Kontonon mudy Bibl waalabul majooj aam.

Myand Yilongel Bapostol 24:15, NWT wiitwambambil neey kwiiyiiy kwiikal “kusanguk kwa baat bawaakan ni bakiish bawaakan.” Baat bawaakan i aab bady bakookoyel Mawej kuuhal kwa kabay banj kufw, nook majin maabab i mafund mu mukand a buumy. (Mal. 3:16) Mu baat bakiish bawaakan mudy aab bafwiil baakady kabay bahetok mushind a kulong myand habitaatal Yehow, nook majin maabab kamiishoh bend mafund mu mukand a buumy.

Jah 5:28, 29 uleeleeb bwa bisumbw bibidy byaakaabumw eeby bidyobw baleej mu Myand Yilongel Bapostol 24:15. Yeez uleeleeb neey: “aab baakady balong myand yilengel” biiyiiy kusanguk, nook biiyiiy “kusanguk bwa kuhetobw buumy, ni bakwaabw baakady balong myand yibiih biiyiiy kusanguk bwa kwiibafwiijobw naay [bwa kwiibalumbulwiishobw].” Baat bawaakan baakady balong myand yilengel hacyaakadyobw ni buumy, tuleeb neey haakadyobw kabay banj kufw. Biiyiiy kwiibasangul bwa kuhetobw buumy bwaal majin maabab maakady mafund mu mukand a buumy. Ki, baat bakiish bawaakan baakady balong myand yibiih hacyaakadyobw kabay banj kufw. Biiyiiy kusanguk bwa kwiibalumbulwiishobw. Majin maababw kabiish banj kwiimafund mu mukand a buumy, ni biiyiiy kufik ku ciisang cya kwiibalumbulwiishobw, eecy ciisang ciikalobw mwa kuhit ku diiteet. Ha ciisang aacy, biiyiiy kuhet mushind a kulong myand habitaatal Yehow ni bwa kulong bwa bafund majin maabab mu mukand a buumy.

Myand Yisokolweel 20:12, 13 umvumvwiij neey boos biiyiiy kusanguk, bikaam biiy bakooyel “ku byaakady bifund mu mikand [myand yaakady yifund mu mivung],” i bwiin kuleeb neey, mikenj yihyaayihy yiiyiiy kwiitwaakish Mawej mu bulongolody buhyaabuhy. Yehow wiiyiiy kubutul aab bakiish bakooyel.​—Ye. 65:20.

Danyel 12:2 uleebel neey bamw ba ku aab bacidy balaal mu majaamw biiyiiy kubuuk, aab “bwa kuhetobw buumy bwa mwendelel, bakwaabw bwa kwiibakwaacishobw bumvw ni bwa kumvwobw mooy a mwendelel.” Verseh oow uleeleeb bwa kulumbulwiish kwa bulekel kwa biiyiiyobw kusangul​—bwa “buumy bwa mwendelel” eecy bwa “kumvwobw mooy a mwendelel.” Nook ku bulekel kwa mivw 1 000, bamw biiyiiy kuhet buumy bwa mwendelel ni bakwaabw biiyiiy kwiibabutul buyiil.​—Yis. 20:15; 21:3, 4.

Kontonon cileejel eecy. Shikacil wa bisumbw bya baat bibidy biiyiiyobw kusanguk tudy mwa kwiibafwanyikij ni wa beeny bady bakat kashikat mu cibunj cikwaabw. Baat bawaakan bady bu aab bady bahet viza wa mudimw (mukand udyobw biitabil muut bwa kutweeley mu cibunj cikwaabw) eecy viza wa kushikat mu cibunj cikwaabw udy mwa kulong bwa biibamanyik ni bwa kwiikalok ni bwiiyikadil. Ki, baat bakiish bawaakan bady bu beeny bady mwa kuhet viza wa mafuk makeeh eecy viza wa muut mweeny ukuukumbul. Beeny ba mushind oow bikaam biiy bijaadikil kaayaabw kuuhal kwa kwiibitabilobw bwa kutungunuk ni kwiikal mu cibunj cyeeny. Bya mushind aakaabumw, bikaam baat bakiish bawaakan biiyiiyobw kusangul, bakooyel mikenj ya Yehow ni baleej kaayaabw ni bikaam baleej mu bilong byaab mudyobw bawaakan bwa bab kuhet mushind a kushaal mu Paradiz. Ni bidy mwa kwiikal neey neey beeny bady mwa kwiikal bahet viza kuuhal kwa kulong lwend bwa kuy mu cibunj cikwaabw, bamw bady mwa kwiiy kwiibitabil bwa kushaal bwa kushikatobw mu cibunj cyeeny ni bashaal biin mwiin aamw ni bakwaabw bady mwa kwiibihat. Bwa kwangatobw dihandik dya bulekel bwaabab, biiyiiy kutal cidyobw ni biikadil byaabab mu cibunj cyeeny. Bya mushind aakaabumw, kulumbulwiish kwa bulekel bwa aab boos biiyiiyobw kusangul kwiiyiiy kwiimanyin ha lulamat lwaabab ni bilong byaabab mu bulongolody buhyaabuhy.

Yehow kiin teng Mawej udy ni lukat ki udy cikwaabw Mawej a myand yiwaakan. (Mmu. 32:4; Mis. 33:5) Wiiyiiy kuleej lukat lwindiy hakusangul bawaakan ni bakiish bawaakan. Ni i mukat bwa boos bakooyel mikenj yindiy ya cidy cilengel ni ya cidy cibiih. Teng aab biiyiiy kumukat ni kukooyel mikenj yindiy, wiiyiiy kwiibitabil bwa kutungunuk ni kwiikal mu bulongolody buhyaabuhy.