Wi a-go luk pan di ansa we di Baibl gi wi fi dem kwestiyan ya.

Aks 24:15 tel wi se Gad a-go “mek ded piipl kom bak alaiv, weda dem did gud ar bad.” Di gud wan dem a di wan dem we did a du wa Gad waahn dem fi du bifuo dem ded, so fi dem niem rait dong iina di buk we Gad rait dong di niem a di piipl dem we a-go get fi liv fi eva. (Mal. 3:16) An di bad wan dem a di wan dem we did ded bifuo dem did get di chaans fi lorn bout Jeuova, so fi dem niem no rait dong iina di buk we Gad rait dong di niem a di piipl dem we a-go get fi liv fi eva iina.

Jan 5:28, 29, NWT taak bout dem siem tuu gruup a piipl ya we Aks 24:15 taak bout. Jiizas se “dem we did du gud” a-go “kom bak redi fi liv fi eva, an di wan dem we did du wikidnis a-go kom bak fi get joj.” Di wan dem we did du gud sitn bifuo dem ded, a dem a-go kom bak redi fi liv fi eva. So a fi dem niem rait dong iina di buk we Gad rait dong di niem a di piipl dem we a-go get fi liv fi eva. Bot yu si di bad wan dem, fi dem niem no iina da buk de kaa dem did a du bie wikid sitn bifuo dem ded. An dem a-go kom get joj wen de kom bak, kaa Gad a-go wach dem fi a wail fi si ef afta dem lorn bout di tingz dem we im waahn dem fi du, ef dem a-go dwi’it. An ef dem dwi’it, a da taim de im a-go rait dong fi dem niem iina di buk we im rait dong di niem a di piipl dem we a-go get fi liv fi eva iina.

Revilieshan 20:12, 13, NWT mek wi nuo se evribadi we kom bak alaiv a-go afi du di sitn dem bies pan wa did rait dong iina di buk dem. Dem sitn ya we rait dong iina di buk dem a di laa dem we Gad a-go gi wi iina di nyuu worl. So di wan dem we no du di sitn dem we dem lorn, a dem a di wan dem we a-go get don fa.​—Aiz. 65:20.

Daniyel 12:2 mek wi nuo se som a di piipl dem we ded a-go kom bak alaiv, “som a dem a-go liv fi eva an di wan dem we no du wa rait bring dong shiem pan demself an a-go don fa.” Da vors ya a mek wi nuo wa a-go apm tu dem afta dem kom bak alaiv. So iida dem a-go get fi “liv fi eva” ar dem “a-go don fa.” So wen di touzn ier don, som piipl a-go get fi liv fi eva an som piipl a-go don fa.​—Rev. 20:15; 21:3, 4.

Yu kyan luk pan it da wie ya: Se yu av tuu gruup a piipl we waahn fi liv iina wan neda konchri. Wan a di gruup dem get wan viiza we mek dem kyan liv iina di konchri fi wan lang taim. Dem wan ya wuda komiin laik di gud wan dem we kom bak alaiv. An di neda gruup get wan viiza we onggl mek dem kyan liv iina di konchri fi wan likl bit a taim. Dem wan ya wuda komiin laik di bad wan dem we kom bak alaiv, an ef dem waahn fi get wan a di viiza we mek dem kyan liv de wan lang taim tu, dem afi liv op azkaadn tu di laa a di konchri tu. So di tuu gruup a piipl, ef dem waahn fi liv iina di konchri fi gud, dem afi du wa di laa a di konchri se ar els dem a-go get fling out. A siem so, di piipl dem we did du gud an di bad wan dem we kom bak alaiv afi go chos iina Jeuova an du wa im waahn dem fi du ef dem waahn fi gwaan liv fi eva iina di nyuu worl.

Jeuova a no onggl wan Gad we fiil it fi wi wen wi a sofa, bot im a wan fier Gad an im a-go mek shuor se evribadi get jostis. (Dyuu. 32:4; Sa. 33:5) Wen im mek gud an bad piipl kom bak alaiv, a so im a-go mek evribadi si se im lov piipl. An im a-go ekspek evribadi we liv de fi liv di wie ou im waahn dem fi liv. So onggl di piipl dem we get fi lov im an du di sitn dem we im waahn dem fi du a-go get fi liv fi eva iina paradais.