Kitaentayo ti sungbat ti Biblia.

Ti Aramid 24:15 ibagana nga “agungarto agpadpada dagiti nalinteg ken dagiti nakillo.” Dagiti nalinteg ket dagidiay nagtulnog iti Dios sakbay a natayda isu a naisurat ti naganda iti libro ti biag. (Mal. 3:16) Karaman kadagiti nakillo dagidiay saan a naaddaan iti umdas a gundaway a mangammo maipapan ken Jehova sakbay a natayda, isu a saan a naisurat ti naganda iti libro ti biag.

Ti tuktukoyen ti Juan 5:28, 29 ket ti isu met la a dua a grupo iti Aramid 24:15. Imbaga ni Jesus a “dagidiay nagaramid iti naimbag mapagungarda tapno agbiag, ken dagidiay nagaramid iti dakes mapagungarda tapno maukom.” Dagiti nalinteg ket dagidiay nagaramid iti naimbag sakbay a natayda. Mapagungardanto tapno agbiag ta nakasurat pay laeng ti naganda iti libro ti biag. Ngem dagiti nakillo ket dagidiay nagaramid iti dakes sakbay a natayda. Mapagungardanto tapno maukom. Saan pay a naisurat ti naganda iti libro ti biag, ken addanto tiempo a maukomda, wenno maobserbaranda. Iti dayta a tiempo, adda gundawayda a mangammo iti maipapan ken Jehova tapno maisurat ti naganda iti libro ti biag.

Ilawlawag ti Apocalipsis 20:12, 13 nga amin a mapagungar ket masapul nga agtulnog “kadagiti banag a naisurat kadagiti lukot,” kayatna a sawen, kadagiti baro a linteg a maipatungpal iti baro a lubong. Dagiti saan nga agtulnog ket madadael.​—Isa. 65:20.

Impakpakauna ti Daniel 12:2 nga agriingto ti dadduma a matmaturog ken patay tapno “agbiag nga agnanayon ken addanto met dagidiay maibabain ken agnanayon a maum-umsi.” Ipakita dayta a bersikulo ti maudi a pagtungpalan dagiti mapagungar​—‘agbiagda nga agnanayon’ wenno ‘agnanayon a maum-umsida.’ Isu nga iti ngudo ti 1,000 a tawen, awatento ti dadduma ti agnanayon a biag, ngem ti dadduma ket madadaelto iti agnanayon.​—Apoc. 20:15; 21:3, 4.

Panunotenyo daytoy nga ilustrasion. Ti situasion ti dua a grupo a mapagungar ket kas kadagiti ganggannaet wenno foreigner a kayatda ti agnaed iti pagilian a papananda. Dagiti nalinteg ket kas kadagidiay maikkan iti work visa wenno resident visa a mangted kadakuada iti oportunidad nga agnaed iti atiddog a tiempo iti pagilian a napananda, ken maaddaan iti adu a kalintegan ken benepisio a kas iti tagtagiragsaken dagiti umili iti dayta a pagilian. Dagiti met nakillo ket kas kadagiti foreigner a maikkan iti temporary visa wenno tourist visa. Masapul a paneknekan dagita a foreigner a kualipikadoda nga agtultuloy nga agnaed iti pagilian a napananda. Umasping iti dayta, dagiti nakillo a mapagungar masapul a surotendanto dagiti linteg ni Jehova ken paneknekanda a nalintegda tapno mapalubosanda a permanente nga agnaed iti Paraiso. Ngem aniaman a visa ti damo a naawat dagiti foreigner iti pagilian a napananda, addanto dagiti agbalin a citizen wenno adda met dagiti mabalin a maideporta. Ti pinal a desision ket nakadepende iti kababalin ken aramidenda iti pagilian a napananda. Isu a ti pinal met a desision para iti amin a mapagungar ket nakadepende iti kinamatalek ken kababalinda iti baro a lubong.

Saan la a naasi ni Jehova. Isu ket Dios met ti kinahustisia ken patas ti panangtratona iti amin. (Deut. 32:4; Sal. 33:5) Ay-ayatenna dagiti tattao isu a pagungarennanto dagiti nalinteg ken dagiti nakillo. Ngem ekspektarenna a surotenda dagiti nangato a pagalagadanna maipapan iti umiso ken di umiso. Dagiti laeng mangay-ayat kenkuana ken mangsursurot kadagiti pagalagadanna ti mapalubosan nga agtultuloy nga agbiag iti baro a lubong.