Lɛ wi tɔk bɔt aw di Baybul ansa dɛn kwɛstyɔn dɛn ya.

Akt 24:​15 tɛl wi se “di wan dɛn we du wetin rayt ɛn di wan dɛn we nɔ du wetin rayt go gɛt layf bak.” Di wan dɛn we du wetin rayt na di wan dɛn we bin de obe Gɔd bifo dɛn day, so dɛn nem dɛn de insay di buk we de sho se pɔsin go gɛt layf. (Mal. 3:​16) Di wan dɛn we nɔ du wetin rayt na di wan dɛn we nɔ bin gɛt bɛtɛ chans fɔ lan bɔt Jiova bifo dɛn day, so dɛn nem dɛn nɔ de na di buk we de sho se pɔsin go gɛt layf.

Jɔn 5:​28, 29 tɔk bɔt di sem tu grup dɛn we Akt 24:​15 tɔk bɔt. Jizɔs bin se “di wan dɛn we bin du gud tin dɛn” go “gɛt layf bak fɔ liv, ɛn di wan dɛn we bin de du wikɛd tin dɛn go gɛt layf bak fɔ mek dɛn jɔj dɛn.” Di wan dɛn we du wetin rayt bin de du gud tin dɛn bifo dɛn day. Dɛn go gɛt layf bak fɔ liv bikɔs dɛn nem dɛn stil de na di buk we de sho se pɔsin go gɛt layf. Bɔt di wan dɛn we nɔ du wetin rayt bin de du wikɛd tin dɛn bifo dɛn day. Dɛn go gɛt layf bak fɔ mek dɛn jɔj dɛn. Dɛn nem dɛn nɔ de yet na di buk we de sho se pɔsin go gɛt layf, ɛn da tɛm de, dɛn go jɔj dɛn, ɔ wach di we aw dɛn de biev. Da tɛm de, dɛn go gɛt di chans fɔ lan bɔt Jiova fɔ mek dɛn rayt dɛn nem dɛn na di buk we de sho se pɔsin go gɛt layf.

Rɛvɛleshɔn 20:​12, 13 ɛksplen se ɔl di wan dɛn we go gɛt layf bak go nid fɔ obe di “tin dɛn we rayt na di skrol,” dat na, di nyu lɔ dɛn we Gɔd go gi wi na di nyu wɔl. Jiova go dɔnawe wit di wan dɛn we nɔ de obe.—Ayz. 65:​20.

Daniɛl 12:​2 (NWT) bin tɔk bɔt sɔm pipul dɛn we dɔn day we go wek. Sɔm go “gɛt layf we go de te go ɛn ɔda wan dɛn go shem ɛn dɛn go et dɛn sote go.” Dis vas tɔk bɔt di las jɔjmɛnt we dɛn go pas pan di wan dɛn we go gɛt layf bak. Sɔm go gɛt “layf we go de te go” ɔ “dɛn go et dɛn sote go.” So bay di tɛm di 1,000 ia go dɔn, sɔm go gɛt layf sote go ɛn dɛn go dɔnawe wit di ɔda wan dɛn kpatakpata.—Rɛv. 20:​15; 21:​3, 4.

Tink bɔt dis ɛgzampul. Wi go kɔmpia wetin go apin to di tu grup dɛn we go gɛt layf bak to wetin go apin to pɔsin we want fɔ go liv na ɔda kɔntri. Di wan dɛn we du wetin rayt tan lɛk di wan dɛn we go gɛt visa fɔ wok ɔ visa fɔ de na di kɔntri, ɛn dat de gi dɛn chans fɔ mek dɛn sabi dɛn ɛn fɔ mek dɛn gɛt fridɔm. Bɔt di wan dɛn we nɔ du wetin rayt tan lɛk fɔrina dɛn we go gɛt visa fɔ de na di kɔntri fɔ shɔt tɛm ɔ visa fɔ pɔsin we kam waka. Dɛn kayn fɔrina dɛn de go nid fɔ pruv se dɛn na gud pipul dɛn bifo dɛn go alaw dɛn fɔ de na di nyu kɔntri. Semweso, di wan dɛn we nɔ du wetin rayt we go gɛt layf bak go nid fɔ obe Jiova in lɔ dɛn ɛn pruv se dɛn want fɔ du wetin rayt fɔ lɛ dɛn kɔntinyu fɔ de na Paradays. Ɛn ilɛk uskayn visa pɔsin gɛt we i kam na ɔda kɔntri, as tɛm de go, sɔm kin leta bi sitizin ɛn dɛn kin sɛn ɔda wan dɛn go bak na dɛn kɔntri. Di we aw dɛn de biev ɛn di tin dɛn we dɛn de du na di nyu kɔntri na in go mek dɛn alaw dɛn fɔ de na di nyu kɔntri ɔ dɛn sɛn dɛn go bak na dɛn kɔntri. Semweso, di tin we go mek ɔl di wan dɛn we go gɛt layf bak kɔntinyu fɔ de na di nyu wɔl gɛt fɔ du wit aw dɛn fetful to Jiova ɛn di we aw dɛn biev.

Pan ɔl we Jiova na Gɔd we gɛt sɔri-at, in na Gɔd we de du tin tret ɛn we fia. (Dit. 32:​4; Sam 33:​5) I go sho in lɔv bay we i go gi layf bak to di wan dɛn we du wetin rayt ɛn di wan dɛn we nɔ du wetin rayt. Bɔt i go ɛkspɛkt dɛn ɔl fɔ obe wetin i se bɔt wetin rayt ɛn wetin rɔng. Na jɔs di wan dɛn we lɛk am ɛn we go du wetin i want dɛn go alaw fɔ kɔntinyu fɔ de na di nyu wɔl.