An k’a filɛ Bibulu b’o ɲiningali jaabi cogo min na.

Kɛwaliw 24:15 (Bible senuma) b’a fɔ ko “mɔgɔw bɛɛ suw na kunun, mɔgɔ tilennenw ni mɔgɔ tilenbaliw bɛɛ.” Minw ye kantigiya kɛ Ala ye ka sɔrɔ ka sa, olu lo ye mɔgɔ tilenninw ye. O kama, u tɔgɔ sɛbɛnin be ɲɛnamaya kitabu kɔnɔ (Mal. 3:16). Minw sara k’a sɔrɔ u ma sababu bɛrɛ sɔrɔ ka Jehova lɔn, olu lo ye mɔgɔ tilenbaliw ye. U tɔgɔ ma sɛbɛ ɲɛnamaya kitabu kɔnɔ.

Zan 5:28, 29 be kuma o jɛnkulu fila koo la minw kofɔra Kɛwaliw 24:15 kɔnɔ. Yezu ko “minw tun be ɲuman kɛ, olu bena kunun ka balo banbali sɔrɔ. Kojugukɛlaw bena kunun kiti kama.” Mɔgɔ tilenninw ye koo ɲuman kɛ ka sɔrɔ ka sa. U bena kunu ɲɛnamaya kama sabu u tɔgɔ sɛbɛnin lo ɲɛnamaya kitabu kɔnɔ. Nka mɔgɔ tilenbaliw ye koo jugu kɛ ka sɔrɔ ka sa. U bena kunu kiti kama. Olu tɔgɔ ma sɛbɛ fɔlɔ ɲɛnamaya kitabu kɔnɔ ani Ala bena wagati dɔ di u ma, o min na a bena u ka kɛwalew kɔrɔsi. O wagati la, u bena se ka Jehova lɔn ani sababu bena di u ma walisa u tɔgɔ ka sɛbɛ ɲɛnamaya kitabu kɔnɔ.

Yirali 20:12, 13 b’a ɲɛfɔ ko minw suu bena kunu, u bɛɛ ka ɲi ka “nii banbali sɛbɛ” kɔnɔnakumaw sira tagama. O sɛbɛ ye sariya kuraw ye, Ala bena minw di an ma duniɲa kura kɔnɔ. Minw tɛna koow kɛ ka kɛɲɛ n’o sɛbɛ kɔnɔnakumaw ye, olu bena halaki.—Ezayi 65:20.

Daniyɛli 12:2 tun kɔnna k’a fɔ ko minw suu bena kunu, “u dɔw niyɔrɔ bena kɛ nii banbali ye, dɔw ta bena kɛ maloyaba ye min tɛ ban.” Minw suu bena kunu, o vɛrise b’a yira olu ka kiti laban bena kɛ min ye. A laban, dɔw bena “nii banbali” sɔrɔ ani dɔ wɛrɛw ta bena kɛ “maloyaba ye min tɛ ban.” O la, saan 1 000 mara laban na, dɔw bena ɲɛnamaya banbali sɔrɔ ani dɔ wɛrɛw bena halaki pewu pewu.—Yir. 20:15; 21:3, 4.

An ka misali dɔ lajɛ. Jɛnkulu fila mɔgɔ minw suu bena kunu, an be se k’olu ka koo suma ni lonanw ta ye minw b’a fɛ ka sigi jamana wɛrɛ kɔnɔ. Mɔgɔ tilenninw be komi lonan minw ye viza dɔ sɔrɔ min b’a to u be se ka baara kɛ wala ka to jamana dɔ kɔnɔ. O viza b’a yira ko sira dira u ma ka to jamana kɔnɔ ani ka koo dɔw kɛ. Nka, mɔgɔ tilenbaliw be i ko lonan minw ye viza dɔ sɔrɔ, o min sababu la u be se ka to jamana kɔnɔ wagati kunkurunin kɔnɔ wala u be to yen dɔɔni walisa ka jamana lajɛ. O lonanw ka ɲi k’a yira ko u be jamana kura ka sariyaw labato, sira be sɔrɔ ka di u ma ka to yen. O cogo kelen na, mɔgɔ tilenbali minw suu bena kunu, olu ka ɲi ka Jehova ka sariyaw labato ani k’a yira k’u ye mɔgɔ tilenninw ye. O kɔ le, sira bena di u ma u ka to alijɛnɛ kɔnɔ. Lonanw mana viza o viza sɔrɔ ka sɔrɔ ka don jamana dɔ kɔnɔ, a laban, u dɔw be kɛ jamanadenw ye. Nka, u be dɔ wɛrɛw gwɛn ka bɔ jamana kɔnɔ. O lonanw be koow kɛ cogo min na o jamana kura kɔnɔ, o lo b’a to u be kɛ jamanadenw ye wala u be gwɛn ka bɔ yen. O cogo kelen na minw bɛɛ suu bena kunu, u ka kiti laban bena tigɛ ka kɛɲɛ n’u ka kantigiya ani u tagamacogo ye duniɲa kura kɔnɔ.

Jehova ye kanutigi Ala ye ani tilenninyatigi lo fana (Deter. 32:4; Zab. 33:5). A bena a ka kanuya yira, a kɛtɔ ka mɔgɔ tilenninw ni mɔgɔ tilenbaliw suu kunu. Nka, a bena a ɲini u bɛɛ fɛ u k’a ka sariyaw labato ɲuman ni juguman koo la. Minw bena Jehova kanu ani k’a ka sariyaw labato, sira bena di olu dɔrɔn lo ma ka to duniɲa kura kɔnɔ.