Akʉdaya Daizeze Bedʼeaba sãwũã panʉbʉta.

Hechos 24:15ba jarabʉ «jẽda piradrʉbiyi, bia obeta akʉza bia ẽã obeta». Yi bia oberabara ãyi bei nãã Daizezeba zokʼabʉta opanasi, maʉ̃ba ãyi trʉ̃ra bebʉ librode edabʉ (Mal. 3:16). Yi bia ẽã oberabara Daizezeta ũdukʼawua ẽ basi ãyi bei nãã, maʉ̃ba ãyi trʉ̃ra bebʉ librode edabʉ ẽ.

Juan 5:28, 29 akʉza Hechos 24:15dera iyabaʉ ẽbẽrarã ʉ̃rʉ bedʼeabʉ. Jesubara jarasi «yi nebia odara» piradrʉita «ewari jõmaʉ̃nẽ bʼaita, yi nemitia odapeadara jẽda piradrʉyi ãyi kʼawua odaita». Yi nebia odara nekʼãrẽ biata osida ãyi bei nãã. Mawũẽra ãyira jẽda piradrʉyi ewari jõmaʉ̃nẽ bʼaita, ãyi trʉ̃ra bebʉ librode edabʉ baera. Mamina yi nemitia odara ãyi bei nãã nekayiruata osi baera, ãyira jẽda piradrʉyi kʼawua odaita. Ãyi trʉ̃ra bebʉ librode edabʉ ẽ baera, ewarita diadayi ãya ũdubimarẽã kʼẽrẽpabʉ kʼawuaita. Maʉ̃ena ãyira zarea oibara Jeowa ũdukʼawuaita mawũã ãyi trʉ̃ bebʉ librode eda bamarẽã.

Apocalipsis 20:12, 13ba jara ũrĩbibʉ yi jõma jẽda piradrʉbʉrʉbara ũrĩbarata karta yiwidide eda jarabʉta, naʉ̃ra ley yiwidibayi ẽjũã biade, yi maʉ̃ba zokʼabʉta ũrĩ ẽãra beiyi (Is. 65:20).

Daniel 12:2ba jarabʉ ʉ̃kʉrʉra piradrʉita «ewari jõmaʉ̃nẽ bʼaita adewara [ʉ̃kʉrʉta] ãyi so perabidaita akʉza ewari jõmaʉ̃nẽ jʉradaita». Naʉ̃ bersikulobara jarabʉ jẽda piradrʉda tẽã kʼãrẽ berabarita: «ewari jõmaʉ̃nẽ bʼaita» mawũã ẽ bʉrʉ «ewari jõmaʉ̃nẽ jʉradaita». Mawũã 1.000 poaga berabarida tẽã ʉ̃kʉrʉra jẽda piradrʉyi ewari jõmaʉ̃nẽ bʼaita akʉza ʉ̃kʉrʉta jipa beiyi (Apoc. 20:15; 21:3, 4).

Jẽda piradʉira kĩrã ũmebʉ. Krĩchaseapanʉ ẽbẽrarã drʉa jãpe wãkĩrãbʉta mama bʼaita. Mamina ãyi mama bʼaira nokʼobʉrʉ kʼawua jarayi ewari bio diaita mama bamarẽã akʉza traja bamarẽã, mawũã ẽ bʉrʉ ewari wiña diaita ʉ̃kʉrʉ ẽbẽrarã mama pasia bamarẽã. Mawũẽra yi mama bakĩrãpanʉba akʉza trajakĩrãpanʉba adewara yi bari pasiapanʉba ũrĩnaibara mamabema nokʼoba jarabʉta, ãyita maʉ̃ drʉade jipa bakĩrãpanʉbʉrʉ. Maʉ̃ kĩrãkʼa bia ẽã oberata Ẽjũã biade bakĩrãpanʉbʉrʉ ũrĩbara Jeowaba jarabʉta, mawũã ũdubita ãyira bia obeta. Yi jẽda piradrʉdata ewari jõmaʉ̃nẽ bakĩrãbʉbʉrʉ ũdubibara ĩjãbʉta akʉza ãya obʉdeba ũdubibara wãrĩnu bakĩrãbʉta.

Jeowabara so zʉbʉria akʉbʉ akʉza aripe obʉ (Deut. 32:4; Sal. 33:5). Jeowabara iyi kãgata ũdubiyi jẽda piradrʉbibʉrʉde yi bia obeta akʉza yi bia obe ẽãta, mamina iyara jʉ̃ãbʉ maʉ̃ra ẽbẽrarãbara ũrĩnamarẽã iya zokʼabʉta. Yi ẽbẽrarã Jeowa kãgabʉtrʉ akʉza iya zokʼabʉta ũrĩbʉtrʉ ewari jõmaʉ̃nẽ bayi.