Hkʼawꞈ laˇ hkawˇ Liꞈ hpu hkʼaw teˇ geh nyi sheˍ

Tcuh yaˇ liꞈ 24:15 hkʼaw kʼoˆ ve, “hteˇ ve chaw kaꞈ maˇ hteˇ ve chaw kaꞈ kʼawꞈ teꞈ tu la tuˬ yoˬ.” Hteˇ ve chaw lehˬ yawˇ hui maˇ suh sheˍ htaˇ Gʼuiˬ sha ve hkawˇ na yuˬ ve chaw hpehꞈ ve yoˬ. Hkʼe te leh, yawˇ hui ve awˬ meh co tiꞈ ha tiꞈ gʼa tuˬ liꞈ awˬ hkʼaw lo cawˬ ve yoˬ. (Maˍlaˍhkiˆ 3:16) Maˇ hteˇ ve chaw lehˬ yawˇ hui maˇ suh sheˍ htaˇ, Yaˬhoˉvaˬ ve awˬ lawn maˇ gʼa kaˇ jaw ve chaw hpehꞈ ve yoˬ. Hkʼe te leh, yawˇ hui ve awˬ meh co tiꞈ ha tiꞈ gʼa tuˬ liꞈ awˬ hkʼaw lo maˇ cawˬ.

Yoˇhanˬ liꞈ 5:28, 29 hkʼaw kʼoˆ ve, ‘daꞈ ve htaꞈ te ve chaw teˇ hpaˍ lehˬ, a shaꞈ teꞈ ve awˬ pon kʼawꞈ teꞈ tu la tuˬ yoˬ. Haiˬ ve htaꞈ te ve chaw teˇ hpaˍ lehˬ, suhˉ jehˬ tuˬ awˬ pon kʼawꞈ teꞈ tu la tuˬ yoˬ.’  Chaw chi 2 moˍ lehˬ Tcuh yaˇ liꞈ 24:15 hkʼaw kʼoˆ taˍ ve htaꞈ shuˍ ve yoˬ. Yawˇ hui maˇ suh sheˍ htaˇ, daꞈ ve htaꞈ te ve chaw lehˬ kʼawꞈ teꞈ tu la leh a shaꞈ gʼa tuˬ yoˬ. Awˬ lawn kʼo, yawˇ hui ve awˬ meh lehˬ co tiꞈ ha tiꞈ gʼa tuˬ liꞈ awˬ hkʼaw lo cawˬ˗oˬ ve yoˬ. Yaꞈ hkʼaˇ, maˇ suh sheˍ htaˇ, haiˬ ve htaꞈ te ve chaw lehˬ kʼawꞈ teꞈ tu la leh suhˉ jehˬ ve htaꞈ gʼa hkanˍ tuˬ yoˬ. Awˬ lawn kʼo, yawˇ hui ve awˬ meh lehˬ co tiꞈ ha tiꞈ gʼa tuˬ liꞈ awˬ hkʼaw lo maˇ cawˬ. Suhˉ jehˬ piˇ ve awˬ yanˇ htaˇ yawˇ hui te ve awˬ ceuˬ htaꞈ nyi tuˬ yoˬ. Oˇ ve teˇ yanˇ htaˇ, yawˇ hui Yaˬhoˉvaˬ ve awˬ lawn gʼa henˇ leh co tiꞈ ha tiꞈ gʼa tuˬ liꞈ awˬ hkʼaw lo yawˇ hui ve awˬ meh cawˬ keunˍ ve laˇ tehꞈ gʼa hpeuꞈ maw piˇ tuˬ yoˬ.

Hpeuꞈ maˍ ve liꞈ 20:12, 13 hkʼaw kʼoˆ maˍ laˇ ve, kʼawꞈ teꞈ tu la ve chaw teˇ gʼaˇ le le “liꞈ awˬ hkʼaw lo bvuhꞈ taˍ ve hkʼe” na yuˬ leh gʼa gʼaꞈ te ve yoˬ. Chi lehˬ miˬ guiˬ awˬ suhˉ hkʼaw Gʼuiˬ sha ve awˬ liˇ tawˇ hkawˇ awˬ suhˉ htaꞈ kʼoˆ gaˇ ve yoˬ. A shu teˇ gʼaˇ maˇ gʼaꞈ te ve kʼo, yawˇ hui htaꞈ te luˬ piˇ tuˬ yoˬ.—Iˉsaˍyaˆ 65:20.

Daˍyeˍlaˆ liꞈ 12:2 hkʼaw kʼoˆ ve, “teˇ hpaˍ hpaˍ co co taiˍ taiˍ teꞈ ve a shaꞈ htaꞈ gʼa leh, teˇ hpaˍ hpaˍ co co taiˍ taiˍ awˬ meꞈ awˬ hponˇ luˬ kʼai tuˬ yoˬ.” Chi teˇ tawn lehˬ kʼawꞈ teꞈ tu la ve chaw htaꞈ kʼoˆ taˍ ve yoˬ. Yawˇ hui “co co taiˍ taiˍ teꞈ ve a shaꞈ htaꞈ gʼa” ve, maˇ heˆ leh “co co taiˍ taiˍ awˬ meꞈ awˬ hponˇ luˬ kʼai tuˬ yoˬ.” Chi lehˬ 1,000 hkʼawꞈ ve awˬ yanˇ peuˬ la yoˬ te htaˇ, chaw teˇ hpaˍ co co taiˍ taiˍ teꞈ ve a shaꞈ htaꞈ gʼa leh chaw teˇ hpaˍ htaꞈ co co taiˍ taiˍ te luˬ piˇ tuˬ yoˬ.—Hpeuꞈ maˍ ve 20:15; 21:3, 4.

Kʼawꞈ teꞈ tu la ve chi ve 2 moˍ lehˬ awˬ nu ve teˇ mvuhˇ miˬ lo ca chehˇ˗e gaˇ ve chaw htaꞈ shuˍ ve yoˬ hehˉ. “Hteˇ ve chaw” lehˬ shu mvuhˇ miˬ chaw kanˉ te tuˬ viˬsaˇ gʼa ve htaꞈ shuˍ ve yoˬ. Yawˇ mvuhˇ miˬ oˇ ve hkʼaw chi maw maw chehˇ gʼa leh mvuhˇ miˬ oˇ ve hkʼaw ve chaw a hkaw˗anˬ gʼa ve hkʼe leˇ yawˇ kaꞈ teˇ hpaˍ hpaˍ gʼa ve yoˬ. “Maˇ hteˇ ve chaw” lehˬ guiˇ toˇ tuˬ viˬsaˇ gʼa ve htaꞈ shuˍ ve yoˬ. Yawˇ mvuhˇ miˬ oˇ ve hkʼaw chi maw maw chehˇ maˇ gʼa. Yaꞈ hkʼaˇ, yawˇ kʼawꞈ chehˇ gaˇ ve kʼo, yawˇ mvuhˇ miˬ oˇ ve hkʼaw ve awˬ liˇ awˬ hkʼaˇ htaꞈ gʼaꞈ te ve tehꞈ gʼa hpeuꞈ maw piˇ ve yoˬ. “Maˇ hteˇ ve chaw” kaꞈ hkʼa shuˍ yoˬ. Yawˇ miˬ guiˬ awˬ suhˉ hkʼaw kʼawꞈ chehˇ gaˇ ve kʼo, yawˇ Yaˬhoˉvaˬ ve awˬ liˇ awˬ hkʼaˇ htaꞈ gʼaꞈ te leh Yaˬhoˉvaˬ mehˆ gʼuˇ suhˍ daꞈ ve awˬ ceuˬ htaꞈ te tuˬ gʼa pa cawˇ ve yoˬ. Yawˇ viˬsaˇ hkʼaˬ hkʼe ve gʼa ve htawˇ maˇ kʼoˆ, shu mvuhˇ miˬ chaw lehˬ mvuhˇ miˬ oˇ ve hkʼaw ve teˇ gʼaˇ hpehꞈ gaˇ ve kʼo, awˬ liˇ awˬ hkʼaˇ htaꞈ gʼa gʼaꞈ te ve yoˬ. Yawˇ daꞈ ve htaꞈ te ve kʼo, mvuhˇ miˬ oˇ ve hkʼaw ve mvuhˇ miˬ yaˇ hpehꞈ gʼa ve yoˬ. Kʼawꞈ teꞈ tu la ve teˇ gʼaˇ le le kaꞈ chi ve htaꞈ shuˍ ve yoˬ. Yawˇ “maˇ hteˇ ve chaw” maˇ heˆ leh “hteˇ ve chaw” hpehꞈ ve htawˇ, yawˇ co co taiˍ taiˍ ve a shaꞈ gʼa tuˬ, miˬ guiˬ awˬ suhˉ hkʼaw yawˇ Yaˬhoˉvaˬ hkawˇ na yuˬ leh yawˇ ve awˬ liˇ awˬ hkʼaˇ htaꞈ gʼaꞈ te ve tehꞈ gʼa hpeuꞈ maw piˇ ve yoˬ.

Yaˬhoˉvaˬ lehˬ ha kʼaˉ puiˉ ve Gʼuiˬ sha hpehꞈ ve yoˬ. Yaꞈ hkʼaˇ, chi hkʼe ceh tiˉ maˇ heˆ. Yawˇ leh hteˇ ve cawˇ ve Gʼuiˬ sha kaꞈ hpehꞈ ve yoˬ. (Bon maˍ ve 32:4; Chiˇ mvuh ve 33:5) Yawˇ teˇ gʼaˇ le le htaꞈ haꞈ ve pa taw, “hteˇ ve chaw” leh “maˇ hteˇ ve chaw” htaꞈ kaꞈ kʼawꞈ teꞈ tu la tcuh piˇ tuˬ yoˬ. Yaꞈ hkʼaˇ, Yaˬhoˉvaˬ lehˬ teˇ gʼaˇ le le htaꞈ yawˇ ve awˬ liˇ awˬ hkʼaˇ gʼaꞈ te tcuh gaˇ ve yoˬ. Yawˇ htaꞈ haꞈ leh yawˇ ve awˬ liˇ awˬ hkʼaˇ htaꞈ gʼaꞈ te ve chaw ceh tiˉ miˬ guiˬ awˬ suhˉ hkʼaw co co taiˍ taiˍ gʼa chehˇ tuˬ yoˬ.