Lolani vino Baibolo yikakwasuka ya-a amawuzyo.

Imilimo 24:15 yikatunena ukuti kuliwa “ukuzyulupuka kwa walungamane na wano wasa walungamane.” Awalungamane, awawo wano wivwilanga e Leza pano watani wafwe. Acino amazina yawo yalembwa na mwi buku lya wumi. (Mala. 3:16) Pe wano watalungamana pawa na wano watakwetipo ulongo lwakusambilila pe Yehova, na mazina yawo yatalembwa mwi buku lya wumi.

E Yohani 5:28, 29 yikalanda pa mawumba yawili ayali yonganye na yano yawa pa Imilimo 24:15. E Yesu watili ‘wano wacitanga icete walizyulupucila kuwumi, na wano wacitanga uwuwi walizyulupucila kwi panzyo.’  Awalungamane wacitanga ivizima pano watani wafwe. Walizyulupucila ku wumi, amuno amazina yawo yacili yawa mwi buku lya wumi. Lelo wano watalungamana wacisile iviwipe pano watani wafwe. Weni walizyulupucila kwi panzyo, amuno amazina yawo yatalembwa mwi buku lya wumi. Swinya kuliwa impindi pano walipingulwa nanti pano waliyelezwa ukulola nga cakuti amazina yawo yangalembwa. Pe yoyo impindi waliwa nulongo lwakusambilila pe Yehova nukulembwa amazina yawo mwi buku lya wumi.

Ukuwumbulika 20:12, 13 kukalanda ukuti wonsinye wano walizyulupuka, waliwalondeka ukwivwila vino ‘vyawalikwa mwa kalata.’ Akuli ukuti amasundo yano Yehova alitupa mu nsi mpya. E Yehova aliyonona wonsinye wano wataliwakwivwila ya-a amasundo.​—Ayize. 65:20.

E Daniel 12:2 yalandizile lya nkani ukuti wamwi wano wafwa walizyulupucila “ku wumi wamuyayaya ne wamwi kumukwelengula na kukusulwa kwamuyayaya.”[NWT] Yo-o vesi yikalanda pakupingulwa kwa kulecelezya ukwe wano walizyulupuka. Wa-a wantu walipocelela “uwumi wamuyayaya” nanti “ukusulwa kwamuyayaya.” Fwandi kukusila kwa myaka 1,000, wamwi walipocelela uwumi wamuyayaya ne wamwi waliyononwa umuyayaya.​—Ukuwu. 20:15; 21:3, 4.

Katulande pa cakulolelako. Vino viliciticila wano walizyulupuka, tungavikolanya kwe vino vingaciticila wano wakulonda ukuya mukwikala ku nsi kuno asa kumwawo. Awalungamane tungawakolanya kwe wano wapoka icitupa caku ncito nanti icitupa cakuya mukwikala kunsi yinji pakuti nawonye wawe nuwuntungwa wakucitako vino awa kwe yoyo insi wakacita. Lelo wano watalungamana weni tungawakolanya kwe wano wapoka icitupa cakuya mukwikala kunsi kuno asa kumwawo paka mpindi vye katici nanti icitupa cakuya mukutandala vye. Nomba wa-a awantu wano wakuya kunsi yinji, wazipizile ukufikapo pe vino vikalondekwa pakuti wawazumilizye ukutwalilila ukwikala kwe yo-o insi. Wonye avino na wano watalungamana wano walizyulupuka waliwalondeka ukwivwila amasundo ya kwe Yehova nukuwombesya ukuwa awalungamane pakuti watwalilile ukwikala mu paradaise. Lelo ndi wulyanye vino cikawa kwe wano wakuya mukwikala ku nsi kuno asa kumwawo, asamulandu nicitupa cino waposile, wamwi wangaya wawe awikazi wansi kuno wakuya ne wamwi wanganyocelamo kumwawo. Imiwele ni micitile yawo avino vingalenga watwalilile ukwikala nanti ukunyocelamo kumwawo. Fwandi isuwilo nimicitile vino wano walizyulupaka waliwa navyo avino vililenga watwalilile ukwikala munsi mpya nanti awe.

E Yehova asa we Leza wino wawa vye ni nkumbu, lelo we Leza wino wawa numulinganya swinya wino asimwamila mbali. (Amasu. 32:4; Amalu. 33:5) Alilanjizya vino wawa nu lukundo, pano alizyulupula wonsinye, awalungamane na wano watalungamana. Lelo aliwakwenecela wonsinye ukuwakwivwila amasundo yano yakalanda pa vizima ni viwipe. Acino wano walitwalilila ukumukunda nu kwikala ukulingana na masundo yakwe, awano alizumilizya ukutwalilila ukwikala mu nsi mpya.