Ikonsidera nu kunnasi nga tabbagan na Biblia yaw ira nga pakkiavu.

Kagian nittam na Kingngua 24:15 (NW) nga “egga noka i paginnolay parehu na matunung anna ari matunung.” I matunung ay danuri siminuttul ta Dios nige da nga natay, yari tu netura i ngagadda ta libru na matolay. (Mal. 3:16) Nelagum ta ari matunung danuri natay nga awan tu makalanno nga chansa da nga makilala si Jehova, yayya nga ari nga netura i ngagadda ta libru na matolay.

Kagian na Juan 5:28, 29 i meyannung ta dua nga grupo na mapaginnolay nga nakagi gabbalaman ta Kingngua 24:15. Kinagi ni Jesus nga “ngamin i nangngua tu mapia ta katolay da ay maginnolay anna mattolay,” anna “danuri i marakay i kikkingngua da ay maginnolay gapa tapenu makastigo.” Mapia i kikkingngua danuri na matunung nige da nga natay. Maginnolay anna mattolay ira megafu ta netura lagapa i ngagadda ta libru na matolay. Ngem marake i kikkingngua danuri ari nga matunung nige da nga natay. Maginnolay ira tapenu makastigo. Ari paga gare nga netura i ngagadda ta libru na matolay yari tu sonu mapaginnolay ira, meddan labbi ira tu tiempo nige ira nga masentensian. Durante tatun nga tiempo, magigiammu da i meyannung kani Jehova anna egga i chansa da nga metura i ngagadda ta libru na matolay.

Kinagi na Nepakannammu 20:12, 13 nga mawag na ngamin nga napaginnolay nga tumuttul ta “netura ta libru ira.” Danatun i bagu ira nga dob nga iyawa na Dios nittam noka ta napabagu nga mundo. Madaral noka danuri ari nga tumuttul tatun nga bagu ira nga dob.​—Isa. 65:20.

Niprofesiya na Daniel 12:2 nga masikkag danuri i natay tapenu alawatan i “mannanayun nga inango anna i karuan ta kepasiranan anna mannanayun nga kauyu-uyaw.” Tumukoy yaw nga teksto ta ultimu nga pattuppalan danuri na napaginnolay—“mannanayun nga inango” onu “mannanayun nga kauyu-uyaw.” Yayya nga ta ultimu na 1,000 nga dagun, makalawa i karuan tu mannanayun nga inango anna madaral gapa tu mannanayun i karuan.​—Nep. 20:15; 21:3, 4.

Ikonsidera yaw nga ilustrasion. Awayya tam nga ikumpara i dua nga grupo na napaginnolay ta totolay ira nga maya nga maddian ta tanakuan nga nasion. Awayya na nga mekumpara i matunung ira ta totolay nga nakalawa tu work visa onu resident visa nga mangiyawa ta nira tu kepangngattan anna lallaguray nga maddian ta tanakuan nga nasion. Mekumpara gapa i ari nga matunung ta totolay ira nga nakalawa tu temporary visa onu visitor’s visa. Mawag labbi nga madde natun ira nga totolay i espesipiko ira nga requirement tapenu permanente ira nga makapaddian ta bagu nga nasion. Kunnatun gapa noka ta Paraiso. Mawag nga tuttulan na ari nga matunung i dorob ira ni Jehova anna mawag nga pakurugadda nga matunung ngana ira tapenu mattalupaddian ira ta Paraiso. Maski anni paga nga visa i ollu nga nalawa na totolay ira ta pattalludda ta tanakuan nga nasion, posible lagapa nga mabbalin tu citizen i karuan ta nira, anna i karuan gapa ay posible nga me-deport. Nakadepende i mesimmu ta nira ta ugali anna ta annangngua da ta bagu nga nasion nga paddianadda. Kunnatun gapa para ta ngamin nga mapaginnolay. Nakadepende gapa i ultimu nga pattuppaladda ta kinamatalo anna kondukta da durante na napabagu nga mundo.

Ari laman tu Dios na aya si Jehova. Dios gapa yayya na hustisia. (Deut. 32:4; Sal. 33:5) Ipasingan na i pangaya na gukaban na pamaginnolena ta matunung anna ta ari nga matunung. Ngem ekspektan na nga tuttulan na napaginnolay ira i estandarte na ta fustu anna ta ugal. Danuri laman i mangaya anna tumuttul ta nisa i mepamavulun nga tulu-tuloy nga mattolay ta napabagu nga mundo.