Beto tala bamvutu yina Biblia ke pesá na byuvu yayi.

Bisalu 24:15 ke zonzá na beto ti ‘bantu ya lunungu mpe bantu ya kukondwa lunungu ke vumbuka na lufwa.’ Bantu ya lunungu ke bantu yina tumamá na Yehova tekila ba kufwa. Na yawu, bankumbu ya bawu ke ya kusonama na dibuku ya luzingu. (Mal. 3:16) Na kati ya bantu ya kukondwa lunungu, ya ke na ba yina kuzwá ve bweso ya kuzaba Yehova tekila ba kufwa. Na yawu, bankumbu ya bawu ke ve na dibuku ya luzingu.

Yoane 5:28, 29 ke zonzilá bimvuka zole ya bantu yina Bisalu 24:15 mpe ke zonzilaka. Yesu zonzá ti “bayina salaka mambu ya mbote ke vumbuka na lufwa samu na kuzwa luzingu, mpe bayina salaka mambu ya yimbi ke vumbuka na lufwa samu na lufundusu.” Bantu ya lunungu salá bamambu ya mbote tekila ba kufwa. Bankumbu ya bawu ke ya kusonama na dibuku ya luzungu. Na yawu, ba ke vumbuka samu na kuzwa luzingu. Kasi bantu ya kukondwa lunungu salá bamambu ya yimbi tekila ba kufwa. Ba ke vumbuka na lufwa samu na lufundusu. Bankumbu ya bawu ke ntete ve ya kusonama na dibuku ya luzingu mpe ba ke lutisa ntangu ya lufundusu. Ya zola zonza ti ba ke tala bawu mbote-mbote na bamambu yina ba ke sala. Na kati ya ntangu yina, ba ke kuzwa bweso ya kulongoka kuzaba Yehova, mpe Yehova lenda sonika bankumbu ya bawu na dibuku ya luzingu.

Luzabusu 20:12, 13 ke lakisá ti bantu nyonso yina ke vumbuka na lufwa ke vanda na nsatu ya kutumama na mambu yina ke “ya kusonama na mabuku.” Mabuku yayi ke na misiku ya malu-malu yina Yehova ke pesa beto na yinza ya malu-malu. Yehova ke kufwa ba yina ke tumama ve na misiku yayi.—Iza. 65:20.

Danyele 12:2 ke zonzá ti ya ke na ba yina ke vumbuka na lufwa ‘samu na luzingu ya mvula na mvula mpe ba ya nkaka samu na nsoni mpe samu na kuvweza ya mvula na mvula.’ Verse yayi ke zonzilá yinki ke salama na nsuka samu na bantu yina ke vumbuka na lufwa: ‘luzingu ya mvula na mvula,’ to ‘kuvweza ya mvula na mvula.’ Na yawu, na nsuka ya bamvula 1000, ya ke na ba yina ke kuzwa luzingu ya ntangu nyonso mpe ba ya nkaka, ba ke kufwa bawu samu na ntangu nyonso.—Luz. 20:15; 21:3, 4.

Bimvuka zole ya bantu yina ke vumbuka ke mutindu bantu yina me kwenda zinga na bwala ya nkaka. Bantu ya lunungu ke mutindu ba yina me kuzwa mukanda samu na kusala to samu na kuzinga na bwala yina. Na mikanda yango, ba lenda sala bamambu mingi. Kasi bantu ya kukondwa lunungu ke mutindu banzenza yina ba me pesa visa na kuzinga na mwa ntangu fioti na kati ya bwala. Banzenza yina me fwana kulakisa na bamambu yina ba ke sala ti, ba lenda pesa bawu nzila ya kuvanda na bwala yango samu na bantangu mingi. Mutindu mosi, bantu ya kukondwa lunungu yina ke vutuka na luzingu me fwana kutumama na misiku ya Yehova, mpe kusala bamambu ya lunungu samu ba bikana na kati ya paradiso. Ya vanda banzenza yina me kuzwa mukanda ya kuzinga na bwala, to ba yina me kuzwa visa samu na kuvanda na mwa ntangu fioti, na nsuka, ba ya nkaka lenda kuzwa mukanda ya bwala, mpe ba ya nkaka, ba lenda bingisa bawu. Ni bamambu yina ba ke sala ke nata luyalu na kubingisa bawu, to kupesa bawu mukanda ya bwala. Mutindu mosi mpe, ni kukwikama mpe ndyatulu ya ba yina ke vumbuka na lufwa na yinza ya malu-malu ke nata Yehova na kubaka mukanu samu na bawu.

Yehova ke ve kaka Nzambi yina ke tadilá bantu kyadi. Kasi yandi ke mpe Nzambi ya lunungu. (Kul. 32:4; Nku. 33:5) Yandi ke lakisa luzolo ya yandi na kuvumbulá bantu ya lunungu mpe bantu ya kukondwa lunungu. Kasi yandi ke vingila ti bawu nyonso tumama na misiku ya yandi na yina me tadila mbote mpe yimbi. Kaka ba yina ke zola yandi mpe ke tumama na yandi ke kuzwa bweso ya kubikana na yinza ya malu-malu.