Tumoneni Mbimbiliya muinakumbulwila ebi bihula.

Mukanda wa Bilinga 24:15 umwesa ngwawo kukakala “kusanguka kwa baka-busunga na baka-kujeneka busunga.” Baka-busunga banapu banu baje bononokele Njambi simbu kanda batse, co mazina abo banawasoneka mu libulu lya kuyoya. (Mala 3:16) Baka-kujeneka busunga banambateselela na baje batsile kwa kujeneka kulilongesa bya Yehova, co mazina abo kubawasonekele mu libulu lya kuyoya.

Mukanda wa Yiwano 5:28, 29 nawo unendeka ha bibunga bibali bibanendeka ku Bilinga 24:15. Yesu wendekele ngwendi “baje balingile byuma byabibwa, bakasangukila kuyoya, co baje balingile byuma byabibi, bakasangukila kubasompa.” Baka-busunga balingile byuma byabibwa simbu kanda batse. Bakasangukila kuyoya mwafwa mazina abo banawasoneka mu libulu lya kuyoya. Oloni baka-kujeneka busunga balingile byuma byabibi simbu kanda batse, co bakasangukila kubasompa. Mazina abo kanda bawasoneke mu libulu lya kuyoya, co bakabana simbu ya kumwesa kulongwa kwabo kuli Yehova. Ha simbu oyo bakalilongesa bya Yehova, asinoni mazina abo bakawasoneka mu libulu lya kuyoya.

Mukanda wa Kujombolola 20:12, 13 umwesa ngwawo boshe baje bakasanguka banapande kukononoka byuma ‘bibanasoneka mu mabulu’ kulumbununa mashiko amaha abakatambula mu kaye kakaha. Yehova akanyongesa baje kubakononoka awa mashiko.—Isaya 65:20.

Mukanda wa Ndanyele 12:2 umwesa ngwawo banu bamo baje banatsi bakasangukila kuyoya ‘myaka yoshe,’ bakwaboco bakasangukila ‘kushauka na kukala na shwamwa ku myaka yoshe.’ Ei vesi imwesa byuma bikalingiwa kuli baje bakasanguka. Bamo bakayoya “myaka yoshe,” bakwabo bakakala na shwamwa ku myaka yoshe.’ Ngeci, kumamaneselelo a myaka 1,000 banu bakayoya myaka yoshe, bakwaboco bakabanyongesa.—Kujo 20:15; 21:3, 4.

Tusimutwiyeni ha cakumwenako eci. Bibunga bibali bya banu baje bakasanguka tunasa kubyesekesa ku banu baje bashaka kujalukila ku lifuti lyeka. Baka-busunga tunasa kubesekesa kuli baje babanana mapapelo abatabesa kukobela bipangi mu lifuti lyeka na kukalamo. Oloni baka-kujeneka busunga tubesekesa ku banu baje babanana mapapelo abatabesa kukala simbu yaindondo mu lifuti lyeka. Banu ba cifwa eci, banapande kulingako byuma bimo bije bilingisa babenya lifuti babatabese kutwalelelaho kukalamo. Mu ngila imolika, baka-kujeneka busunga baje bakasanguka banapande kukononoka mashiko a Yehova na kulinga byuma bimwesa ngwabyo banapu baka-busunga, asinoni bakatwaleleleho kukala mu Paradaisi. Nameme banu baje bajalukila mu lifuti lyeka babatabesa kukalamo ha simbu yaindondo nambe yailaha, banapande kutwalelelaho kwononoka mashiko a muje mu lifuti mwafwa nga kubalingi ngoco, co babashekamo. Mu ngila imolika, byuma bibakalinga baje bakasanguka bikebyo bikabalingisa batwaleleho kukala mu kaye kakaha nambe embwe.

Yehova wapwa Njambi wa cizemo, co lalo muka-kusompa mu busunga. (Kwitu 32:4; Myaso 33:5) Akamwesa cizemo cendi mwakasangula baka-busunga na baka-kujeneka busunga. Oloni ashaka ngwendi banu boshe bakononoke mashiko endi. Baje bakamuzema na kwononoka mashiko endi bakebo lika babakatabesa kukala mu kaye kakaha.