Lhangira ngoku e Biblia yikasubiraya ebibulyo ebi.

Emibiri 24:15 hakathubwira hathi hasyabya ‘erilhubuka ly’abathunganene n’ababi [“abathathunganene,” NWT].’ Abathunganene bababya bakowa Nyamuhanga bathe baholha, neryo amena wabu anahandikire omo kitabu ky’engebe. (Mal. 3:16) Abathathunganene mwamuli abaholha isibathabana akaghisa akakaghunza ak’erigha oku Yehova, neryo amena wabu syahandikire omwa kitabu ky’engebe.

Yoane 5:28, 29 naho hakakanaya okwa syogurupu ibiri esine omwa Emibiri 24:15. Yesu akabugha athi ‘abakolha emibiiri mibuya basyalhubuka oko ngebe, n’abakolha ebibi basyalhubuka oko lhubanza lhw’eritswerwa.’ Abathunganene mubakolha ebibuya bathe baholha. Bakendi syalhubuka oko ngebe kundi amena wabu akinahandikire omo kitabu ky’engebe. Aliwe, abathathunganene mubakolha ebibi bathe baholha. Bakendi syalhubukira oko lhubanza lhw’eritswerwa. Amena wabu syali ahandikwa omo kitabu ky’engebe, kandi bakendi syahebwa obuthuku bw’eritswerwa, kutse obw’erilengesibwa. Omwa buthuku obo, bakendi syahebwa akaghisa k’erigha oku Yehova neryo amena wabu iniahandikwa omo kitabu ky’engebe.

Eribisulirwa 20:12, 13 hakasoborera hathi abosi abakendi syalhubuka bakendi syayithagha erighendera oko “myatsi eyisakire omo bitabu,” ni bugha ambu, ebilhaghiro bihyaka ebikendi syaghenderwako omwa kihugho kihya-kihya. Abathendi syabighenderako bakendi syalhusibwamo.​—Isa. 65:20.

Danieli 12:2 hakalhaghulha hathi abaghuma b’okwa baghotsere omo lhuholho bakendi syabuka “busana n’engebe y’erikotha, nikwa abandi busana n’erihemuka n’esyonye sy’erikotha.” Omulhondo oyu akakanaya okwa ky’erighunzerera ekikendisyabya bakalhubuka​—‘engebe y’erikotha’ kutse ‘esyonye sy’erikotha.’ Neryo kwesi okw’ihwererera ly’emyaka 1,000, abandi bakendi syabana engebe y’erikotha; abandi ibathoghothibirwa ighuma.​—Erib. 20:15; 21:3, 4.

Thalengekania okwa ky’erileberyako kino. Emibere ey’esyogurupu ibiri esi esikendi syalhubukibwa yangana linganisibwa n’emibere y’ab’ehandi balimo abanzire erikalha omo kindi kihugho. Abathunganene bali ng’abakahebawa eviza y’omubiiri kutse ey’eribya ndulhani eyikaleka ibabana eriminywa omwa bilhaghiro n’eribya n’obwiranda bulebe. Mbaghane n’ekyo, abathathunganene bali ng’ab’ehandi abanga hebwa eviza ey’obuthuku buke kutse ey’eribya bagheni. Ab’ehandi ng’abo ibakendi tsuka erikangania emibere eyikendi leka ibalighirwa erilholha embere eribya omo kindi kihugho ekyo. Kuthya, abathathunganene abakendi syalhubuka bakendi syayithagha eriligha ebihano bya Yehova n’erikangania emibiiri y’erithunganene nuku basighale omo Paradiso. Mbulha ab’ehandi abo mubatsuka erihebwa eviza eyiri yithi bakalighirwa eringira omo kindi kihugho, erighunzerera abandi bangana hebwa ey’eribya ndulhani n’abandi ibasubibwayo. Eki ikikendi sighikira okwa malengekania agho bawithe n’emibere yabu omwa kindi kihugho ekyo. Neryo kuthya, erikirirya n’emibere eyo abosi abakendisyalhubuka bakendi syakangania omo kihugho kihya-kihya y’eyikendi syaleka ibasighalha mukyo.

Si bugha ambu Yehova ni Nyamuhanga oyukakwira abandu b’obulighe lisa aliwe kandi ni Nyamuhanga w’obulingirirania. (Ebi. 32:4; Esy. 33:5) Akendi syakangania olhwanzo lhwiwe omw’ilhubukya abathunganene n’abathathunganene. Kandi akendi syalhangira athi ebihano biwe eby’esyongeso bikabya ibineho. Abakendisya mwanza n’erighendera okwa bihano biwe basa babakendi syalighirwa erilholha embere erikalha omo kihugho kihya-kihya.