Elobmîs nē dîsa ra ǃeream ǀgauba kō re.

ǃNaeǃkhaidi 24:15 ge ra mîba da “ǂhanu-ain tsî ǂhanuoǃnân” khâis nî hâsa. ǂHanu-ain ge Jehovaban ra ǁnâuǀnam hîna ge a ǁōna. Tsî i ge ǁîn ǀonde ûib ǂkhanis ǃnâ a xoasa. (Mal. 3:16) ǂHanuoǃnân ge ǁnān hîna ge, Jehovab xa ǁkhāǁkhāsens ǃēsa ūhâ tama hâ īna. ǁÎn ǀondi ge ûib ǂkhanis ǃnâ xoasa tama.

Johaneb 5:28, 29 ge ǀgui groeps khoen hîna ǃNaeǃkhaidi 24:15 ǃnâ ra mîhena ǃoa ra ǁnaeǁgau. Jesub ge ra mî “ǁnān ǃgâina gere dīn ge ǀamo ûib ǃoa nî khâi tsî naun ǂkhabana gere dīn ge ǀgoraǃgâs ǃoa nî khâi.” ǂHanu-ain ge ǁōn nîs aiǃâ ǃgâi xūna gere dī. Tsîn ge ûib di khâisa nî hō, ǁîn ǀondi noxoba ûib ǂkhanis ǃnâ xoamâisa amaga. Xawe ǂhanuoǃnân ge ǁōn nîs aiǃâ ǁgai xūna gere dī. ǁÎn ǀondi ge ûib ǂkhanis ǃnâ xoasa tama. Tsîn ge nî ǀgoraǃgâhe tamas ka io, ǁaeroba matin ra tanisen ǀgauba nî kōhe. ǁNā ǁaeb ǃnân ge Jehovab xa ǁkhāǁkhāsens ǃēsa nî hō. Tsî ǀgui i ge ǁîn ǀonde, ûib ǂkhanis ǃnâ nî xoahe.

ǂHaiǂhais 20:12, 13 ge ra ǁguiǃā hoa khoen hîna khâisa ra hōn ge “ǂkhanidi ǃnâ a xoamâisa” xūna nî ǁnâuǀnam. Tsî ǁnān hîna Jehovaba ǁnâuǀnam taman ge nî hîkākāhe.—Jes. 65:20.

Danieli 12:2 ge ra kēbo, ǁnān hîna ǁōb ǃnâ ǁom hân ge ǁkhawa nî khâimâ. “ǀNîna ǀamo ûib ǃoa tsî ǀnîna ǀamo taosib” tsî hîkākāsa ǃoa. Nē xoas ge ǀuniga ǀgoraǃgâs khâisa ra hōn xa ra mî. ǁÎn ge “ǀamo ûib” tamas ka io “ǀamo” hîkākāsa nî ǃkhōǃoa. 1 000 Kurigu ǂgaeǂguis ǀams ain ge ǀnîna ǀamo ûiba nî hō. Tsîn ge ǀnîna nî hîkākāhe.—J.ǂHa. 20:15; 21:3, 4.

Saora aiǁgausa kō re. Nē ǀgam groep ra ge khoe-i hîna, ǀnî hâ ǃhūba ra sari-i ǀkha a ǀgopeǀnōhe ǁkhā. ǂHanu-ain ge ǁnan hîna sîsen i. Tamas ka io ǃhūb ǃnâ hâs mā-amsa [ǁanǂgāsabese] ūhâna. Nēs ge ra mā-am în ǂansa tsî ǀnî ǃnorasasiga ūhâ. Xawe ǂhanuoǃnân ge ǁnā sari-aon hîna ǃnubu ǁaerob di visasa ūhâna. ǁNā sari-aon ge nî ǁgau ǁîn tanisen ǀgaub ǃnâ-ū, ǀasa ǃhūb ǃnâ hâsan nî mā-amhes aiǃâ. ǁNās ǁkhās khamin ge ǂhanuoǃnân khâisa ra hōna, Jehovab ǂhanuba nî ǁnâuǀnam. Tsî nî ǁgau paradais ǃnâ ûis aiǂhanuban ūhâsa. ǂHanub ge sari-aona ra mā-am în ǃhūb ǃnâ kaixuse hâ tsî sîsen. Tsî ǀnîn ge ra mā-amhe în ǃnubu ǁaeroba sari. Xawe hoa groep ra khoen ge ǂhanub di ǁgaraga nî ǁnâuǀnam în ǁanǂgāsabesisa mā-amhe. ǁNāsan ga ǁnâuǀnam tama ī, on ge mā-amhe tide. ǀUniga mîǁguib ge matin ǀasa ǃhūbaib ǃnâ ra tanisens ai nî ǃgaoǃgaohe. ǁNās ǁkhās khami i ge ǀuniga mîǁguib khâisa ra hōn hoan diba. ǁÎn ǂgomǂgomxasib tsî tanisen ǀgaub ai nî ǃgaoǃgaosa.

Jehovab ge ǀkhomxaǂgaosib Elos ǀguisa hî tama. Xaweb ge ǂhanu-aisib tsî ǂhauǃnâsib Elos tsîna ī. (Deu. 32:4; Psa. 33:5) ǁÎb ǀnamab ge ǂhanu-ain tsî ǂhanuoǃnân tsîna khâisa mās ǃnâ-ū nî ǁgau. Xaweb ge nî ǃâubasen în hoana ǁîb ǂhanu-a tsî tā dī di ra mî xūna ǁnâuǀnam. ǁNān hîna ǁîba ǀnam tsoatsoa tsî ǁîba ra ǁnâuǀnaman ge nî mā-amhe în ǀasa ǃhūbaib ǃnâ ûi ǀgara.