Dhoweni nioneni mwemo munawakulela Bibilya vyofuka vyevi.

Va Mayirelo 24:15 Bibilya linoniwandela ira “Unodha kala venyathi-iwa wa olongomana na o-olongomanene.” Olongomana mbaatu ale avwela Nlungu ta-anakwe. Ee-no madhiniwa tatolembiwa mubukhu la ingumi. (Malak. 3:16) O-olongomana, anothangani-avo atu ale takwide ta-ana ngari yofunjedha vya Yohova. Ee-no madhiniwa katalembiwile mubukhu la ingumi.

Va Juwau 5:28, 29 linoonga vya magulu menli aatu enao taongiwile thitho va Mayirelo 24:15. Yesu atoonga ira “ale taira vyongo vyapama” anodha venyathi ira “tadhakaena ingumi, na ale taira vyongo vyothakala tanodha venyathi-iwa ira tatongiwe.” Olongomanao taira vyongo vyapama ta-anakwe. Aliwa anodha venyathi ira takaena ingumi namwasa oi madhiniwa talive mubukhu la ingumi. O-olongomanao thitho tanooira vyongo vyothakala ta-anakwe. Ee-no tanodha venyathi ira tadhatongiwe. Voi madhiniwa katalembiwile mu bukhu la ingumi aliwa anodha va-iwa ngari yoi tatongiwe venango roma oniwa akala tatochinja. Vahora yeniyo aliwa anodha kaana ngari yofunjedha vya Yohova thitho ira madhiniwa tadhalembiwe mubukhu la ingumi.

Lemba Apokalipse 20:12, 13 linoonga ira atu othene tanofuna dhavenyathi-iwa anodha funeya vwela “vyolembiwa mumipukutunimo” vyevyo ndi malamulo mapya enao anofuna dhaniva-a Nlungu muilambo ipya. Atu enao anofuna dhakonda avwela anodha nongiwa.—Esaya 65:20.

Lemba la Danieli 12:2 latoongelatu ira enango mwa atu akwide anodha venyathi ira takaena ingumi yo-omala, mbwenye enango anodha nyoziwa thitho kondiwa modhowa nodhowa. Versuli linoonga vyotongiwa omari-a wewo ovenyathi-iwala unofuna aliwa dhakaana, wewo uli kaana—“ingumi yo-omala” venango “kondiwa odhowa nodhowa.” Komoni wa vyawa 1.000, enango anodha kaana ingumi yo-omala mbwenye enango anodha nongiwa.—Apok. 20:15; 21:3, 4.

Kathuulelani ifwanafwani-o ila. Magulu menli aatu ovenyathi-iwala ninooda afwanafwani-a naatu ale anofuna makaathi ilambo inango. Olongomana ali ninga atu adhowile ilambo inango thitho tatova-iwa makarta oarumeli-a kalanga muilambonimo venango laba basa wa hora yolapela thitho kaana ufulu oira vyongo vinango. Mo-iyana na vyevi o-olongomana ali ninga atu adhowile muillambo inango thitho tatova-iwa makarta owarumeli-a kala muilambonimo ninga alendo thitho wa hora yoyeva. Alendo ninga enao anofuneela ira tathonyi-edhe muvyoira viwa, akala tanorumeli-iwa ira tadhowenave kala muilambonimo. Mofwanafwana na vyevi, o-olongomana anofuna dhavenyathi-iwa anodha funeela vwela malamulo a Yohova thitho thonyi-edha muvyoira viwa ira mbolongomana noira tadhowenave kala paradaizoni. Angalive ira atu tadhowile muilambo inango tava-iwe makarta oi a-vi, enango vira wahora anorumeli-iwa kala muilambonimo thitho enango anoweleli-iwa waniwa. Vyevi vinovwelana na vyoira viwa thitho makalelwiwa muilambo idhowile aliwiyo. Mofwanafwana na vyevi moda unofuna dhatongiwa atu ovenyathi-iwa, unodha nyindela iroromelo yiwa thitho vyoira viwa muilambo ipya.

Kaiira Yohova utekala wa tangaranga baa-i, mbwenye ngu Nlungu olongomana. (Dotor. 32:4; Sal. 33:5) Thitho unodha thonyi-edha udhivelee vovenyathi-a atu olongomana na o-olongomanene. Mbwenye vahora imbo-ive yeniyo, unodha funa ira atwee tavwelenga makundwee okuza yapama na yothakala. Atu enao anofuna dhathonyi-edha ira anomvwela thitho vwelanga makundwee, mbaale anofuna rumeli-iwa dhowanave kala muilambo ipya.