Hane hi la hna qaja hnei Tusi Hmitrötr:

Itre Huliwa 24:15 a qaja ka hape, troa “amelene hmaca la itre atre ka meköt, me ka tha meköti kö.” Ame la itre atr ka meköt, ke kolo itre ka drengethenge Akötresie, nge hetre ëje i angatre hë ngöne la tusi ne mel. (Mal. 3:16) Ame la itre ka tha meköti kö ke, kolo itre ka thatre Iehova, nge pëkö ëje i angatr ngöne la tusi ne mel.

Ioane 5:28, 29 a qaja mina fe la lue gurupe cili ka ej ngöne Itre Huliwa 24:15. Öni Iesu: “Troa amelene hmaca la itre ka kuca la loi kowe la mel, me itre ka kuca la ngazo kowe la iameköti.” Ame la itre atr ka meköt, hnei angatr hna kuca la loi qëmekene tro angatr a mec. Celë hi matre, tro kö a amele angatr hmaca, pine laka, hetre ëje i angatr e hnine la tusi ne mel. Ame la itre atr ka kuca la ngazo qëmeken tro angatr a mec, iameköti la edrö i angatr, pine laka, pë palakö ëje i angatr hnine la tusi ne mel. Eloine pe, hna nue la ketre hnepe ijine koi angatr troa atre Akötresie, matre tro fe a sija la ëje i angatr e hnine la tusi ne mel.

Hna Amaman 20:12, 13 a qaja mina fe ka hape, loi e tro asë hi la itre hna amelene hmaca, a trongëne la itre hna “cinyihane ngöne la itre itus hna ewath.” Kolo hi lo itre wathebo ka hnyipixe thatraqane la mele ngöne la fene ka hnyipixe. Ame pë hë la itre ka tha idrei, troa apatrene palua angatr.​—Is. 65:20.

Daniela 12:2 a qaja ka hape, tro la itre xaa ka hlë qa hna mec a kapa “la mele ka epine palua.” Nge tro itre xan a kapa la mel kowe la “hna jele ngazone me sisin’ epine palua.” Celë hi la pun kowe la itre hna troa amelene hmaca. Eje hi, ame ngöne la pun la 1 000 lao macatre, hetre ka troa kapa la mel ka pë pun, nge hetre hna troa apatrene paluan.​—Hna ama. 20:15; 21:3, 4.

Hane hi la ketre ceitun. Ijije hi tro sa aceitunëne la lue gurup ne la itre hna troa amelene hmaca, memine la itre trenyiwa ka ajane troa mel ngöne la ketre nöj. Ame la itre atr ka meköt, ke kolo itre ka trene visa göi huliwa maine visa ne lapa aqeanyi ngöne lai nöj. Kösë ame e cili, tha itre trenyiwa hmaca kö angatr ngöne lai nöj. Ame pena la itre ka tha meköti kö ke, itre trenyiwa angatr ka kapa la ketre visa, ngo hna sa draine hi, kolo visa thatraqane la itre ka ngenu ngöne la nöj. Haawe, loi e tro angatr a amamane laka, ijiji angatr fe troa hane mel ngöne la nöj. Ceitu hi lai memine la itre ka tha meköti kö hna troa amelene hmaca. Loi e tro angatr a kapa me mele thenge la itre wathebo i Iehova, matre tro fe angatr a mele ngöne la paradraiso. Ngacama tha ase kö angatr kapa la visa ne lapa aqeany, ngo ijije hi tro angatr a atrene la nöj, e tro angatr a ujë hnyawa, me mele nyipici. Ngo e ka ngazo la aqane ujë i angatr ke, tro ha helë angatr qa cili. Haawe, tro la itre hna troa amelene hmaca a mele palua ngöne la fene ka hnyipixe, e tro angatr a lapaun, me mele nyipici utihë la pun.

Ame Iehova, ke, Akötresie ka meköti Nyidrë. (Deu. 32:4; Sal. 33:5) Tro Nyidrëti a amamane la ihnimi Nyidrë kowe la itre atr ka meköt, me kowe fe la itre ka tha meköti kö. Ngo loi e tro angatr a trongëne la itre trepene meköti Nyidrë, matre mel ngöne la fene ka hnyipixe.