Amubone Baibo mboikumbula miipusho iyi.

Milimo 24:15 ilaamba ayi “kulaakuba kubuka kwa bantu baluleme abataluleme.” Baluleme mbaabo bakalinga kunyumfwila Lesa kabatana kufwa, aboobo meenaabo alilembetwe mulibuku lya buumi. (Mala. 3:16) Bataluleme baleelikaawo abaabo bakafwa kabatana kuba acoolwe cikwene cakwiiya pali Yehova, aboobo meenaabo taakwe kulembwa mulibuku lya buumi.

Joni 5:28, 29 ilaamba pa makoto obilo eenka aambwa palilembo lya Milimo 24:15. Yesu wakaamba ayi ‘abo bakalinga kucita shibotu balaakubukila kubuumi, abalo bakalinga kucita shibiibi balaakubukila kukoomboloshekwa.’ Baluleme bakalinga kucita shintu shibotu kabatana kufwa. Balaakubukila kubuumi mukwiinga meenaabo alilembetwe mulibuku. Nacibi boobo, bataluleme bakalinga kucita shintu shibiibi kabatana kufwa. Balaakubukila kukoomboloshekwa. Meenaabo talembetwe mulibuku lya buumi, alimwi balaakwiinda muciindi ca boomboloshi na kupekwa ciindi cakweeleshekwa. Paciindi ico, balaakuba acoolwe cakwiiya pali Yehova alimwi akwaamba ayi meenaabo alembwe mulibuku lya buumi.

Ciyubululo 20:12, 13 ilaamba ayi boonse beshibakabushikwe balaakuyandika kunyumfwila “shintu isho shilembetwe mumabuku akupeta,” nkokwaamba ayi, milawo ipya Lesa njeshi akatupe mucishi cipya. Yehova alaakubanyonyoola abo beshi bakabule kunyumfwila.​—Isa. 65:20.

Danyelo 12:2 yakaambila limwi ayi abo boona mulufu balaakubuka, “bamwi balaakubukila kuba abuumi butamaani, sombi bamwi balaakubukila kulenshekwa nsoni akuba cintu ceelete kushibulukwa kwalyoonse alyoonse.” Vesi iyi ilasansulula koomboloshekwa kwakweelaako kwa baabo beshibakabushikwe. Balaakutambula “buumi butamaani”  na ‘kushibulukwa kwamuyayaya.’ Aboobo kumamanino a buleelo bwa myaaka 1,000, bamwi balaakutambula buumi butamaani lyalo bamwi balaakunyonyoolwa kwamuyayaya.​—Ciyu. 20:15; 21:3, 4.

Amuyeeye cikoshanyo ici. Makani aamba pa makoto obilo abaabo beshibakabushikwe inga twaakoshanisha ku beensu basuni kukala mucishi cimwi. Baluleme bali anga mbeensu bapekwa cipepa ca kubasuminisha kusebensa na kukala mucishi cimwi. Cipepa ico cilabapa lwaanguluko alimwi akushibikwa. Mubupusano, bataluleme bali anga mbeensu bakaswa kucishi cimwi beenga bapekwa cipepa ca kubasuminisha kukalabo kwakaciindi na kufwakashabo. Beensu abo kabatana kusuminishikwa kukala mucishi ico inga bayandika kucita shitondesha kwaamba ayi inga beelela kukalaamo. Ubu bweenka mbocibete akubataluleme beshibakabushikwe. Balaakuyandika kukonkela milawo yakwe Yehova akucita shiluleme kwaamba ayi bakatolelele kukala mu Paladaiso. Nabi kwaamba ayi beensu benjila mucishi cimwi inga bapekwa cipepa ca kubasuminisha kufwakasha kwakaciindi na kukala, bamwi mukuya kwaciindi inga bapekwa coolwe ca kukalilila lyalo bamwi inga batandwa. Mibo alimwi ambobabona shintu nsheenga shapa kwaamba ayi bapekwe coolwe ca kukalilila na kutandwa mucishi ico. Aboobo ubu mbweshi cikabe kubaabo boonse beshibakabushikwe. Kushomeka alimwi amibo njeshi bakatondeshe mucishi cipya njeshi ikape kwaamba ayi bakapekwe coolwe ca kutolelela kukala mucishi cipya na kunyonyoolwa.

Yehova ngu Lesa shinkumbu alimwi alacita shintu mubululami. (Duto. 32:4; Kulu. 33:5) Alaakutondesha lusuno lwakwe kwiinda mukubusha baluleme alimwi abataluleme. Nacibi boobo, boonse alaakubalangila kukonkela njiisho shakwe shiluleme. Abo beshi bakatondeshe ayi balimusuni alimwi akukonkela njiisho shakwe, mbweshi akasuminishebo kutolelela kukala mucishi cipya.