Min nˈokˈijxëm wiˈixë Biiblyë jyënaˈany.

Mä Apostʉlʉty 24:15 jyënaˈany ko Dios “dyajjikypyëkäˈäny tëgekyë oˈkpë diˈibë ijt oyjyaˈay es nandëˈën diˈibë ijt kaˈoyjyaˈay”. Pënaty yajtijtëp oyjyaˈay, yëˈë mëdiˈibë ojts tmëmëdowdë Dios mä kyaˈooktënëm, pääty tap këxjäˈäy ja xyëëw mä ja liibrë mä yajkujayë pënaty jukypyëkandëp (Mal. 3:16). Ets pënaty ijttë kaˈoyjyaˈay, yëˈë pënaty kyaj ojts tˈokˈixyˈäjnëdë Jyobaa, pääty kyaj këxjäˈäy myindë xyëëw mä yäˈädë liibrë.

Yäˈädë majtsk grupëbë jäˈäy, yëˈë nanduˈun yajmaytyaktëp mä Fwank 5:28, 29 ets mä Apostʉlʉty 24:15. Jesus jyënany “diˈibë oy të jyikyˈaty yä naxwiiny, yëˈë jikypyëkëp es nyëjxtët mä ja jikyˈäjtën winë xëë winë tiempë, per diˈibë të jyikyˈaty axëëk yä naxwiiny, jyikypyëkëp es nyëjxtët mä ja tëytyuˈunën”. Mä nety kyaˈooktënëm ja oyjyaˈay, yëˈë tyuundë tijatyë Dios kyupëjkypy ets jukypyëkandëp mët ko duˈunyëm ja xyëëw yˈittë këxjäˈäy mä ja liibrë mä yajkujayë pënaty jukypyëkandëp. Per pënaty axëëk jukyˈäjttë mä nety kyaˈooktënëm, jukypyëkandëp parë yajpayeˈeytyët. Ja mä yaˈixäˈändë pën myëmëdowandëbë Jyobaa o kyaj, pes yëˈëjëty kyajnëm ja xyëëw yajkujayëdë mä ja liibrë mä yajkëxjäˈäy pënaty jukypyëkandëp. Mä taabë tiempë, jaa mä tˈixyˈatäˈändë Jyobaa parë mbäät yajkujayëdë ja xyëëw mä ja liibrë.

Mä Diˈibʉ Jatanʉp 20:12, 13 jyënaˈany ko niˈamukë pënatyë nety jukypyëjktëp, tsojkëp tmëmëdowdët ja mëdiˈibë nety ijtp “këxjäˈäy nekykyëjxm”, yäˈädë yëˈë yˈandijpy ja anaˈamën mëdiˈibë netyë Dios të dyaky mä ja jembyë jukyˈäjtën. Ets pënaty kyaj tmëmëdowdë, ta nëjkx kyutëgoytyë (Is. 65:20).

Mä Daniel 12:2 ojts yajnaskäjpxë ko nääk mëdiˈibë määdëp nääxoty jotwijandëp, “parë jyukyˈattët xëmëkyëjxm ets nääk parë yajjëjwijtsëmbittët ets yaˈëxtijtët xëmëkyëjxm”. Extëm jyënaˈanyë yäˈädë tekstë, yëˈë xytyukˈijxëm ko pënatyë nety jukypyëjktëp, mbäät jyukyˈattë “xëmëkyëjxm” o yaˈëxtijtë “xëmëkyëjxm”. Pääty ko nety yˈabajnë tuk mil jëmëjt, näägë jäˈäy nëjkxëp tˈaxäjëdë ja jukyˈäjtën mëdiˈibë xëmëkyëjxm etsë wiinkpëty nëjkxëp kyutëgoytyë xëmëkyëjxm (Diˈibʉ Jat. 20:15; 21:3, 4).

Yäˈädë majtsk grupëbë jäˈäy mëdiˈibë jukypyëkandëp, mbäät nˈijxkijpxyëm mëdë jäˈäy mëdiˈibë nëjkxandëp wiink paˈis tsënaabyë. Ja oyjyaˈay mëdiˈibë jukypyëkandëp, duˈun extëm näägë jäˈäy mëdiˈibë nëjkxtëp wiink paˈis ets tjuuttë ja byisë parë jap tyunäˈändë o tsyëënëyäˈändë. Ets pënaty yajtijtëp kaˈoyjyaˈay, duˈun extëm ja jäˈäyëty mëdiˈibë jeˈeyë tuk tiempë yajmooytyëbë byisë parë jap yajpäättët o tˈixyˈattët ja it lugäär. Per parë mbäät jap tsyënääytyaknbëktë, tsojkëp duˈun jyukyˈattët extëm ja gobiernë tijaty tniˈanaˈamë yajtunët mä taabë paˈis. Nanduˈunën ja kaˈoyjyaˈay mëdiˈibë nety të jyukypyëktë, pën jukyˈatandëp xëmëkyëjxm mä ja it lugäärë tsujpë, tsojkëp tmëmëdowdët ja Jyobaa yˈanaˈamën etsë net dyajnigëxëˈëktët ko nanduˈun jyukyˈattë extëm ja oyjyaˈay. Ja jäˈäyëty mëdiˈibë të yajmoˈoytyë byisë parë tsyëënëdët mä tuˈugë paˈis ets mëdiˈibë të yajmoˈoytyë permisë parë jeˈeyë tuk tiempë jap nyëjkxtët, tsojkëp tmëmëdowdët ja ley mëdiˈibë gobiernë yajnaxkëdakypy parë mbäät jap tsyënääytyaknbëktë. Pën kyaj duˈun ttundë, ta yajkajxpëtsëmäˈändë mä ja paˈis. Nanduˈunën niˈamukë pënatyë nety jukypyëjktëp, yëˈë yaˈixäämp tijatyë nety tyuundëp mä ja jembyë jukyˈäjtën ets pën myëmëdoowdëbë Jyobaa parë mbäät jyukyˈattë xëmëkyëjxm.

Jyobaa, yëˈë tuˈugë Dios mëdiˈibë tijaty tyuumpy ak oy ets kyaj jeˈeyë tpaˈˈayoyë jäˈäy (Deut. 32:4; Sal. 33:5). Tyukˈixaambyë naxwinyëdë jäˈäy ko mëk ttsoky, ko nety dyajjukypyekyë oyjyaˈay etsë kaˈoyjyaˈay. Perë Jyobaa tsyojkypy ets niˈamukë yäˈädë jäˈäyëty tmëmëdowdët ja anaˈamën mëdiˈibë nety të dyajnaxkëdaˈaky mä ti oy ets ti axëëk. Yëˈëyë jukyˈatandëp xëmëkyëjxm pënaty myëmëdoowdëbë Jyobaa yˈanaˈamën ets yajtsobattëp.