Talenu Bayibolu chiyinakuli awa malwihu.

Yilwilu 24:15 yatulejaña nawu kwakekala kusañuka “kwawantu aloña niabula kuloña.” Antu aloña diwu antu amwovwahilileña Nzambi henohu kanda afwi, dichi majina awu ayisonekeli mumukanda wawumi. (Mal. 3:16) Antu abula kuloña munabombeli antu afwili chakadi kudiza kulonda amwiluki Yehova, dichi majina awu ayisonekeli wanyi mumukanda wawumi.

Yowanu 5:28, 29 yatena mazanvu wowamu ayedi ashimunawu haYilwilu 24:15. Yesu wahosheli nindi “owu akoñeleña yuma yayiwahi akasañukila kuwumi, nawa akoñeleña yuma yatama akasañukila kukuyisompesha.” Antu aloña elili yuma yayiwahi henohu kanda afwi. Akasañukila kuwumi wahaya nyaaka muloña majina awu achidi mumukanda wawumi. Ilaña, antu abula kuloña akoñeleña yuma yatama henohu kanda afwi. Akasañukila kukuyisompesha. Majina awu ayisoneka wanyi mumukanda wawumi, nawa akayisompesha hela kuyishinshika. Hayina mpinji, akekala nakukooleka kwakumwiluka Yehova kulonda majina awu akayisoneki mumukanda wawumi.

Chimwekeshu 20:12, 13 yalumbulula nawu antu ejima akasañulawu atela kwovwahila “yuma yasonekeliwu munyivuñilu,” dikwila nawu, nshimbi yayiha yakahanawu mwituña dadiha. Akabula kwovwahila akayifumishamu.—Isa. 65:20.

Danyeli 12:2 yashimwineñahu dehi nawu antu amakwawu akaama tulu twakufwa “akahindukila kuwumi wahaya nyaaka, amakwawu kunsonyi nikukusawuka kwahaya nyaaka.” Iyi vasi yahosha hachuma chakukumishaku chakayimwekena hanyima yakuyisañula, “wumi wahaya nyaaka” hela “nsonyi nikukusawuka kwahaya nyaaka.” Dichi kumakumishilu ayaaka 1,000, amakwawu akatambwila wumi wahaya nyaaka nawa amakwawu akayijilumuna haya nyaaka.—Chim. 20:15; 21:3, 4.

Talenu chakutalilahu. Awa mazanvu ayedi akasañulawu tunateli kuyesekeja nawañiinza anakukeña kushakama mwituña dacheñi. Antu aloña adi neyi awa antu anatambuli ngiya (visa) yamudimu hela yakushakama mwiluña, yikuyikwasha kuyiluka nikwikala asubuka. Kwambukaku, antu abula kuloña adi neyi añinza anekiwu ngiya (visa) yakapinji kantesha hohu hela yenkañawu antu anakuhempula. Henohu kanda ayiteji awa añiinza kutwalekahu kushakama mwituña munayiwu atela kumwekesha nawu anakulondela nshimbi yejima. Munjila yoyimu, antu abula kuloña akasañulawu atela kwovwahila nshimbi jaYehova nikumwekesha nawu aloña hakwila nawu akashakami muParadisa. Hichikweti muloña nangiya (visa) yatambwiliwu añiinza kulonda eñili mwituña dacheñiku, amakwawu anateli kutambula amakwawu anateli kuyihaña. Chumichi chikushindamena hayilwilu yinakumwekeshawu mwituña munayiwu. Munjila yoyimu, chuma chikayimwekena akasañulawu chikashindamena hachikuhwelelu chawu nihayilwilu yawu yakamwekeshañawu mwituña dadiha.

Yehova hiNzambi wukweti kukeña ilaña cheñi hiNzambi wawuñanji nawa wekala chiwahi. (Kuhit. 32:4; Mas. 33:5) Wakamwekesha kukeña kwindi nanochu chakasañulayi aloña niabula kuloña. Hampinji yoyimu wakakeñaña antu ejima akalondeleña nshimbi jindi jaloña. Antu akamukeña nawa akalondelaña nshimbi jindi diwu hohu aketejawu kutwalekahu kushakama mwituña dadiha.