Monai Baibolo byo akumbula ano mepuzho.

Kinembelo kya Byubilo 24:15 kitubuula’mba “kukekala lusanguko lwa baoloka ne babula koloka.” Baoloka ke bantu bakookelanga saka bakyangye kufwa kabiji mazhina abo anembwa mu buku wa bumi. (Mala. 3:16) Bantu babula koloka bavwangamo bantu bafwile kwakubula kwikala na kimye kyawaina kya kufunda pe Yehoba kabiji mazhina abo kechi anembwa mu buku wa bumi ne.

Kinembelo kya Yoano 5:28, 29 kyaamba pa ano mabumba abiji o batongola pa kinembelo kya Byubilo 24:15. Yesu waambile’mba “aba baubilenga byawama bakasangukila ku bumi, ne boba baubilenga byatama bakasangukila ku kije.” Baoloka baubilenga bintu byawama saka bakyangye kufwa. Bano bakasangukila ku bumi mambo mazhina abo anembwa mu buku wa bumi. Bino babula koloka baubilenga bintu byatama saka bakyangye kufwa. Bano bakasangukila ku kije. Mazhina abo kechi anembwa mu buku wa bumi ne. Onkao mambo, bano bakebapa kimye kya kwi bapimapima ne kumona inge babena kuba bintu byaoloka. Mu kyonkakya kimye bakafunda pe Yehoba kabiji mazhina abo akanembwa mu buku wa bumi.

Kinembelo kya Lumwekesho 20:12, 13 kyalumbulula’mba bantu bonse bakasangulwa bafwainwa kukookela bintu ‘byanembwa mu mivungilo’ nangwa’mba mizhilo Yehoba yo aketupa mu ntanda ipya. Bonse bakabula kukookela ino mizhilo Yehoba ukebonauna.—Isa. 65:20.

Danyela 12:2 witubuula’mba bantu balaala mu lufu bakasangukila “ku bumi bwa myaka ne myaka, bakwabo bakebalengesha bumvu ne bakwabo bakebazhachisha myaka ne myaka.” Kino kyepelo kyaamba pa bantu “bakasangukila ku bumi bwa myaka ne myaka” ne “bakasangukila kuluzhachisho lwa myaka ne myaka.” Onkao mambo, ku mpelo ya myaka 1,000 bamo bakatambula bumi bwa myaka ne myaka bino bakwabo nabo bakebonaunatu pelu.—Lum. 20:15; 21:3, 4.

Akilangulukai pa kino. Ano mabumba abiji a bakasangulwa twakonsha kwiesakanya ku bantu bakeba kuya na kwikala mu kyalo kikwabo. Baoloka baji nobe bantu baji na kitupa kya kwibaswisha kwikala ne kwingila mu kyalo kikwabo. Nangwa baji na kitupa kya kwibayukanyikisha ku kafulumende ne kwibaswisha kwikala bulongo mu kyalo kikwabo. Pakuba babula koloka baji nobe bantu baji na kitupa bo baswisha kwikala mu kyalo kingi pa kimye kacheche. Bano bantu batwela mu kyalo kikwabo bafwainwa kutwajijila kwikala na byubilo byawama pakuba bebaswishe kutwajijila kwikala mu kyokyo kyalo. Bino byo byafwainwa ne kwikala bantu babula koloka bakasangulwa. Bafwainwa kukookela mizhilo ya Lesa ne kutwajijila kwikala na byubilo byawama bikalengela kubula kwibapanga mu paladisa. Bamo bakonsha kwibaswisha kutwajijila kwikala mu kyalo kabiji bakwabo bakonsha kwibapangamo, kechi na mambo a kitupa kyo baingijishe pa kutwela mu kyalo ne. Byubilo byabo byafwainwa kwibalengela kutwajijila kwikala mu kyalo kingi nangwa ne. Kyo kimotu, bakasangulwa nabo pa kuba’mba bakatwajijile kwikala mu ntanda ipya bafwainwa kutwajijila kwikala na byubilo byawama ne kwikala na lwitabilo lwakosa.

Yehoba ke Lesa wa butemwe bubula kwaluka ne buchibamambo waoloka. (Mpitu. 32:4; Sala. 33:5) Ukasangula bantu baoloka ne babula koloka na mambo a kuba’mba wibatemwa. Pano bino, ukakeba’mba bonse bakakookelenga mizhilo yanji yaamba pa kyawama ne kyatama. Kabiji ukaswishatu bantu bamutemwa ne bamukookela kutwajijila kwikala mu ntanda ipya.