Ԝәрә бьньһерʹә кӧ щаба Кʹьтеба Пироз чь йә.

Кʹаред Шандийа 24:15 дьбежә кӧ ԝе «һʹәму һәԛ у нәһәԛе» жь мьрьне рʹабьн. Йед һәԛ, демәк йед рʹаст әԝ ьн, йед кӧ пешийа мьрьне гӧрʹа Хԝәде дькьрьн, ләма жи навед ԝан кʹьтеба жийинеда ньвиси нә (Малахи 3:16). Ле кәсед нәһәԛ, демәк нәрʹаст әԝ ьн, йед кӧ мьрьн у мәщала ԝан тʹӧнә бу, ԝәки Йаһоԝа нас кьрана, ләма навед ԝан кʹьтеба жийинеда нәһатьнә ньвисаре.

Йуһʹәнна 5:28, 29 жи бәʹса ве дӧ кʹома дькә, дәрһәԛа кʹижана Кʹаред Шандийа 24:15-да те гьликьрьне. Иса гот кӧ «йед кӧ ԛәнщи кьрьнә ԝе бона жийине рʹабьн, йед кӧ хьраби кьрьнә бона диԝане». Йед рʹаст пешийа мьрьне ԛәнщи дькьрьн. Әԝана ԝе бона жийине рʹабьн, чьмки навед ԝан һе кʹьтеба жийинеда ньвиси нә. Ле йед нәрʹаст пешийа мьрьне хьраби дькьрьн. Ләма жи, әԝана ԝе бона диԝане рʹабьн. Навед ԝан кʹьтеба жийинеда һе нәһатьнә ньвисаре, ләма жи әԝана ԝе сәр ԝәхтәке бенә диԝанкьрьне у щерʹьбандьне. Ԝи чахи мәщала ԝан ԝе һәбә кӧ Йаһоԝа нас кьн у навед хԝә кʹьтеба жийинеда бьдьнә ньвисандьне.

Әʹйанти 20:12, 13 зәлал дькә, ԝәки һʹәму кәсед кӧ жь мьрьне ԝе бенә рʹакьрьне гәрәке гӧһ бьдьн тьштед «кʹьтебада ньвисар», демәк ԛанунед кӧ дьнйа тʹәзәда ԝе бенә дайине. Кәсед кӧ гӧһ нәдьн Йаһоԝа у ԛанунед ԝи, ԝе кʹӧта бьн һәрʹьн (Ишайа 65:20).

Данийел 12:2, ИМ, пʹехәмбәрти кьрьбу кӧ һьнә кәсед кӧ хәԝа мьрьнеда ньн, ԝе «бьгьһижьн жийина һәрһәйи» һьнәк жи «шәрмәзар бьбьн у бәр бь жийинәкә рʹурʹәшва бенә шандьн». Әв рʹез бәʹса ахьрийа рʹакьрьна ԝан дькә, демәк әԝана ԝе бенә диԝанкьрьне, ԝәки йан «жийина һәрһәйи» бьстиньн йан жи һәрһәйи «жийинәкә рʹурʹәш» бьстиньн. Демәк, хьлазийа 1 000 сали, һьнәк ԝе жийина һʹәта-һʹәтайе бьстиньн, һьнә кәс жи ԝе сәр һʹәта-һʹәтайе бенә ԛьрʹкьрьне (Әʹйанти 20:15; 21:3, 4).

Ԝәрә дина хԝә бьдә ве мәсәле. Һʹале ван дӧ кʹомед кӧ ԝе бенә рʹакьрьне мина һʹале хәрибед кӧ дьхԝазьн дәрбази ԝәлатәки дьн бьн. Йед рʹаст мина ԝан кәса нә, изьна кʹижана һәйә хәбате бьстиньн йан жи бьбьнә бажарванед ԝи ԝәлати. Йед нәрʹаст мина ԝан хәриба нә, йед кӧ тʹәне визәйа туристи дьстиньн. Пешийа кӧ әԝ изьне бьстиньн кӧ ԝи ԝәлатида бьминьн, гәрәке әԝана избат кьн ԝәки һежайи ве йәке нә. Мина ве йәке, сәва кӧ мәрьвед нәрʹаст паши рʹабуна жь мьрьне Щьнәтеда бьжин, ԝе лазьм бә кӧ әԝана гӧһ бьдьнә ԛанунед Йаһоԝа у избат бькьн, ԝәки әԝ ида бунә кәсед рʹаст. Ӧса жи, кәсед хәриб сәрида чь щурʹә визәйе бьстиньн жи, дьбәкә һьнәк ԝәʹдә шунда бьбьнә бажарванед ԝедәре, ле һьнәк дьбәкә жь ԝәлет бенә дәрхьстьне жи. Ахьрийа ԝан ԝе ньһерʹандьн у рʹабун-рʹуньштьна ԝанва гьредайи бә. Мина ве йәке, ахьрийа кәсед кӧ дьнйа тʹәзәда жь мьрьне бенә рʹакьрьне, ԝе бь амьни у рʹабун-рʹуньштьна ԝанва гьредайи бә.

Йаһоԝа нә тʹәне Хԝәдайе дьлрʹәʹм ә, ле Хԝәдайе һәԛ у рʹастийе йә жи (Ԛануна Дӧщари 32:4; Зәбур 33:5). Әв йәк кӧ Әԝе һьм кәсед рʹаст, һьм жи кәсед нәрʹаст жь мьрьне рʹакә, ԝе һʹьзкьрьна ԝи нишан кә. У һәмьки әԝе бьхԝазә, кӧ һәр кәс гӧһ бьдә ԛанунед ԝи, ле әԝе тʹәне кәсед кӧ ԝи һʹьз бькьн у гӧһдарийа ԛанунед ԝи бькьн, дьнйа тʹәзәда бьһелә.