Natu ka taleni nghee Ombiibeli tai nyamukula omapulo oo.

Oilonga 24:15 oye tu lombwela kutya otaku ka kala ‘enyumuko lovayuki novalunde.’ Ovayuki ovovo va li hava dulika kuKalunga, ofimbo inava fya. Onghee omadina avo okwa shangwa membo lomwenyo. (Mal. 3:16) Ovalunde ova kwatela mo ovo va fya inava mona omhito ya wana yokulihonga kombinga yaJehova. Onghee omadina avo inaa shangwa membo lomwenyo.

Johannes 5:28, 29 ota ulike keengudu dopavali da faafana naado da tumbulwa mOilonga 24:15. Jesus okwa ti kutya “ava va longa ouwa” otava ka “nyumukila omwenyo, naava va longa owii otava ka nyumukila etokolo.” Ovayuki ova longa ouwa, ofimbo inava fya. Otava ka nyumukila omwenyo, molwaashi omadina avo okwa shangwa nale membo lomwenyo. Ashike ovalunde ova longo owii, ofimbo inava fya. Onghee otava ka nyumukila etokolo. Omadina avo inaa shangwa natango membo lomwenyo, notava ka tokolwa, ile tava ka konakonwa. Momukokomoko wefimbo olo, otava ka mona omhito yokulihonga kombinga yaJehova, nomadina avo otaa ka shangwa membo lomwenyo.

Ehololo 20:12, 13 ola yelifa kutya aveshe ovo tava ka nyumunwa otava ka pumbwa okudulika ‘koinima oyo ya shangwa momishangwatonywa,’ sha hala kutya, keemhango dipe, odo Kalunga te ke tu pa mounyuni mupe. Ovo itava ka dulika kudo, otava ka hanaunwa po. — Jes. 65:20.

Daniel 12:2 okwa xunganeka kutya vamwe ovo va fya otava ka nyumukila “omwenyo waalushe, vakwao okufifwa ohoni noixuna yaalushe.” Ovelishe oyo otai ulike koidjemo yaxuuninwa yovanyumunwa. Otava ka mona “omwenyo waalushe,” ile ‘oixuna yaalushe.’ Onghee hano, pexulilo lomido 1 000, vamwe otava ka mona omwenyo waalushe, ofimbo vamwe tava ka hanaunwa po fiyo alushe. — Eh. 20:15; 21:3, 4.

Natu ka taleni kefaneko tali shikula. Onghalo yeengudu dopavali, odo tadi ka nyumunwa, otai dulu okufaafanifwa novanailongo, ovo va hala oku ka kala koshilongo shimwe. Ovayuki otava faafanifwa naavo va pewa omikanda dokukala moshilongo omolwoilonga, ile dokukala mo ve li ovakalimo, naasho oshe va pe fa emanguluko lonhumba nova tambulwa ko. Mepingafano naasho, ovalunde otava dulu okufaafanifwa novanailongo, ovo va pewa omikanda dokukala moshilongo pakafimbo, ile ve li ovatalelipo. Ovanailongo va tya ngaho, ove na okuulika kutya ova wana okukala moshilongo osho, ofimbo inava pitikwa okukala moshilongo osho shipe. Sha faafana, ovalunde ovo tava ka nyumunwa otava ka pumbwa okudulika keemhango daKalunga nokuulika kutya ovayuki, opo va dule okukala mOparadisa. Kashi na nee mbudi kutya ovanailongo potete ova li va pewa omikanda da tya ngahelipi dokukala moshilongo shimwe, vamwe xuuninwa otashi dulika va ka pewe oukwashiwana, ofimbo vamwe tava ka shunifwa koshilongo shavo. Etokolo laxuuninwa, otali ke likolelela koikala nokelihumbato lavo, eshi ve li moshilongo osho. Sha faafana, etokolo laxuuninwa laaveshe ovo tava ka nyumunwa, otali ke likolelela koudiinini nokelihumbato lavo mounyuni mupe.

Jehova ke fi ashike Kalunga omunalukeno, ndele oKalunga yo omuyuki. (Deut. 32:4; Eps. 33:5) Ota ka ulika ohole yaye, eshi ta ka nyumuna ovayuki novalunde. Pefimbo opo tuu opo, ota ka teelela aveshe va dulike komifikamhango daye dopaenghedi. Ota ka efa ashike ovo ve mu hole nohava dulika komifikamhango daye, ovo va ka twikile okukala mounyuni mupe.