Beto tadila mutindu Biblia mepesa bamvutu na biuvu yango.

Bisalu 24:15 metubila beto ti yakevuanda na ‘mfutumukunu ya bantu ya lunungu mpe ya bantu mekondua lunungu.’ Bantu ya lunungu kele bantu yina zitisaka Nzambi tekila bakufua, na yau bankumbu na bau kele ya kusonama na mukanda ya luzingu. (Mal. 3:16) Bantu mekondua lunungu mesangisa bantu yina kufuaka kondua kubaka diluaku ya kulonguka kuzaba Yehova, na yau bankumbu na bau kele ya kusonama ve na mukanda ya luzingu.

Yoane 5:28, 29 kena kutubila kaka bagrupe yango zole yina Bisalu 24:15 metubila. Yesu tubaka ti “bayina salaka mambu ya mbote” kefutumuka ‘samu na mfutumukunu ya luzingu, mpe bayina salaka mambu ya yimbi samu na mfutumukunu ya kusambisa.’ Bantu ya lunungu salaka mambu ya mbote tekila bakufua. Bakefutumuka samu na mfutumukunu ya luzingu samu bankumbu na bau kele kaka ya kusonama na mukanda ya luzingu. Kasi, bantu mekondua lunungu salaka mambu ya yimbi tekila bakufua. Bakefutumuka samu na mfutumukunu ya nsambusulu. Bankumbu na bau sonama ntete ve na mukanda ya luzingu, mpe bakelutisa ntangu mosi ya nsambusulu to ntangu ya kumekama. Na ntangu yango, bakevuanda na diluaku ya kulonguka mambu metadila Yehova mpe kusonama ya bankumbu na bau na mukanda ya luzingu.

Kusonga 20:12, 13 mesasila ti bantu nionso yina kefutumuka kezitisa ‘mambu yina sonamaka na barulo,’ yina kele, bansiku ya yimpa yina Nzambi kepesa beto na yinza ya yimpa. Yehova kekufua bantu nionso yina kezitisa ve.—Yez. 65:20.

Daniele 12:2 kesamunaka ti bantu yankaka yina kele ya kuleka na diziami kelamuka ‘samu na mfutumukunu ya luzingu mpe bayankaka samu na nsoni mpe mvuezolo ya mvula na mvula.’ Verse yango kena kutubila nsambusulu ya nsuka yina kesalama samu na bantu yina kefutumuka—“luzingu ya mvula na mvula” to ‘mvuezolo ya mvula na mvula.’ Na yau, na nsuka ya Luyalu ya bamvula 1000, bantu yankaka kebaka luzingu ya mvula na mvula mpe bantu yankaka kekufua samu na mvimbamvimba.—Kus. 20:15; 21:3, 4.

Beto tadila kifuani yayi. Beto lenda fuanikisa kufutumuka ya bagrupe yango zole lokola banzenza yina kele na nsatu ya kukuenda zinga na buala yankaka. Bantu ya lunungu kele lokola bantu yina kebaka viza samu na kukuenda sala kisalu to viza samu na kukuma bana ya buala yango, mpe yakepesaka bau dikoki ya kuvuanda na mua kimpuanza. Kasi, bantu mekondua lunungu kele lokola banzenza yina mebaka viza ya kuvuanda na buala yango samu na mua ntangu to viza ya kinzenza. Banzenza yango fueti monisa bau mosi ti bamebonga na bikadulu na bau, tekila babaka yinsua ya kutatamana kuzinga na buala yango ya yimpa. Mutindu mosi, bantu mekondua lunungu yina kefutumuka kevuanda na nsatu ya kuzitisa bansiku ya Yehova mpe kumonisa ti bakele bantu ya lunungu samu babikana na Paradiso. Yavuanda na ebandeli banzenza yango mebaka viza samu na kukuma bana ya buala yango to viza ya kinzenza, nsukansuka bayankaka lenda ndimama samu na kukuma bana ya buala, nzokande balenda kuka bayankaka na buala. Nzengolo ya nsuka yina kebakama samu na bau kesimbama na kutadila bikadulu yina bakemonisa na buala yango ya yimpa. Mutindu mosi, nsambusulu ya nsuka samu na bantu yina kefutumuka kesalama na kutadila kukuikama mpe bikadulu na bau na yinza ya yimpa.

Yehova kele kaka ve Nzambi yina kewilaka bantu kiadi kasi yandi kele diaka Nzambi ya lunungu. (Kul. 32:4; Nk. 33:5) Yandi kemonisa nzola na yandi na kufutumunaka bantu ya lunungu mpe bantu ya kukondua lunungu. Kasi yandi kelomba na bantu yango nionso bazitisa bansikudukusu na yandi na yina metadila mbote mpe yimbi. Kaka bantu yina kezola yandi mpe yina kezinga na nguizani na bansikudukusu na yandi nde kebaka yinsua ya kutatamana kuzinga na yinza ya yimpa.