramdang mi hna nih an umnak ram thar ah um behnak nawl an ngeih nakhnga an i zuam a hau. Cu bantukin a tho ṭhanmi miṭhalo pawl nih Jehovah nawlbia kha an cohlan a hau lai i Paradis ah um behnak nawl an hmuh nakhnga miṭha an si kha an langhter a hau lai. Ramdang mi hna nih ram pakhat i umnak caah a hmasa ah zei bantuk visa a ngeimi an si hmanhah a donghnak ah a cheu cu ram mi sinak an hmu i a cheu tu cu ṭhawl an si men lai. A phichuak cu ram thar cung i an lungput le an tuahsernak cungah aa hngatmi a si. Cu bantukin a tho ṭhanmi vialte caah hmanung bik biakhiahnak cu vawlei thar ah zumhfek tein an umnak le an tuahsernak cungah aa hngat ve lai.

Jehovah cu dawtnak a ngeimi Pathian lawng si loin a dingmi le a dikmi Pathian zong a si. (Deut. 32:4; Salm 33:5) Miṭha he, miṭhalo he a thawhter hnanak thawngin a dawtnak kha a langhter lai. Asinain ziazalei he aa tlaiin a sangmi a phunglam kha aa tlaih lai. Amah a hun daw i a phunglam ningin a nungmi hna lawng vawlei thar ah zungzal nunnak nawl a awnh hna lai.