Moone mananna Ibiiblya cinaakhulaaya ayo makohwaayo.

Miteko 24:15 ineera wiira “wahoolo unaahala ukhala wunwelela waatthu ookhwa yeettenle isariya ni ale yaheettenle.” Atthu yeettenle isariya phaale amwiiwelenle Nluku ahinaaya ukhwa; phimaana, macinaaya ahantikhiya nlivuruni yeekumi. (Mal. 3:16) Ale yaheettenle isariya akhanle atthu yahaakhalanne mananna owiitthuca myaha ca Yehova ahinaaya ukhwa; phimaana, macinaaya khayantikhiye nlivuruni yeekumi.

Joau 5:28, 29 ciicammo inawuuluma ikhurupu piili cinoolumiya nhina Miteko 24:15. Yesu enre wiira atthu “apankale citthu comaana” anhala wunwelelihiya “wiira akhale nuukumi,” ni “ale apankale citthu cootakhala” anhala wunwelelihiya “wiira ahukhumwiye.” Atthu yeettenle isariya apankale citthu comaana ahinaaya ukhwa. Ayo anhala wunwelelihiya wiira akhale nuukumi kontha macinaaya ahantikhiya nlivuruni yeekumi. Vano ale yaheettenle isariya? Ayo atthwaayo apankale citthu cootakhala ahinaaya ukhwa. Phimaana, ayo anhala wunwelelilhiya wiira ahukhumwiye. Macinaaya khayantikhiye nlivuruni yeekumi ni ahaana yahukhumwiyaka awula uwehiya meettelwaaya. Uyo ukatyuuyo, ayo anaahala uvahiya ukati wo wiitthuca myaha ca Yehova ni wo wantikhiya macinaaya nlivuruni yeekumi.

Apokalipise 20:12, 13 ineera wiira atthu otheene anhala wunwelelihiya ahaana yarwaaka wiiwelela “citthu cantikhiye mmarooluni.” Nnyo iroolunnyo akhanle malamulo ophiyaaru Yehova nohalaawe univaha upeephoni. Yehova naahala waamalamaliha atthu otheene ahinhala upheela umwiiwelela.—Isai. 65:20.

Daniele 12:2 ineera wiira atthu akiina anhala wunwelelihiya “wiira akhalane ukumi woohimala ni akiina wiira waaphwanye wuulihaciya muru ni uhiwaceriya woohimala.” Iyo iveeruswiiyo inooluma itthu inhala wiirannya wiimaleloni uwakati wo myaakha 1.000—ahaavo anhala wunwelelihiya wiira avahiye “ukumi woohimala” ni akhwaawe anhala wunwelelihiya wiira waaphwanye “uhiwaceriya woohimala.” Iyo itthwiiyo maanaaya wiira atthu akiina anaahala uvahiya ukumi woohimala, masi akhwaawe anaahala umalamalihiya.—Apoka. 20:15; 21:3, 4.

Muupuwele ila itthwiila: Itthu inhala uwiirannyeela atthu o nnyo ikhurupu piilinnyo inaalikanaca naatthu ampheela urwaa ukhala ilapo ikhwaawe. Atthu yeettenle isariya pooti wanaalattaniheehu naatthu anvahiya ile ineehaniya visto—itukumentu inhimya wiira anaatthuniheriya ukela ilapo impheelaaya urwaa wiira yavare nteko awula yakhale. Ayo pooti ukhala iyo ilapweeyo woohittharatthariya ni yiitaphulaka. Vano atthu yaheettenle isariya pooti wanaalattaniheehu naatthu anvahiya ile ineehaniya visto temporário. Ayo atthwaayo anaahinnya ukela ilapo impheelaaya urwaa, masi ankhala yaweheehiyaka ni ahaana yooniheraka wiira akhanle atthu ookhuluvelya wiira ahinnye ukhala iyo ilapweeyo yiitaphulaka. Inanna imocaaru, atthu yaheettenle isariya yonwelelihiyaka ahaana yeewelelaka malamulo a Yehova ni ahaana yeettelaka isariya yapheelaka uhihiya ukhala upeephoni. Ntthu thamenle ilapo ikiina nuuwakatyaaya ooniyaka ukhala ntthu ookhuluvelya pooti uvahiya itukumentu inthoonyera wiira iyo ikhanle ilapwaawe, masi akiina yooniyaka wiira akhanle atthu oohunya maru, anaahokoloseriya ilapo inkhumaaya. Meettelwaawe ntthuuyo nlaponi ithamenlyaawe phinhala woonihera wakhala wiira unamphwanela awula mena uleveliya ukhala iyo ilapweeyo mpaka. Inanna imocaaru, wiira atthu anhala wunwelelihiya avahiye ukumi woohimala, meettelo anhalaaya ukhalana upeephoni phinhala woonihera wakhala wiira unawaaphwanela awula mena uvahiya ukumi woohimala.

Yehova khanle Nluku oofenta venci, masi ciicammo khanle Nluku nasariya. (Deut. 32:4; Isaa. 33:5) Nifento nawe ninaahala woonannya uwakati unhalaawe uwunweleliha atthu yeettenle isariya ni ale yaheettenle. Masi Yehova noweherera wiira atthu otheene nohalaawe uwunweleliha yiiwelele malamulwaawe. Ale anhala unfenta Yehova ni anhala weettela malamulwaawe, phinhala paahi uhihiya ukhala upeephoni.