Qilaq kʼaru naxye li Santil Hu chirix aʼin.

Saʼ Hechos 24:15, Wy, naxye naq «teʼwakliiq wiʼ chik chi yoʼyo li tiikebʼ xchʼool ut li inkʼaʼ tiikebʼ xchʼool». Li tiikebʼ xchʼool keʼabʼink chiru li Jehobʼa naq toj maajiʼ nekeʼkamk, joʼkan naq wank li xkʼabʼaʼebʼ saʼ xhuhil li yuʼam (Mal. 3:16). Li inkʼaʼ tiikebʼ xchʼool aʼanebʼ li inkʼaʼ xeʼruuk xnawbʼal ru li Jehobʼa naq xeʼkamk, joʼkan naq li xkʼabʼaʼebʼ maakʼaʼ saʼ xhuhil li yuʼam.

Saʼ Juan 5:28, 29 naʼaatinak chirix wiibʼ li chʼuut li natawmank ajwiʼ saʼ Hechos 24:15, Wy. Li Jesús kixye naq «li xeʼxbʼaanu li us» teʼwakliiq «chi yoʼyo re li yuʼam , ut li xeʼxbʼaanu li inkʼaʼ us teʼwakliiq chi yoʼyo re li tojbʼamaak [raqok aatin]». Li tiikebʼ xchʼool xeʼxbʼaanu li us naq toj maajiʼ nekeʼkamk. Ut teʼwakliiq wiʼ chik chi yoʼyo re li junelik yuʼam xbʼaan naq li xkʼabʼaʼebʼ inkʼaʼ xʼisimank saʼ xhuhil li yuʼam. Abʼanan, li inkʼaʼ tiikebʼ xchʼool, teʼwakliiq wiʼ chik chi yoʼyo arin saʼ li Ruuchichʼochʼ re naq traqmanq aatin saʼ xbʼeenebʼ. Toj maakʼaʼebʼ li xkʼabʼaʼ saʼ xhuhil li yuʼam, ut junsut aj chik teʼyaleʼq rix. Chiru chixjunil li hoonal aʼan, teʼruuq xnawbʼal ru li Jehobʼa ut naru naq teʼtzʼiibʼaaq li xkʼabʼaʼ saʼ xhuhil li yuʼam.

Saʼ Apocalipsis 20:12, 13 naxchʼolobʼ, naq chixjunil li teʼwakliiq wiʼ chik chi yoʼyo tento teʼxpaabʼ «joʼ chanru tzʼiibʼanbʼil saʼebʼ li hu», li naraj xyeebʼal li akʼ chaqʼrabʼ, li tkʼemanq saʼ li akʼ ruuchichʼochʼ. Li inkʼaʼ teʼxpaabʼ teʼsacheʼq ru chi junajwa (Is. 65:20).

Saʼ Daniel 12:2 naxye naq junjunq li ak xeʼkamk teʼwakliiq wiʼ chik chi yoʼyo «re junelik yuʼam, wankebʼ chik re wank saʼ xutaan ut tojbʼamaak chi junajwa [raqok aatin]». Li raqal aʼin naʼaatinak chirix li tkʼulmanq naq teʼwakliiq wiʼ chik chi yoʼyo re: li «junelik yuʼam» malaj «tojbʼamaak chi junajwa [raqok aatin]». Joʼkan naq saʼ xraqik li 1,000 chihabʼ wiibʼ oxibʼ teʼxkʼul li junelik yuʼam ut ebʼ li junchʼol teʼsacheʼq ru chi junajwa (Apoc. 20:15; 21:3, 4).

Li wiibʼ chi chʼuut li teʼwakliiq wiʼ chik chi yoʼyo arin saʼ li Ruuchichʼochʼ naru najuntaqʼeetamank rikʼinebʼ li qas qiitzʼin li nekeʼraj wank saʼ jalan chik tenamit. Li tiikebʼ xchʼool chanchanebʼ li qas qiitzʼin li wankebʼ saʼ jalan chik tenamit, nekeʼkʼeheʼk xhu re kʼanjelak malaj re kanaak saʼ li tenamit aʼan. Joʼkan naq nekeʼruuk chi kʼanjelak ut chi wank aran. Abʼanan, li inkʼaʼ tiikebʼ xchʼool chanchanebʼ li nekeʼxkʼul li hu bʼarwiʼ naxye naq ajlanbʼil kutan teʼruuq chi wank saʼ li tenamit malaj re naq teʼxik chi bʼeek. Re naq teʼruuq chi wank saʼ li tenamit aʼan, tento naq teʼxkʼutbʼesi naq chaabʼilebʼ xnaʼlebʼ. Joʼkan ajwiʼ nakʼulmank rikʼinebʼ li nekeʼraj kanaak saʼ li chʼinaʼusil naʼajej, li inkʼaʼ tiikebʼ xchʼool tento naq teʼxkʼulubʼa li xchaqʼrabʼ li Jehobʼa ut teʼxkʼutbʼesi naq tiikebʼ xchʼool. Maakʼaʼ naxye kʼaru huhil teʼxkʼul, saʼ xnumikebʼ li chihabʼ, naru teʼkanaaq malaj teʼisiiq. Li teʼxbʼaanu tixkʼutbʼesi ma naru nekeʼkanaak saʼ li akʼ tenamit. Joʼkan ajwiʼ tkʼulmanq rikʼinebʼ li teʼwakliiq wiʼ chik chi yoʼyo arin saʼ li Ruuchichʼochʼ, aʼin tbʼaanumanq joʼ chanru li xpaabʼalebʼ ut li xbʼaanuhomebʼ.

Li Jehobʼa moko kaʼaj tawiʼ natawok u, aʼan bʼan ajwiʼ jun Yos tiik xchʼool ut junelik naxbʼaanu li us (Deut. 32:4; Sal. 33:5). Tixkʼutbʼesi li xrahom naq tixwaklesihebʼ wiʼ chik chi yoʼyo li tiikebʼ ut li inkʼaʼ tiikebʼ xchʼool, abʼanan naroybʼeni naq ebʼ aʼin teʼroxloqʼi li xchaqʼrabʼ chirix li us ut li inkʼaʼ us. Kaʼajwiʼ li teʼxra ut teʼxpaabʼ li xchaqʼrabʼ, teʼwanq xyuʼam saʼ li akʼ ruuchichʼochʼ.