Bugi togó boo bé e Kpá Káí áálá gbò bíbví naa.

Kpá Tóm 24:15 kọ́ nèi kọọ̀ “gbò lé nè gbò pọ́lọ́ é kẽeà aa ke mà ú.” Gbò lé dú gbò e ba beè gbàntṍ ló Bàrì besĩ́ bà kalá ù, vóà naa, ba bée di mm̀ kpá dùm. (Mál. 3:16) Gbò pọ́lọ́ dú gbò e bà náa beè ié nèà deè ge nó nu ea kil ló Jìhóvà besĩ́ bà kalá ù, vóà naa, ba náa beè emí ba bée mm̀ kpá dùm.

Kpá Jọ́ọ̀n 5:​28, 29 kọ́ nágé nú ea kil ló pálaa gbò e kpá Tóm 24:15 ló bel ea kil lóá. Jíízọ̀s kọ́ọ̀ “gbò e ba è naa lé é kẽeà bã bá dùm, sõò gbò e ba è naa pọ́lọ́ é kẽeà bã bá bèèla bel.” Gbò lé lab dògò beè naa nú ea dú lé besĩ́ bà kalá ù. Bàé kẽeà bã bá dùm boo béè kọọ̀ ba bée di mm̀ kpá dùm. Sõò gbò pọ́lọ́ lab dògò dú gbò e ba beè naa nú ea dú pọ́lọ́ besĩ́ bà kalá ù. Bàé kẽeà bã bá bèèla bel. Bà gáà emi ba bée mm̀ kpá dùm, vaá bàé zẹ́ẹ́ tú sìgà tṍó beemá va bel ló, àbèè ge ẹ̀b bé bà lábví láb naa. Mm̀ gbò tṍóá, bàé gbóó íe nèà deè ge nó nú ea kil ló Jìhóvà kọbé ba bée ẽ́á mm̀ kpá dùm.

Kpá Kùùà Nù 20:​12, 13 baatẽ́ kọọ̀ dénè gbò e bàé kẽeà aa kemà ú é gbantṍ ló gbò nú e ba beè emí “mm̀ gbò kpáá,” ea dú ãa log e Bàrì é ne gbẹá mm̀ ãa bàlà booá. Bàrì é kyọsĩ́ kọ̀láá gbò e bà náa gban tṍ ló.​—⁠Àìz. 65:⁠20.

Kpá Dániẹ̀l 12:2 beè kọọ̀ sìgà gbò e ba beè ù é kẽeà bã bá “dùm e bè náa tá vaá nagbòa é kẽeà bã bá nvèèà lẹ́ nè gbẹ́a ea é di lee.” Nakà gã́belí ló bel boo dee deè nvéè nú ea é nááá ló gbò e bàé kẽeà aa kemà ú​—⁠àé láá dú “dùm e bè náa tá” àbèè “gbẹ́a ea é di lee.” Vóà naa, tṍó e 1,000 gbááá ni égá, sìgà gbò e íe dùm e bè náa tá boo tṍó e sìgà gbò é íe kyọ̀à sĩ́ dọ̀ọ̀mà dè-dè.​—⁠Kùùà 20:15; 21:​3, 4.

Bugi togó boo nakà nu dòòmà báí. Èé láá tú dìtõ̀ò bàà gbò e bàé kẽeà aa kemà úí doolé gbò e bà gbĩ́ gè tõó dõòna kà dó dì belí gbò kyáà. Gbò lé lab dògò dì belí gbò e bà né va kpá ea é náa kọ bàá ié dì pọ́ì ge sí tóm àbèè ge tõó dõòna kà dó. Boo tṍó e gbò pọ́lọ́ lab dògò bélí gbò kyáà e bà né va kpá e bàé láá siimá ke tõ̀ò mm̀ pọ́ì ńkpulu dẽe tṍó. Gbò kyáà e bà dì naa vó é íe ge zẹ́ẹ́ dòbá ba lóó besĩ́ bà kálá sọ̀va tọ́ deè kọ bàá tõó ãa dó e bà ínáá. Mm̀ tẽ̀ènè sĩ́deèá, à dú bíi kọọ̀ gbò pọ́ló e bàé kẽeà aa kemà ú á gbàntṍ ló log Jìhóvà vaá zogè kọ ba dúè gbò lé lab dògò kọbé bà láá gbẹá mm̀ páladaìs. Kọ̀láá bé e kpá e ba beè nè gbò kyáà e bàé kil dõòna kà dóá meà naa, sìgà nen é láá ié kpá ea é túe naamá nvín sãa, boo tṍó e bàé láá kpó sìgà gbò. Nú ea é nááa vá ló é dẹẹ̀a boo ba láb nè bé e bà tõó dùm naa gbẹá dóá. Mm̀ tẽ̀ènè sĩ́deèá, dee deè nvéè nú ea é nááá ló gbò e bàé kẽeà aa kemà ú é dẹẹ̀a boo ba bọ́ọ̀ló dẹ̀lẹ̀ nyíé boo nè láb e bà lábví gbẹá mm̀ ãa bàlà booá.

Níì áá sàn sàn nyíe ní e Jìhóvà Bàrì íé lọ̀l vaá à leeé nì, à dú nágé Bàrì lé bèèla. (Dìt. 32:4; Ps. 33:⁠5) Àé beè zoge a vulè tení dú ló gè kẽee gbò lé nè gbò pọ́lọ́ lọl kemà ú. Sõò à ẹbmà dẽe kọọ̀ dénè nen é tõó boo gbò a nòòkúu ea kil ló lé nè pọ́lọ́. Áá gbò e bà vulèe vaá tõó boo gbò a nòòkúu ní ea é sọbá gbẹẹ́ mm̀ ãa bàlà booá ẹ́.