Jombweye malabe̱ Bibe̱l e mabolano̱.

Bebolo 24:15 e malangwea biso̱ ná “bepumbwedi ba bate̱m na sim na basite̱m na sim” be me̱nde̱ be̱. Bate̱m na sim be nde ba bena ba sengane̱ Loba obiana ba mawo̱, mina mabu ma tilabe̱ so̱ o kalat’a longe̱. (Mal. 3:16) O muso̱ngi ma basite̱m na sim, o be̱n ba bena ba wedi obiana ba mabe̱ne̱ epolo o bia Yehova, mina mabu ma si tilabe̱ so̱ o kalat’a longe̱.

Yohane 5:28, 29 pe̱ e makwalea nde ońola ma mabo̱to̱ maba ma Bebolo 24:15. Yesu a kwali ná “ba bena ba boli bwam” ba me̱nde̱ busa “o bepumbwedi ba longe̱, ba pe̱ bena ba boli bobe o bepumbwedi ba muka.” Bate̱m na sim ba boli mambo ma bwam obiana ba mawo̱. Ba me̱nde̱ be̱ne̱ bepumbwedi ba longe̱ ońolana mina mabu ma tilabe̱ o kalat’a longe̱. Nde o diwengisan, basite̱m na sim ba boli mambo ma bobe obiana ba mawo̱. Ba me̱nde̱ be̱ne̱ bepumbwedi ba muka. Mina mabu ma si bedi tilabe̱ o kalat’a longe̱, ba me̱nde̱ so̱ be̱ne̱ ponda ba makaisabe̱no̱ to̱ ńena ba mawe̱le̱be̱no̱ o kekise̱. O ni ponda, ba me̱nde̱ be̱ne̱ epolo o jokwa bia Yehova ná mina mabu ma tilabe̱ o kalat’a longe̱.

Bebīsedi 20:12, 13 e matele̱ye̱ ná be̱se̱ bena ba me̱nde̱ pumbwabe̱le̱ bangame̱n sengane̱ “mambo ma tilabe̱ o . . . kalati,” nika ńe nde mambenda ma peńa ma me̱nde̱ be̱ o was’a peńa. Ba bena ba si me̱nde̱ lee̱le̱ sengane̱ ba me̱nde̱ ńamsabe̱ na Yehova.​—Yes. 65:20.

Daniel 12:2 e bīse̱ ná jita bena ba wedi ba me̱nde̱ jumwe̱, bō̱ “ońola longe̱ la bwindea, bane̱ pe̱ ońola bosambo na iso̱n a bwindea.” Yen epas’a Bibe̱l e makwalea nde mbako nisukan ba bena ba me̱nde̱ pumbwabe̱le̱ ba me̱nde̱no̱ kusa​—“longe̱ la bwindea” to̱ “iso̱n a bwindea.” O su la 1000 mbu, bō̱ ba me̱nde̱ be̱ne̱ longe̱ la bwindea, bane̱ pe̱ ba ńamsabe̱ o bwindea.​—Bbī. 20:15; 21:3, 4.

Di nonge eyembilan. Je ná di langisane̱ bete̱medi ba ma mabo̱to̱ ma bato maba ba me̱nde̱ pumbwabe̱le̱ na be̱n ba bato bena ba mapule̱ je̱ o mwe̱n ekombo. Bate̱m na sim be nde ka be̱n ba bato bena ba kusi dipapa la ja o ekombo, lena di mabole̱ ná bembabe̱, ba be̱ne̱ pe̱ wonja po̱ te̱nge̱. O diwengisan, basite̱m na sim be nde ka be̱n ba bato bena ba kusi dipapa di mabole̱ nde babo̱ epolo o ja ońola pambo a ponda po̱. Ban bangame̱n be̱ne̱ bedangwedi be me̱nde̱ bole̱ ná ba kuse wonja o benga ja o y’ekombo. Mulemlem pe̱ nde e me̱nde̱no̱ pula ná basite̱m na sim bena ba me̱nde̱ pumbwabe̱le̱ ba we̱le̱ mambenda ma Yehova o ebolo, ba be̱ne̱ pe̱ bedangwedi ba bwam ná ba benge ja o paradisi. E be̱ ná ba kusi dipapa di mabole̱ babo̱ epolo o ja ponda bwaba to̱ ońola pambo a ponda po̱, bō̱ oteten a ba be̱n ba bato be ná ba no̱ngo̱be̱ ombusa ponda ka bana b’ekombo, bane̱ ba pangabe̱. Bedomsedi ba jese̱le̱ babo̱ to̱ ke̱m be me̱nde̱ nde no̱ngo̱be̱ bupisane̱ bedangwedi babu o y’ekombo. Mulemlem pe̱ nde mbako nisukan jombwea ba bena ba pumbwabe̱le̱ e me̱nde̱no̱ bolabe̱ bupisane̱ jemea ba me̱nde̱no̱ lee̱le̱ na bedangwedi babu o was’a peńa.

Yehova a titi Loba la ndolo buka te̱, e pe̱ Loba la te̱me̱ la sim. (Ndim. 32:4; Mye. 33:5) A me̱nde̱ lee̱le̱ ndol’ao na ninka ná a me̱nde̱ pumbwe̱le̱ bate̱m na sim na basite̱m na sim. A me̱nde̱ pe̱ pula ná ba bupe̱ bete̱sedi bao basam jombwea nje ye bwam na bobe. Buka te̱ ba bena ba me̱nde̱ lee̱le̱ ná ba to̱ndi mo̱, na die̱le̱ pe̱ longe̱ labu bupisane̱ bete̱sedi bao nde ba me̱nde̱ je̱ o was’a peńa o bwindea.