Baibel ese unai henanadai ia haerelaia dalana ita itaia.

Kara 24:15 ia gwau, “kara maoromaoro taudia bona kara maoromaoro lasi taudia be do idia toreisi lou.” Idia do mase lasi neganai Dirava idia badinaia taudia be kara maoromaoro taudia, unai dainai edia ladana be mauri bukana lalonai ia noho. (Mal. 3:16) Idia do mase lasi neganai Iehova idia dibaia totona dala ia noho lasi taudia be kara maoromaoro lasi taudia, unai dainai edia ladana be mauri bukana lalonai ia noho lasi.

Ioane 5:28, 29 ese ia herevalaia orea rua be Kara 24:15 ese ia herevalaia danu. Iesu ia gwau “kara namo idia karaia taudia be do idia toreisi lou mauri abia totona, to kara dika idia karaia taudia be do idia toreisi lou hahemaoro abia totona.” Kara maoromaoro taudia be idia do mase lasi neganai kara namo idia karaia. Idia be do idia toreisi lou mauri abia totona, badina edia ladana be mauri bukana lalonai ia do noho. To, kara maoromaoro lasi taudia be idia do mase lasi neganai kara dika idia karaia. Idia be do idia toreisi lou hahemaoro abia totona. Edia ladana be mauri bukana lalonai ia noho lasi, bona idia be hahemaoro negana, eiava Dirava ese edia kara do ia sekea namonamo negana lalonai do idia noho. Unai nega ai, idia dekenai dala do ia noho Iehova idia dibaia totona, unai amo edia ladana be mauri bukana ai do ia noho.

Apokalupo 20:12, 13 ese ia hahedinaraia, “mauri bukana lalonai idia torea gaudia,” unai be, Dirava ese tanobada matamatana ai do ia henia taravatu matamatadia, be toreisi lou taudia ibounai ese idia badinaia be namo. Iehova ese unai taravatu idia badinaia lasi taudia do ia hadikaia ore.​—Isa. 65:20.

Daniela 12:2 ia peroveta, mase dekenai idia mahuta taudia haida be do idia toreisi lou bona “mauri hanaihanai do idia abia bona ma haida be do idia hemarai ela bona hanaihanai.” Unai siri be mase taudia idia toreisi lou murinai idia dekenai do ia vara karana ia herevalaia, idia be do idia “mauri hanaihanai” eiava do idia “hemarai ela bona hanaihanai.” Unai dainai lagani 1,000 ena dokonai, haida be mauri hanaihanai do idia abia bona haida be dika do idia davaria.​—Apok. 20:15; 21:3, 4.

Mani inai haheitalai ita laloa. Idia toreisi lou orea rua dekenai do ia vara gauna be tano ma ta dekenai idia ura noho taudia ida ita hahegeregerea. Kara maoromaoro taudia be work visa eiava resident visa idia abia taudia hegeregerena, idia be mai edia maoro tano ma ta dekenai gau haida idia karaia totona. To, kara maoromaoro lasi taudia be temporary visa eiava visitor’s visa idia abia taudia hegeregerena. Namona be unai bamona taudia ese edia kara amo do idia hamomokania idia be hegeregere tano ma ta dekenai idia noho hanaihanai totona. Unai hegeregerena, do idia toreisi lou kara maoromaoro lasi taudia be Paradaiso ai idia noho hanaihanai totona, namona be Iehova ena taravatu idia badinaia bona idia hamomokania idia be kara maoromaoro taudia. Bona herevana haida be tano ma ta dekenai idia lao neganai visa idia abia, to reana gavamani ese haida sibona dekenai maoro ia henia unai tano ena sitisen ai idia lao, bona ma haida be edia tano dekenai do idia siaia lou. Oibe, edia kara amo do idia hahedinaraia bema idia be hegeregere tano ma ta ena sitisen ai idia lao eiava lasi. Unai hegeregerena, idia toreisi lou taudia ibounai be tanobada matamatana dekenai edia abidadama bona kara amo do idia hahedinaraia, idia be hegeregere mauri hanaihanai idia abia eiava lasi.

Iehova be hebogahisi Diravana, bona danu ia be kota maoromaoro Diravana. (Deu. 32:4; Sal. 33:5) Ia ese kara maoromaoro bona kara maoromaoro lasi taudia ia hatorea isi lou karana amo ena lalokau do ia hahedinaraia. Danu do ia ura idia ese ena kara maoromaoro taravatudia idia badinaia noho be namo. Iehova idia lalokau henia bona ena taravatu idia badinaia taudia be tanobada matamatana ai do idia noho hanaihanai.