Pregunta ña̱ kéʼé na̱ káʼvi tutu yóʼo
¿Ndáana ndataku nu̱ú ñuʼú yóʼo ta ndáa ki̱ʼva koo ña̱ ndatakuna?
Ná kotoyó ña̱ káʼa̱n Biblia.
Hechos 24:15 káʼa̱nña ña̱ ndataku “na̱ ke̱ʼé ña̱ va̱ʼa” ta saátu “na̱ ke̱ʼé ña̱ va̱ása va̱ʼa”. Na̱ ke̱ʼé ña̱ va̱ʼa yóʼo kúú na̱ xi̱ndasakáʼnu Ndióxi̱ tá kúma̱níka kuvina, ña̱kán ni̱ka̱ʼyi̱ ki̱vi̱na nu̱ú libro nu̱ú va̱xi ki̱vi̱ na̱ kutaku (Mal. 3:16). Na̱ ke̱ʼé ña̱ va̱ása va̱ʼa yóʼo kúú na̱ yiví na̱ va̱ása nísakúaʼa xa̱ʼa̱ Jehová tá kúma̱níka kuvina, ña̱kán kǒo ki̱vi̱na va̱xi nu̱ú libro nu̱ú va̱xi ki̱vi̱ na̱ kutaku.
Juan 5:28, 29 káʼa̱nña xa̱ʼa̱ u̱vi̱ grupo na̱ yiví ta suvitu na̱yóʼo kúú na̱ káʼa̱n Hechos 24:15 xa̱ʼa̱. Ta̱ Jesús ni̱ka̱ʼa̱nra “na̱ ke̱ʼé ña̱ va̱ʼa ndatakuna ta koona, ta na̱ ke̱ʼé ña̱ va̱ása va̱ʼa ndatakuna ta ndatiinna ku̱a̱chi xíʼinna”. Na̱ yiví na̱ xi̱ndasakáʼnu Ndióxi̱ tá kúma̱níka kuvina nina ña̱ va̱ʼa xi̱keʼéna, ndatakuna ta koona chi va̱xi ki̱vi̱na nu̱ú libro nu̱ú va̱xi ki̱vi̱ na̱ kutaku. Soo na̱ yiví na̱ va̱ása níxi̱ndasakáʼnu Ndióxi̱, ke̱ʼéna ña̱ va̱ása va̱ʼa tá kúma̱níka kuvina, na̱yóʼo ndatakuna ta ndatiinna ku̱a̱chi xíʼinna. Saáchi ta̱ʼán kixi ki̱vi̱na nu̱ú libro nu̱ú va̱xi ki̱vi̱ na̱ kutaku ndiʼi tiempo, ta na̱yóʼo ndatakuna ta ndatiinna ku̱a̱chi xíʼinna. Ta tiempo saá kivi sakúaʼana xa̱ʼa̱ Jehová, ña̱ va̱ʼa xa̱a̱na ka̱ʼyi̱ ki̱vi̱na nu̱ú libro nu̱ú va̱xi ki̱vi̱ na̱ kutaku.
Apocalipsis 20:12, 13 káʼa̱nña ña̱ ndiʼi na̱ ndataku kundiku̱nna ña̱ ni̱ka̱ʼyi̱ nu̱ú rollo á ley xa̱á ña̱ taxina ndaʼa̱yó nu̱ú ñuyǐví xa̱á. Na̱ va̱ása kandíxa kundiku̱n ña̱yóʼo ndiʼi-xa̱ʼa̱na (Is. 65:20).
Daniel 12:2 káchiña: “Na̱ ni̱xi̱ʼi̱ na̱ ñúʼu ti̱xin ñuʼú ndatakuna, savana ndatakuna ta koona ndiʼi saá tiempo, ta savana ndatakuna ta kundasína kuninana ta na̱ ndiʼi-xa̱ʼa̱ va̱ʼa koona”. Nu̱ú versículo yóʼo káʼa̱nña xa̱ʼa̱ ña̱ kundoʼo na̱ ndataku tá ná ndiʼi ña̱ mil ku̱i̱ya̱: “Savana ndatakuna ta koona ndiʼi saá tiempo” ta “savana ndatakuna ta kundasína kuninana ta na̱ ndiʼi-xa̱ʼa̱ va̱ʼa koona”. Ña̱kán tá ná ndiʼi ña̱ mil ku̱i̱ya̱, savana kutakuna ndiʼi tiempo ta savana na̱ ndiʼi-xa̱ʼa̱ koona (Apoc. 20:15; 21:3, 4).
Na̱ u̱vi̱ grupo na̱ ndataku nu̱ú ñuyǐví xa̱á kivi chitáʼanyóna xíʼin na̱ yiví na̱ kúni̱ ku̱ʼu̱n koo inka país. Na̱ yiví na̱ ke̱ʼé ña̱ va̱ʼa kivi koona nda̱a̱ táki̱ʼva íyo na̱ yiví na̱ ku̱a̱ʼa̱n koo inka ñuu ta táxina visa ndaʼa̱na ña̱ va̱ʼa kachíñuna ñuu kán á ña̱ koona ñuu kán. Ta saátu kivika keʼéna inkaka ña̱ʼa ti̱xin ñuu kán. Na̱ yiví na̱ ke̱ʼé ña̱ va̱ása va̱ʼa kivi chitáʼanyóna xíʼin na̱ ku̱a̱ʼa̱n inka país, soo loʼo kuitíva ki̱vi̱ táxina ndaʼa̱na koona ñuu kán. Soo tá kúni̱na koona ñuu kán xíniñúʼu kuniso̱ʼona ña̱ káʼa̱n na̱ chíñu ñuu kán xíʼinna. Ta saátu xíniñúʼu keʼé na̱ xi̱keʼé ña̱ va̱ása va̱ʼa tá kúni̱na koona nu̱ú ñuyǐví xa̱á, xíniñúʼu kuniso̱ʼona ña̱ káʼa̱n Jehová ta na̱ʼa̱na ña̱ kúni̱na koona kán. Nda̱a̱ táki̱ʼva ndóʼo iin na̱ ku̱a̱ʼa̱n koo inka país, savana táxina ña̱ koona ndiʼi tiempo ñuu kán ta savana távánana. Ña̱kán ña̱ va̱ʼa koona ñuu kán xíniñúʼu ixato̱ʼóna ley ñuu kán, tá kǒo ta tavánana. Ta ki̱ʼva saá kundoʼo ndiʼi na̱ ndataku nu̱ú ñuyǐví xa̱á, ña̱ chindeétáʼan xíʼinna kúú ña̱ nda̱kú koo inina xíʼin Ndióxi̱ ta saátu ña̱ keʼéna nu̱ú ñuyǐví xa̱á.
Kúndáʼviní-ini Jehová xínira na̱ yiví, ta nda̱kúní ndátiinra ku̱a̱chi xíʼinna (Deut. 32:4; Sal. 33:5). Ta na̱ʼa̱ra ña̱ kúʼvi̱ní-inira xínirana, saáchi sandátakura na̱ ke̱ʼé ña̱ va̱ʼa ta saátu na̱ ke̱ʼé ña̱ va̱ása va̱ʼa. Soo kúni̱ra ná kuniso̱ʼona ndáaña káʼa̱nra xa̱ʼa̱ ña̱ va̱ʼa xíʼin xa̱ʼa̱ ña̱ va̱ása va̱ʼa. Ta nda̱saa na̱ kuʼvi̱ní-ini kuni miíra ta kuniso̱ʼona ña̱ káʼa̱nra kúú na̱ koo ndiʼi tiempo nu̱ú ñuyǐví xa̱á.
