وقىرمان ساۋالدارى
جەر بەتىندە كىمدەر قايتا تىرىلەدى جانە ولارمەن نە بولادى؟
بۇل سۇراقتارعا كيەلى كىتاپ قالاي جاۋاپ بەرەتىنىن قاراستىرايىق.
ەلشىلەردىڭ ىستەرى 24:15 تە «قۇدايدىڭ ادىلدەردى دە، ادىلەتسىزدەردى دە قايتا تىرىلتەتىنى» ايتىلعان. بۇل جەردەگى ادىلدەردىڭ قاتارىنا قايتىس بولعانعا دەيىن قۇدايعا مويىنسۇنعان ادامدار جاتادى. ولاردىڭ ەسىمدەرى ٶمىر كىتابىنا جازىلعان (مالح. 3:16). ال ادىلەتسىزدەرگە ٴتىرى كەزدەرىندە ەحوبا جايلى ٴبىلىم الۋعا جەتكىلىكتى مۇمكىندىكتەرى بولماعان ادامدار جاتادى. ولاردىڭ ەسىمدەرى ٶمىر كىتابىنا جازىلماعان.
ەلشىلەردىڭ ىستەرى 24:15 تەگى ەكى توپ جوحان 5:28، 29 دا دا ايتىلادى. ول جەردە يسا «جاقسىلىق جاساعاندار ٶمىر ٴسۇرۋ ٷشىن، ال زۇلىمدىق جاساعاندار سوتتالۋ ٷشىن تىرىلەتىنىن» ايتقان. ادىلدەر — ٴتىرى كەزدەرىندە جاقسىلىق جاساعاندار. ەسىمدەرى ٶمىر كىتابىنا جازىلعاندىقتان، ولار ٶمىر ٴسۇرۋ ٷشىن قايتا تىرىلەدى. ال ادىلەتسىزدەر — قايتىس بولعانعا دەيىن زۇلىمدىق جاساعاندار. ولار سوتتالۋ ٷشىن تىرىلەدى. ەسىمدەرى ٶمىر كىتابىنا ٵلى جازىلماعاندىقتان، ولار سىناما مەرزىمنەن وتەدى. سول ۋاقىت ارالىعىندا ولارعا ەحوبا جايلى ٴبىلىم الۋعا جانە ەسىمدەرىن ٶمىر كىتابىنا تۇسىرۋگە مۇمكىندىك بەرىلەدى.
ايان 20:12، 13 تەن كورەتىنىمىزدەي، قايتا تىرىلگەندەردىڭ بارلىعىنا «شيىرشىقتا جازىلعاندارعا» مويىنسۇنۋ كەرەك بولادى. بۇل شيىرشىقتار — جۇماقتا بەرىلەتىن جاڭا زاڭدار. وعان مويىنسۇنبايتىندار جويىلادى (يشايا 65:20).
دانيال 12:2 دە ايتىلىپ كەتكەندەي، ٶلىم ۇيقىسىندا جاتقانداردىڭ «كەيبىرى ماڭگى ٶمىر ٴسۇرۋ ٷشىن، ال وزگەلەرى ماسقارا بولىپ، ماڭگىلىك بويى جەككورىنىشپەن ەسكە الىنۋ» ٷشىن ويانادى. بۇل تارماقتا قايتا تىرىلگەندەرگە تۇبىندە قانداي شەشىم شىعارىلاتىنى ايتىلىپ تۇر. دەمەك، مىڭجىلدىقتىڭ سوڭىندا كەيبىرەۋلەرىنە «ماڭگىلىك ٶمىر» بەرىلسە، باسقالارى «ماڭگىلىك بويى جەككورىنىشپەن ەسكە الىنادى»، ياعني ماڭگىلىككە جويىلادى (ايان 20:15؛ 21:3، 4).
مىناداي ٴبىر مىسال قاراستىرايىق: قايتا تىرىلەتىن ەكى توپتىڭ ادامدارى وزگە ەلدە تۇرعىسى كەلەتىن شەتەلدىكتەرگە ۇقسايدى. ادىلدەر جۇمىس ۆيزاسى بار نەمەسە سول ەلدە تۇراقتى تۇرۋعا ارنالعان ۆيزاسى بار ادامدار سياقتى. ۇكىمەت ولارعا قانداي دا ٴبىر شامادا ەركىندىك پەن قۇقىقتار بەرەدى. ال ادىلەتسىزدەر ۋاقىتشا تۇرۋعا ارنالعان نە قوناق ۆيزاسىن العان ادامدار سياقتى. ولار سول ەلدىڭ تۇراقتى تۇرعىنى بولعىسى كەلسە، سوعان لايىقتى ەكەندەرىن دالەلدەۋ كەرەك. ٴدال سول سياقتى، قايتا تىرىلگەن ادىلەتسىزدەر دە جۇماقتا قالا بەرگىلەرى كەلسە، ەحوبانىڭ زاڭدارىمەن ٶمىر ٴسۇرىپ، ٵدىل ەكەندەرىن دالەلدەۋلەرى كەرەك. جالپى، شەتەلدىكتەر العاشىندا جاڭا ەلگە قانداي ۆيزامەن كەلمەسىن، تۇبىندە سول ەلدىڭ ازاماتتىعىن الۋى نە دەپورتاسيالانۋى مۇمكىن. بۇل ولاردىڭ ٴجۇرىس-تۇرىستارى مەن تانىتقان كوزقاراستارىنا بايلانىستى بولادى. سول سياقتى، قايتا تىرىلگەن بارلىق ادامداردىڭ جاڭا دۇنيەدە قالۋ-قالماۋى ولاردىڭ تانىتقان سەنىمدەرى مەن ٸس-ارەكەتتەرىنە بايلانىستى بولادى.
ەحوبا — تەك سۇيىسپەنشىلىكتىڭ قۇدايى ەمەس، ادىلدىكتىڭ دە قۇدايى (مۇس. 5-ج. 32:4؛ ٴزاب. 33:5). ول سۇيىسپەنشىلىگىن ادىلدەردى دە، ادىلەتسىزدەردى دە ٴتىرىلتۋ ارقىلى كورسەتەدى. ەحوبا ولاردان جوعارى مورالدىق نورمالارىن ۇستانادى دەپ كۇتەدى. ەحوبانى سۇيەتىن جانە ونىڭ نورمالارىن ۇستاناتىن ادامدارعا عانا جاڭا دۇنيەدە ٶمىر سۇرە بەرۋگە جول بەرىلەدى.