Rhulole gurhe Ebiblia eshubize kw’ebyola bibazo.

Matendo 24:15 harhubwirire oku nji haba “obufuke bw’abanya-kunali n’abarhali banya-kunali.” Abanya-kunali bali balala baliri bakenga Mungu embere bafe, k’okuderha, amazino mabo mayandikirwe omu chitabu ch’akalamo. (Mal. 3:16) Abarhali banya-kunali baheberwemo na balala barhabonaga orozo lutosheze l’okuyiga oku bilolere Yehova, bobola amazino mabo marhayandikirwe omu chitabu ch’akalamo.

Yohana 5:28, 29 ederheere kw’ebyola bigusho bibiri byenebyo biderherwe omu Matendo 24:15. Yesu aderhere oku balala “bajirire ebinja” nji bahuluka bagwarhe “obufuke bw’akalamo, na balala balikomeere kukola amaligo, oku bufuke b’olubanja.” Abanya-kunali balijirire ebijiro binja embere bafe. Nji bafuka oku bufuke bw’akalamo bulala amazino mabo maliberere mayandikirwe omu chitabu ch’akalamo. Aliko, abarhali banya-kunali bali balala balijirire ebyamaligo embere bafe. Nji bagwarha obufuke b’okuchirwa olubanja. Amazino mabo marhasagiyandikwa omu chitabu ch’akalamo, naho nji bagera omu bisanzi by’okurhangigerereza ebijiro byabo, changwa olugenzi lwabo. Mu amola mango, nji bagwarha orozo l’okuyiga oku bilolere Yehova naho amazino mabo manaja mayandikwa omu chitabu ch’akalamo.

Ufunuo 20:12, 13 efasiriye oku abanji bafuuka boshi bakwanene nji bakenge “ebintu biyandikirwe omu bitabu by’emizingo,” k’okuderha, esheriya Yehova nj’arhuhereza omu gulu lihyahya. Abanji barhakenga Yehova nj’abalimbula.​—Isa. 65:20.

Danieli 12:2 yalilebere oku baguma omu bafire nji bafuuka “n’okugwarha akalamo k’esiku n’amango n’abandi nji bakozwa eshonyi n’okusuzagurwa esiku n’amango.” Gunola mustari guderhere oku bilolere olubanja l’obuzinda oku bantu nji bafuuka. Nji bagwarha, “obufuuke bw’akalamo k’esimu n’amango” changwa ‘okukozwa eshonyi esiku n’amango.’ Bobola oku buzinda bwa myaka 1 000, baguma nji bagwarha akalamo k’esiku n’amango abandi nji balimbulwa loshi.​—Ufu. 20:15; 21:3, 4.

Rhulole omufano. Ehali y’ebyola bigusho bibiri byaba nji bafuuka yakahuzanywa n’abenjiira balonzeze kujilama omu chindi chihugo. Abanya-kunali bali nka balala banahabwa eviza (biratasi leta anahereza abenjiira) y’akasi changwa eviza ebayemerere kulama mw’echola chihugo eyi banagwerhe obuhuru boshi. Oku bwindi, abarhali banya-kunali bali kuguma n’abenjiira bahabirwe eviza ya myezi migeke changwa eviza y’abahisi basiku zigeke. Abola benjira bakwanene kuyerekana oku kweri bakwanene embere bayemererwe kugenderera kulama mw’echola chihugo chihyahya. Konakuguma, abarhali banya-kunali bafuukire bakwanene kukenga esheriya za Yehova n’okuyerekana oku bali banya-kunali na ntyo babere omu Paradizo. K’okuderha oku eviza yoshi-yoshi abantu b’ebyola bigusho bibiri bakaba bahabirwe ebe ya myezi migeke changwa ya kubera loshi mw’echola chihugo, boshi bakwanene kukenga esheriya z’echola chihugo yi bayemererwa kuchiberamo nka banya-chihugo changwa nanga. Okuntu bachigendesa mw’echola chihugo chihyahya k’okwarhuma bayemererwa kubera changwa kurhabera mw’echola chihugo. Konakuguma, esimikiro y’obuzinda nji yarholwa oku bilolere ebyola bigusho bibiri by’abantu nji bafuufa, nji yayumangira oku bwimana bwabo n’okuntu nji bachigendesa omu gulu lihyahya.

Yehova arhali Mungu w’obuzigire konyine s’aliko anali Mungu w’okunali. (Kum. 32:4; Zb. 33:5) Nji ayerekana obuzigire bwage omu kufuula abanya-kunali n’abarhali banya-kunali. Aliko nj’ahema boshi bakenge amakununi mage m’enyanya oku bilolere ebinja n’ebibi. Balala bonyine nji bayerekana oku bamuzigiire n’okukenga amakanuni mage banji bayemererwa bagenderere kulama omu gulu lihyahya.